Ikhohlisana ihlomile phakathi kwabalimi nabasebenzi emapulazini eNigeria
UYASHAQISA umbiko wenhlangano engenzi nzuzo ebhekele inhlalakahle yomphakathi emhlabeni iMercy Corps eveze ukuthi sekufe abantu abangaphezulu kwezi-7000 empini eqhubeka buthule phakathi kwabalimi abangabanikazi bamapulazi nabasebenzi babo kule minyaka emihlanu edlule eNigeria.
Ngokombiko iNigeria ilahlekelwa izigidigidi ezili-$13 ngonyaka emizamweni yokuqeda lokhu kungaboni ngasolinye okunomthelela emnothweni wezwe nakwezolimo. Into okuthiwa isusa lezi zidubedube umbango wamanzi nomhlaba esifundeni iMiddle Belt, eBenue naseNasarawa. Le nhlangano ithi phambilini umphakathi ubukwazi ukubambisana ngokuthi unikezelane ngamanzi nezinye izinto ezingamagugu kulesi sifunda kodwa ngenxa yokuguquguquka kwesimo sezulu nokuntuleka komhlaba isimo siya ngokuba sibi.
Le mpi kuthiwa isithathe elinye igxathu njengoba isikapakele nasempini yeminyaka eNigeria ethinta inkolo phakathi kwamaMuslim namaKhrestu.
Ngokocwaningo olwenziwe iMercy Corps iningi labasebenzi basemapulazini lilandela inkolo yamaMuslim kanti abanikazi bamapulazi nabalimi bangamaKhrestu.Le nhlangano ithi akukho engakwenzile emizamweni yayo yokuqeda lesi sihlava, kanti muva nje inxuse amakhosi nabaholi bomphakathi ukuba bangenelele.
Abantu baseNigeria bathi ukuqubuka kwempi kufana nokuthela usawoti esilondeni ngoba basakhungethwe izigameko zokuhlasela kweBoko Haram.
Umphakathi usola uHulumeni namaphoyisa ngokudembesela ekulweni nobugebengu okwenza iBoko Haram ibe namandla ezingxenyeni ezithile zezwe.
Muva nje umphakathi uhlanganile wasungula amaqembu oqonda aqapha isimo esebenzisana namaphoyisa ngoba ethi ukuphepha kwawo kubalulekile, ngakho ukudembesela kwamaphoyisa yikhona okwenza iBoko Haram idlondlobale ngamandla.
Bangaphezulu kwezi-2 million abantu baseNigeria asebeshiyile kuleli lizwe, kwathi abangama-20 000 babulawa yiBoko Haram ezingxenyeni eziseningizimu yempumalanga nezwe. Lesi yisimo esibi kakhulu kwelaseNigeria ngoba akunampi eliwa obala.