Kuyoncomeka okweDowns, iChiefs ayibhukule
EMINYAKENI edlule abathandi bakanobhuthuzwayo kuleli bebenezikhalo zokuthi iMamelodi Sundowns, ibulala ikusasa labadlali njengoba isizini nesizini ihlezi ithenga okhilimu babadlali.
Isizini nesizini leli qembu lihlezi likhipha itshe lemali lithenga abadlali abasuke begqamile emaqenjini abo ngesizini esuke yedlule.
Ekuqaleni kwesizini edlule leli qembu elicijwa uPitso Mosimane lisayinise uLebohang Maboe obeqhamuka kuMaritzurg United, lo mdlali ufike wangena wathi khaxa kuleli qembu njengoba elisizile lakwazi ukuvikela isicoco salo se-Absa Premiership lafinyelela nakumasemi-final eCAF Champions League.
Muva nje leli qembu lasePitoli lizojoyinwa uSphesihle “Mbesuma” Ndlovu naye ogijima kuMaritburg United, liqede ngakho konke nalo mdlali kule sizini esanda kusongwa.
Abanye abadlali abaseke basusa ukukhuluma besayiniswa ileli qembu eliphethwe uPatric Motsepe, uSibusiso Vilakazi eyamthenga ngezigidi ezili-10 esuka kuBidvest Wits, uJeremy Brockie eqhamuka kuSupersport United eyathenga ngezigidi ezili-13.
Muva nje leli qembu ngikubona lokhu kwenza kayo kuyisebenzele kkhulu ukuthi ikhiphe imali ithenge abadlali abasezingeni. Ithathe iligi kulandelana, yanqoba isicoco seCAF Champions League.
Leli qembu sikhuluma nje liyahlonishwa i-Afrika yonkana ukuthi isizini nesizini liba ingxenye yomqhudelwano omkhulu iCAF Champions
League.
Okwenza ngibhale lolu Neku ukugxeka iqembu elibalwa namakhulu kuleli iKaizer Chiefs.
IChiefs muva nje iyinhlekisa njengoba ihlulekile ukubalwa namaqembu ayi-8 aphezulu ku-Absa Premiership, phezu kwakho konke ihlulwe ukunqoba umdlalo wamanqamu eNedbank Cup ihlulwa iqembu eligijima kuNational First Division (NFD) iTS Galaxy ngegoli eliloda eqandeni.
Isizathu engibona esenza leli qembu laseNaturena lingenzi kahle yingoba ligxile kwamanye amabhizinisi, bese lishaya indiva unobhutshuwayo. Kodwa angeke sakubalekela ukusaba nokukhipha imali kwezikhulu zaleli qembu ekuthengeni abadlali.
Uma kuvulwa iwindi njalo leli qembu uma kubhekeke ukuthi lisayinise abadlali, livele limemezele abadlali abasuke benza ezibukwayo emaqenjini amancane amanye awo iChicken Inn yaseZimbabwe.
Ngiyakuqonda ukuthi ngesizini edlule ikwazile ukuthole uKhama Billiat, kodwa ilinde waze waphelelwa inkontileka neSundowns yase imuthatha bhusende.
Uma iChiefs esekuphele amasizini amane ingayazi inkomishi, ifuna ukuthi ibuyise isithunzi sayo kumele ikhiphe imali ithungathe abadlali.
Ngokwami kumele iqale ixoshe umqeqeshi wayo u-uErnest Middendorp, bese ilandela ngabadlali.
Baningi abadlali abangafanelwe ukuthi bagqoke ijezi laleli qembu, iningi labo abathegwa kodwa yabathola mahhala.
Abadlali okumelele bahambe uMario Booysen, uTeenage Hadebe, uWillard Katsande, uRamahlwe Mphahlele, u-Eric Matoho bonke laba badlali ngicabanga ukuthi sebephelelwe isikhathi. Omunye umdlali edinga ukuthi imubolekise khani ezokhula uRyan Moon, aye eqenjni elifana neSupersport United okanye iBidvest Wits.
UGeorge Maluleka uyena okhombisayo ukuthi esiswini usengakwazi ukuqinisa leli qembu njengoba uTinashe Nengomashe enza eminyakeni edlule. Naye (uMaluleka) udinga ukulekelwa nabadlali abafana noSiphesihle Ntshangase ongakalitholi ithuba kuleli qembu, uHendrik “Pule” Ekstien leli qembu elisanda kumkhulula.
Okunye okuhle eminyakeni edlule obekwenziwa ileli qembu ukunyusela abadlali abancane eqenjini elikhulu, lokho isaqhubeka nakho njengoba inyuse uHappy Mashiane, uNkosingiphile Ngcobo, uBruce Bvuma noSiphosethu Ntiya-Ntiya.
Ngesizini yangowezi-2019/20 kumele ngempela ikhombise ukulambela izinkomishi.
Ukukhipha imali uthenge abadlali kuyinto esiza kakhulu ngoba nasemaqenjini aphesheya kwezilwandle anqoba kanjalo, amanye awo iLiverpool FC neParis-Saint German (PSG).
ILiverpool ikhiphe izindodla zezimali yathenga uMohamed Salah ofike walima indima enkulu okuthi leli qembu lingene emdlalweni wamanqamu e-UEFA Champios League kulandelana. IPSG yona akubuzwa ukuthi kukhonya yona eFrance, inabadlali abanamagama aphezulu okunguNeymar Jnr, uKylan Mbappe nabanye abaningi.
Kube iseGermany baningi abebegxeka iBayern Munich ukuthi umdlali nomdlali ogqamayo kuligi yakho iBundesliga leli qembu liyamthenga kwala nanoma ubiza malini.
Abanye balabo badlali uRobert Lewandoski lo mdlali kumasizini cishe amane uyena osebe ngumdlali osevalele phakathi amagoli amaningi kule ligi.