Umkhathi womnotho kwaboHlanga awusekelwe isikompilo: Khoza
UMBHALI waleli bhuku uDkt uReuel Khoza yisifundiswa, umholi nosomabhizinisi ovelele eNingizimu Afrika. Maningana amanye amabhuku awabhalile amayelana nokuphathwa kwezimboni nezinkampani ezinkulu ngendlela eyehlukile kweyasemazweni asempumalanga. Elinye ibhuku lakhe elikhumbuleka ngokushesha yileli elinesihloko esithi “Let Africa Lead: African Transformational Leadership for 21st Century” egcizelela ukuphatha ngendlela yase-Afrika ezimelele osikompilweni lobuntu; ukuzithoba nokuba ngumlamuli njengokuyiyo engaphumelelisa izwekazi i-Afrika ngokomnotho nangokuhlalisana ngokuthula kwezinhlanga.
Ebhukwini i-Attuned Leadership okaMkhathini (isithakazelo sakwaKhoza) usagcizelela bona ubuntu njengomkhombandlela ongabhekisa leli empumelelweni. Unezibonelo ezisobala azibalulayo lapho enza khona umehluko phakathi kobuholi nokuphatha. Uthi indlela entsha nebalulekile yobuholi yileyo ebhekela kakhulu ukuxoxisana ngokomoya, ukuzibandakanya, nokuba khona komuntu ngamunye noma beyidlanzana emsebenzini osuke wenziwa. Uqhubeka athi le ndlela entsha yokuphatha ezinkampanini ibheka ngokuphelele indlela yokusebenza kobuholi kanye nalabo abaholwayo ngaphakathi emsebenzini. Iphinde ibheke kakhulu uhlobo lomuntu isisebenzi ngasinye esiyilo ngokokudaleka kwaso kuqhathaniswe nokusebenza ngokugculisayo kwezindlela ezisetshenziswa wubuholi benkampani kokuthinta leso sisebenzi.
Ngokusho kukaKhoza le ndlela yokuphatha igcizelela izinto ezintathu ezibaluleke ngendlela eyisimanga ekuphathweni kwendawo yokusebenza. Lezo zinto uzibalula njengezinga eliphakeme lokucabanga, ulwazi oluphelele nolungasoleki ndawo ngomsebenzi owenziwayo embonini nokukwazi ukwehlisa umoya nokuzithiba ngezikhathi zokulingwa.
Konke lokhu akugcizelelayo uKhoza kuhambisana ngokuphelele nomoya wobuntu. Okokuqala, kusho ukuthi njengomholi uhlala ngaso sonke isikhathi uziqwashele izinkinga zabantu obaholayo. Kwawena njengomholi unomthwalo wokuhlala ngokuzihlola ukuthi usanyathela ngendlela yini. Kungumsebenzi wakho ukugcizelela ubuhlobo hhayi kwabakusebenzelayo nje kuphela kodwa ngisho emphakathini nasesizweni sonke imbala. Lokhu kubizwa ngoguquko oluphelele ekuziphatheni komuntu kanti lona luzimelele ekuthembekeni nasekubeni nesigqi kuwena njengomholi. Ukuze wena luqobo ugcine unesithunzi sobuntu, ngokusho kukaKhoza, lokho ukuzuza ngokuxhumana okuphelele nabanye abantu. Lokhu-ke kuthatha isikhathi, akuyona into yosuku olulodwa. Okubusa ngaphezu kwakho konke lokhu ukunakekela abanye abantu nokungabi wugombela kwesakhe. Lumisana nabanye abantu ungadli wedwa.
Umqondo ovezwa yile ncwadi owokuthi ubuholi obunokuvumelana ( attuned
leadership) busebenza kangcono lapho abaholi bexhumene ngokomoya nalabo abaholwayo. Kuma-Afrika umphakathi nomuntu ngayedwa ngeke wakuhlukanisa. Umuntu eyedwa akalona ibutho kodwa ibutho khona lapho liyamdinga umdidiyeli okungeke kwaba yibutho lonke. Ngalena kokuba yincwadi yezokubuholi nokuphatha iphinde inikeze amasu ngempilo jikelele. NgesiZulu sithi, “umuntu ngumuntu ngabantu”, kanti isilungu sona sithi wonke umuntu uyingxenye yezwekazi akasona isiqhingi. Leli yibhuku othi ungalifunda uzizwe unesibopho sokuphilisana kahle nabanye abantu hhayi emsebenzini nje kuphela kodwa nasemphakathini ozithola ukuwo. Igcizelela ukuthanda umakhelwano wakho njengoba uzithanda wena.
Okuncane engikuphawulile okungaba yinkinga ngencwadi ukuzwakala kukaKhoza ukuthi uhlobo ayelubhalela incwadi olwabantu abafunde bagogoda kwezamabhizinisi. Njengoba ngichazile ukuthi ekulifundeni kwami ibhuku ngilizwe liyibhayibheli lempilo yemihla ngemihla. Nokho nginawo umuzwa wokuthi yayingaba khona indlela yokuhlambulula izihlokwana ezithile. Lokhu kwakungenza ibhuku lifundeke futhi liqondakale kangcono kunoma wubani onesifiso sokwazi ekumumethe.