Yashonaphi imali yentuthuko yangakithi?
NGITHI angizwakalise ukubonga ngodaba olwaphuma kwelakho olwalu sihloko sithi; Ngenelela Ngqongqoshe wezolimo, kwaMakhukhula eMpangisweni.
Ake ngisike kwelijikayo kwelakho mayelana nokwakheka koMkhandlu weNkosi yethu, phansi kwesihloko esithi; Khuzeka Mqashwa. Muhle umuntu okhuzekayo uma kuthiwa khuzeka, hhayi ongezwa ebe ecekela phansi igama likaHulumeni obusayo kanye neminyango leyo emsebenzelayo, kube sengathi kwayona imenzela phansi uHulumeni. Sonke siqashiwe la sikhona iNkosi iqashiwe, iNduna, izikhulu emsebenzini, asikho isidingo sokunga hloniphi amalungelo abanye obaphetheyo nawesizwenje.
Sabonga Hulumeni ufike kithina mphakathi uzothi, asikhulume sibhale zonke izinkinga esinazo ezweni lethu selokhu sakhululeka. Sakubhalela-ke, njengalo lolu daba oluphatha amatayitela isizwe esingawatholanga, umhlaba walinywa umuntu oyedwa wadla konke, cha siyabonga ukuzwa ukuthi usezinhlelweni Hulumeni zokusibuyisela amatayitela ethu athathwa yiNkosi.
Maqondana nodaba lwezi poki zeziNduna kwaSokoyi, Makhukhula ezidla imali kaHulumeni zingaphethe zigodi, siyabonga nokuzwa ukuthi lolo daba ulusukumele izwe lonke, sizwile ngomabhalane esibikela sisoLundi. Kuhle ziboshwe izigebengu ezihlangene namaKhosi angethembekile ziboshwe ngokushesha zidla intela yesizwe ngephutha. Sahlabeka umxhwele siziNduna ezethembekile kade nifikile eMpangisweni nizofuna amafayela kwiziNduna. Inhle lenhleleko.
Vele, kuhle iNduna ikhethwe umphakathi owazi igalelo layo endaweni, leyo Nduna iyinhliziyo yabantu. Ngisho ibayala bayayizwa, ibadla izinhlawulo ngamacala bayavuma, ngoba abajijimezwanga ngayo, ihlala nabo. Sikhathele ziNduna esijijimezwa ngazo, okubi kakhulu azihlali ezinye nathi, zihlala emalokishini, kodwa ziyahola ngoba zisiphethe. Kanti indaba yefayela leNduna elishoyo ukuthi ingubani, ikhethwe umphakathi, isigodi sayo sithini, amaminithi emihlangano namacala athini, impela leyo Nduna ukusebenza kwayo noCogta, kuba okungcwele nokungena msindo.
Qhubeka Hulumeni, sihambele eziNkantolo lapha, uhlole namabhuku ezimali, ayeke uMabhalane ukukhala ngesandla esikhulu esivele sisavune-nje imali yesizwe siyidle. Ekupheleni kwenyanga uMabhalane esethi uyohola, athi uHulumeni uzoholani, ngoba iNkosi yakho ayiyilethi intela yesizwe sayo? Nesizwe ngapha sithi, sokhokha intela ngani, ngoba umhlaba namatayitela ethu kwathathwa yiNkosi, sokhokhela ini manje? Ayizi thelele yona, ngoba idla yodwa vele!
Nehhovisi lezolimo kungathi lihambisana neNkosi konke kuhle-nje, kanti isizwe siyalimala sigetshengiwe. Wenza kahle kakhulu Hulumeni, usihlole
eMkhandlwini weNkosi, uhambele izigodi uzwe uvo lomphakathi, ungagcini eNkosini kuphela.
INkosi yasibiza, yathi angini thayimise ziNduna, salalela. Yathi, iNduna ezaziyo ukuthi ayikho emthethweni, ayisheshe iyokwesula kuMabhalane, ingathembeli kuyo (iNkosi), nayo iqashiwe-nje iyoyiphika. Samangala, kanti vele phela baningi obhululu bayo abazipoki abangaphethe zigodi, ababekwe ngenkani.
Ubaba-nje uMbatha omdala endaweni nowakhethwa umphakathi, waxoshwa, imali yakhe idliwa iNduna engaziwa umphakathi. Uxhashazwe kaningi-ke yena, iTrust yeNkosi ibiphinde ilime indawo yomphakathi ngenkani, angathi vu. Enganikwa nasenti elimnyama lodwa leli, ingani ngelinye ilanga yamthelekela ngezinkabi zayo.
