I-NHI IZOBA ISIXAZULULO KWEZOKWELASHWA
Ukufa kwabantu zinsuku zaphuma ngenxa yokungalutholi usizo lwezempilo ngezinye izinto ezizophendulwa yilolu hlelo
EMASONTWENI amabili edlule uNgqongqoshe Wezempilo kuZwelonke uDkt uZweli Mkhize ubeke ezithebeni zomphakathi uMthethosivivinywa ongohlelo lwezokwelapha iNational Health Insurance (NHI) Bill ocaba indlela ngokufinyelela kosizo lwezempilo nokwelashwa kubona bonke abantu baseNingizimu Afrika ngokungakhathaleki ukuthi isimo sabo somnotho simi kanjani, benza misebenzi mini nokuthi sinjani isimo sabo senhlalo.
Ngaphansi koMthethosisekelo waseNingizimu Afrika usizo lokwelashwa luyilungelo lawo wonke umuntu. Ngaphansi kwaleli lungelo akuncikile ekutheni umuntu ucebe kangakanani nokuthi uhlala kuphi. Ukusebenza kwalolu hlelo ezweni lonke kubhekeke ukuba kuqale ngonyaka wezi-2026 naphezu kokuba kukukhulu ukungaboni ngasolinye ngalo.
Kukhona uhlangothi olubeka umbono wokuthi iNHI izoshabalalisa uhlelo lwama medical aids okuzoholela ekupheleni kwemisebenzi ngoba ezinye zezinkampani zizophoqeleka ukuvala nokudiliza abasebenzi.
Emazweni asathuthuka, iNingizimu Afrika ibalwa nambalwa angenalo uhlelo lwezokwelapha olubhekelela bonke abantu bezwe.
Kwamanye amazwe lolu hlelo lwaqala ukusebenza ngesikhathi iminotho yawo iphansi kakhulu, kodwa namuhla seludlondlobele.
Nakuleli kumele engabe i-NHI kudala yaqala ukusebenza kodwa obenguNgqongqoshe Wezempilo phambilini uDkt u-Aaron Motsoaledi ubebika imbuba abike ibuzi ekhala ngokuthi izinga lomnotho wakuleli liphansi kakhulu.
Enye indlela yokukhulisa umnotho wezwe nokuwuphucula, ukulungisa uhlelo lwezempilo nokwelashwa ukuze lufinyelele kubona bonke abantu. Kungenzeka yini ukuthi kube yisona sizathu lesi esenze uMengameli uCyril Ramaphosa asuse uMotsoaledi kwezempilo wabuyisela uDkt uMkhize.
Amava kaMkhize kulo Mnyango abonakale zisuka njengoba esekumemezele ukuthi lolu hlelo luzoqala nini ukusebenza ngokugcwele ezweni lonke.
Kungephikwe ukuthi zikhona futhi ziningi izinselelo ezibhekene neNingizimu Afrika kwezomnotho, kodwa kusemahlombe kahulumeni ukuba ahlabele phambili nalolu hlelo ngokwehlisa izindleko zezokwelapha.
Ngesikhathi iNational Health Insurance yethulwa okokuqala ngowezi-2010 kwavela ukuthi uHulumeni wayezodinga imali engama-R256 billion. Le mali incane uma iqhathaniswa nekhokhwa izinkampani zama medical aids engama-R200 billion njengengxenye eli-15% yabantu abakwazi ukukhokhela ama medical aids.
NgokukaDkt Mkhize uma kuhlanganiswa lezi zinhlaka zombili kungasizakala abantu abaningi ngokulinganayo kwehliswe nezindleko. Ngenxa yohlelo lwezempilo oluncono uma kuqhathaniswa namanye
amazwe ase-Afrika, elakuleli lizithola lingaphansi kwengcindezi yokusabalalisa ezempilo ngenxa yesibalo esikhulu sabantu abaphuma emazweni angaphandle abakuleli.
Ngokwezibalo zakamuva esifundazweni iGauteng, ngosuku isibhedlela iCharlotte Maxeke Academic kuthiwa sisebenzisa imali eli-R4 500 ngenxa yabantu bokufika abalashwa kuso. Esibhedlela iChris Hani Baragwanath ingxenye yeziguli ezili-5% ngosuku kuthiwa kusuke kungabokufika iningi labo okungabesifazane abasuke bezobeletha. Ngesikhathi ikomidi loMnyango
Ukungashiywa ngaphandle kwabokufika kuyosiza kakhulu kulolu hlelo nasekweluseni izifo ezithathelanayo njengohudo, i-ebola ezinye zazo ezidla lubi emazweni angaphandle
Wezempilo kuzwelonke lihambele izingxenye ezehlukene esifundazweni KwaZulu-Natal lathola ukuthi esibhedlela i-Edendale eMgungundlovu sinyuka mihla namalanga isibalo sabangaphandle abelashwa khona.
Kwaba ngesifanayo nasesibhedlela i-Addington eThekwini esisemgwaqeni uMahatma Gandhi ePhoyinti okuyindawo egcwele kakhulu abangabokudabuka eNigeria.
UDkt uMkhize uthi lolu hlelo angeke lukhethe iphela emasini, nabokufika bazohlomula kulo. Abantu abaningi abakuleli ngabasuka emazweni angaphansi kweSouth African Development Community, abenza isibalo esili-4%.
Ukukhuluma kukaDkt uMkhize ngokungashiywa ngaphandle kwabokufika kuyisinyathelo esihle empumelelweni yalolu hlelo, kodwa kuyoba kuhle ukuthi lo myalezo ufinyelele kuzona zonke izinhlaka.
Ukungashiywa ngaphandle kwabokufika kuyosiza kakhulu kulolu hlelo nasekweluseni izifo ezithathelanayo njengohudo, i-ebola ezinye zazo ezidla lubi emazweni angaphandle.
EMozambique namanje uhulumeni wakhona usalwa nokunqanda ukubhebhetheka kohudo kulandela ukuhlasela kwesishingishane ngasekuqaleni konyaka.
Baningi abantu baseMozambique abangena bephuma eNingizimu Afrika okungenza kube lula ukusabalala kwalesi sifo. Ukwehla kwenyuka kwabantu befuna impilo engcono emazweni ahlukene kwenza kube nzima ukugcina imininingwane yabo yezempilo okungenye yezinselelo ezizobhekana nalolu hlelo.
Ngonyaka wezi-2010 uHulumeni waseSri Lanka ngokubona ukuthi siyanda isibalo sabantu bangaphandle abagcwala khona waphakamisa ukuthi kwenziwe ucwaningo ngokuthi yini engenziwa uhulumeni ukufaka abangaphandle ohlelweni lwezokwelashwa kodwa lokho kungadli kakhulu ephaketheni.
Ngalolu hlelo kwagcina kuzaleke iNational Migration Health Policy neNational Action Plan okumanje uhlelo lwezempilo eSri Lanka luhlanganisa wonke umuntu.