Izazelene kuMacron noMerkel ngozohola i-EU
KUKHULU ukungaboni ngasolinye phakathi kweFrance neGerrmany ngokumele avale isikhala sikaMnu uJean-Caude Juncker njengoMengameli we-Europen Union Commission njengoba ihlandla lakhe lifinyelela esiphethweni ngoMfumfu nonyaka.
Ukhetho lwe-Europen Union Parliament selufike lwedlula, ingcabha isisele kumazwe ayizikhondlakhondla anezwi elizwakalayo ekuqokweni kongathatha lesi sikhundla.
Ukuhlukana ngokumele aqokwe kugqame kakhulu phakathi kukaMengameli waseFrance uMnu u-Emmanuel Macron noShansela waseGermany uNkk u-Angela Merkel. Laba baholi bahlulekile ukufihla imizwa yabo ngokumele athathe lesi sikhundla ngesikhathi behlangene engqungqutheleni ebiseBrussels ekomkhulu leEuropen Union ngoLwesibili.
UNkk uMerkel ukusho ngokungahlonizi ukuthi yena siqu sakhe weseka uMnu uManfred Weber, weqembu elihambisana naye ePhalamende laseGermany okuyilo elibe phambili ngamavoti ePhalamende le-European Union.
Ngaphansi kohlelo olubizwa nge spitzenkandiat system olwasetshenziswa ngesikhathi kuqokwa uMengameli osephuma esikhundleni uJuncker, umholi iqembu lakhe elivotelwe kakhulu futhi kunguye oseqhulwini kulo nguyena obebekwa njengoMengameli weKhomishini.
Ukube lolu hlelo luyasetshenziswa nakulokhu uWeber bekunguyena obezoba uMengameli olandelayo ngaphandle kwamathandabuzo. Noma ngabe uvunwa yizimo, kodwa kukhona abashaya amakhala ngaye ngokuthi akanawo amava kwezepolitiki nakuhulumeni.
UMengameli uMacron nedlanzana lamalungu ePhalamende kwi-European Union bayaphikisana nalolu
hlelo ispitzenkandiat system. Abakuvezayo ukuthi akukho lapho i-Europen Union yake yazibophezela khona ngalo futhi lusasetshenziswe kanye kuphela ngokhetho lwangowezi-2014.
“Namhlanje angithandi ukuthi side sikhuluma ngamagama athile, kube khona amagama abantu azohlaselwa, ngicabanga ukuthi kumele sicabange kahle ngemiphumela yokhetho, ngalokho okuvezwe ngabantu be-European Union futhi uma sikhetha kumele sikhethe abantu abaqotho abazokwazi ukuthatha izinqumo ngokushesha,” kusho uMacron.
Abanye okubhekwe ukuthi bathathe lesi sikhundla uMnu uFrans Timmermans, uNkk uMargrethe Vestager noMnu uMichel Barnier. UMacron ukholwa ukuthi bobathathu laba baholi banekhono namava okuba ngomengameli.
Izihlalo ePhalamende leEuropean zingama-571, kanti umbango omkhulu wazo ubuseFrance phakathi kwalabo abeseka i-European Union nalabo abangahambisani nokuba khona kwayo. Zingama-74 izihlalo ezibangwayo kuleli Phalamende ngabaseFrance.
Kuyiwe kulolu khetho uMacron engenamandla njengoba iqembu eliphikisayo iRassemblement National Party eliholwa uMnu uMarine Le Pen belilingana neliholwa uMacron i-En Marche ngokocwaningo olwenziwe kodwa uLe Pen akabonwa nangokhalo embangweni wesikhundla sikaMengameli.
Okhethweni lwangowezi-2014, ayeyisithupha amaqembu avotelwa athola nezihlalo ePhalamende le-European Union, kodwa kulokhu izinto bezishintshile ngoba amaqembu abengenile ayi-9, kanti kugqame namaqembu amancane.
Phakathi kwamaqembu abesembangweni wezihlalo kukhona iLiberal Democrats, iGreens neChange UK. Lawa ngamanye amaqembu amasha azaleke ngokusungulwa kwe-Independent Group okungamalungu ePhalamende laseBritain axebuke kwiLabour Party neConservative Party.