Akazogodola uRingo ePhalamende, uzolwa
URINGO Madlingozi owaduma ngengoma eyashisa izikhotha eyayithi “Ngiyagodola” nongene ePhalamende ngelikaBrian Sindile Madlingozi ubukeka ezoyifudumeza inkundla njengoba kuthe ngesonto eledlule wafungiswa njengelinye lamalungu e-Economic Freedom Fighters angama-44 esuka kwangama-25 eminyakeni emihlanu eyedlule.
Kubikwa ukuthi njengoba esePhalamende nje uMadlingozi ukhombise ukuba yintandokazi kubalandeli be-EFF ngangokuthi ohlwini lwabakleliselwe ukuya ePhalamende ubengunombolo 39. Lokhu yikhona okumenze waqonda ngqo kuzwelonke. Kuzokhumbuleka ukuthi i-EFF iyona eyenze kangcono kakhulu kulolu khetho yakhombisa ukudlondlobala.
Lolu khetho lube nezimanga ngisho nangaphakathi ku-EFF. Umholi obebhekwe ngabomvu ukuba abe phezulu nohlu lwabaya ePhalamende uDkt uMbuyiseni Ndlozi ube ngowesi-7 ohlwini. Wehlulwe ngoHlengiwe Mkhaliphi obaziwa ngoHlengiwe MaHlophe Maxon, kwaba nguGodrich Gardee, noLeigh-Ann Mathys bengena ngokulandelana ngaphambi kukaNdlozi.
Ezikhulumela ngaphambidlana kancane kokhetho uMadlingozi wathi, “Uma ngiya laphaya ePhalamende angiyele ukuyojabulisa abantu kodwa ngiyosebenzela iqembu nabantu bakithi.” Lapha uRingo
wayekuTshela Thupha Rally eyayibanjelwe eSoweto ngosuku lwangeSonto olwalandulela oLwesithathu lokhetho lukazwelonke.
Ebuzwa ngokumholele kuEconomic Freedom Fighters uRingo Madlingozi uthe ungene kuleli qembu esikhathini esingangonyaka esedlule ngoba abaholi bebemkhulumela ulimi aluzwayo.
Ngokungena kwakhe ePhalamende ubeke wathi, “Angizolwela amalungelo amaciko kuphela kodwa ngizolwela nalabo ababekwe eceleni uma kuza ezindabeni ezithinta umnotho ezweni futhi akuzoba abaculi kuphela kodwa amaciko akuyo yonke imikhakha,” kusho uMadlingozi othi akasiboni isidingo sokuthi kube khona abantu abahluphekayo libe izwe licebe kangaka ngezimbiwa.
Ukungena kukaRingo Madlingozi kubukeka kuzoba yisibusiso emacikweni ahlala ekhala ngokuthi uHulumeni akawunakekeli lomkhakha wobuciko.
IBAYEDE ikhuluma neciko elidwebayo uThami Jali lakhala kakhulu ngokuqashwa kwabantu abangovukayibambe kwezobuciko.
“Ngokwami, uBen Martins uyena owayengenza kangcono eMnyangweni Wezobuciko ngoba wazabalazela lo mkhakha impilo yakhe yonke. Okubuhlungu wukuthi uMartins wazithola eseMnyangweni Wezokuthutha ongasondelene nhlobo nezobuciko,” kubeka uJali.
NoBheki Mkhwane osemkhakheni wezokulingisa naye wakhala esifanayo engxoxweni ekhethekile aba nayo nephephandaba laboHlanga.
Wabeka wathi, “Inkinga enkulu yileyo yokuqashwa kwabantu abangahlangene nhlobo nomkhakha wezobuciko. Siba nenkinga enkulu uma sizonikwa umuntu okusafanele achazelwe ukuthi yini yona lena ayiphathisiwe. Umuntu onjalo uyofika nini ekuthini amaciko uzowathuthukisa kanjani?”
Ngeshwa uRingo Madlingozi akanikezwanga isikhundla sobungqongqoshe ngenxa yokuthi akekho eqenjini elibusayo okuyiAfrican National Congress.
Ukungena kwakhe kodwa kuyathembisa ukuthi kuzoyifudumeza ingxoxo yokubhekelelwa kwamaciko nguHulumeni ngoba ngokusho kwakhe, “I-EFF yilona kuphela iqembu elisePhalamende eliqonda ngokuphelele izidingo zabahluphekayo nabeswele amathuba emisebenzi,” kuphetha uMadlingozi.
UMadlingozi akulona iciko lokuqala ukuzihlanganisa neqembu lezombusazwe. Kuzokhumbuleka ukuthi kuyona i-Economic Freedom Fighters kunoFana Mokoena odlala amafilimu nowaba ngomunye wezingqalabutho ze-EFF.
Abanye ngo-Eugene Mthethwa weqembu lekwaito nesipantsula iTrompies noDJ Sbu abazihlanganisa ngokungahlonizi neqembu i-African National Congress.
Umehluko wukuthi laba abanye abafikanga ezingeni lokufuna ukuvotelwa kodwa bagcina ngokuba ngamanxusa eqembu i-ANC.