Asazi-ke, nce kuhlungwa amakhoba, uthole uMholi kunguyena oqwashisa izigebengu athi, azibaleke, yini leyo? Kosizani phela, ngoba sebevele wabafaka bakhona kuzi zindalwazi (computers), kuyazeka baqala nini behola ngokuncola, imali yezintela zesizwe, ukubaleka nokunga baleki akusa sizi! Hulumeni, sisukumele-bo, sifile thina ubugebengu eMpangisweni busuka phezulu ebuholini, kudlalwa ngabazali bethu kuthiwa abafundile.
Amasela ezinkomo, izimbuzi akithi, ubugebengu bokudla umhlaba kukithi, hlola ama ambulensi angena eclinic,ukuntshonthwa kwamakhebuli, safa zidakamizwa nezikhali, ukucekela phansi intuthuko kagesi, umgwaqo akukho kwaCommunity Services, njalo kufanele sigibele siye koNongoma, uLundi naseVryheid siyothenga, zindleko! Asazi izimali zentuthuko yendawo yakithi zashona kumuphi umgodi lo ongagcwalanga namanje? Siphenyele Hulumeni-bo, sifile ukhwantalala lokubukela amapulazi emila izihlahla sesatshiswa ngezinkabi! Asikwazi nakwenzani, siboshiwe-bo! Ngikhuluma-nje, thina ziNduna sesitshelwe nguMabhalane, ukuthi sizokhipha u-R600-00 iNduna iyinye emholweni wethu, ukuze kukhokhwe isikhwama sentela esifunwa uHulumeni, kusethusile lokhu! Ingani akuthethwa macala kule Nkantolo, nawe Nduna ozamayo esigodini ukukwenza, bayasuka baye eNkosini beyodiza kuphele kanjalo-ke, bese uzwa kuthiwa; lokhu okuziNduna okuzenza ukuthi kusile, akufuneki la. Asikwazi nokufuna izintela zokumitha kwamantombazane emakhaya, zamasimu kanye nokunye, abantu bawotha ubomvu ngamatayitela abo! Kwasimangaza-ke, uma leli cala lesikhwama sezintela zesizwe sekufanele lithwale yithina ziNduna ngoba nakhu siyahola. Sididekile-nje, asazi noma yiqiniso yini ukuthi kusho uMnyango kahulumeni, noma kusuka kuMabhalane yini, naye uyashayeka angaholi?
Kumanje ngiyavumelana nowayekhathazekile ebhale ngokuthi, sesilakhile ikomidi lomphakathi eMakhukhula, isinengiso seCommunity Trust sichithiwe abakwaNyandeni bafuna amatayitela abo. Inkinga yami engiyibonayo manje, ikomidi alibe namehlo okubona ingozi phela engavimba ixake uHulumeni kusasa eselethe usizo kulomphakathi.
Kulamapuzi asebekhiphe okade edla nge Trust kuwo, bayaqaphela yini ukuthi, emmva kokuphuma ephepheni kodaba, ugesi wabe sewuvulelwa imboyimboyi-nje imini nobusuku? Mina engisola ukuthi, abamelene nokubuyiswa komhlaba wabo, benza unya manje, lokuthi mhla sebefuna ukulima bezosizwa uHulumeni, badibane nesikweletu esinga sukumi phansi, kuhle leli komidi lilu sukumele loludaba lukagesi okhanya eplazini Noport no. 1 & 2, kwaSaphikho kward no. 4 eNduneni uMbatha.
Ihhovisi lezolimo eVryheid eBaqulusini, alinga khombisi ukuchema nomuntu olimaza isizwe ebambe amatayitela aso, ngoba nakhu kuthiwa asifundile, kudlalwa ngobaba bethu. Bahlushwa amaBhunu amhlophe, namanje sesithi sikhululekile, obaba sebehlushwa amaBhunu amnyama njengabo, yini leyo sizwe sikaPhunga noMageba, obani ubugovu? Nezinkabi ezithunywayo, azohluza phela ukuthi zithunywa entweni enomqondo yini, hhayi kudlalwe ngabantu ngomhlaba wabo.
Okuzoshaya leli Komidi lika ward 4 futhi, alikho iKhansela eliqavileyo elithatha izimfuno zale miphakathi yalamapulazi, njengoba kukhanya ugesi ka Eskom-nje, akekho obuzayo ukuthi ukhanyelani kungase tshenzwa lutho? Asazi, ukuthi iLocal Government eBaqulusini Vryheid, ithini bakwethu.
Sondela Hulumeni kubantu eMpangisweni nakhu obaba bethu, bengu kudla bezigebengubo! Ihhovisi lezolimo, alize phela lizo siza amakomidi anozihlalo bawo, ukusiza emaplazini okumele asetshenzwe. Angithokoze ngifisela uHulumeni wethu ukuphatha okuhle okuneqiniso phakathi, ngiyabonga.