Impatho isemqoka ekusimamiseni ibhizinisi
ABATHENGI banamandla okumisa nokuwisa ibhizinisi. Umthengi unelungelo lokuzikhethela lapho ezosebenzisa khona imali yakhe. Ukubona umuntu engena esitolo sakho ezothenga kwenza umninisitolo amamatheke ngoba kusho ukuthi iyangena imali. Abaningi bathi umuntu olethe imali kufanele aphathwe njengenkosi ngoba usuke elethe impilo yebhizinisi. Wena wenzenjani uma bekuthatha kancane?
Enye yezinto ezibalulwa njengembangela yokwehla kwezinga labathengi yindlela abaphatheka ngayo uma bethenga. Umbiko owakhishwa yiNew Voice Media ngonyaka wezi-2018 uveza ukuthi amabhizinisi alahlekelwa yimali ebalelwa ezigidigidini ezingama-$75 ngonyaka. Umbiko uveza ukuthi amabhizinisi aqavile futhi aziwayo ayehluleka ukugcina abathengi bengayi kwezinye izitolo. Abathengi ababalelwa kumaphesenti angama- 67 bayagcogcoma, ngenxa zokuthi bafuna indawo lapho bezozizwa behlonishwa khona. Lo mbiko ukhombisa ukwenyuka kwezibalo ngamaphesenti angama-37 kusukela embikweni owedlule.
Lokhu kuveza isithombe esingesihle ngeningi labasebenzi. Uma kukhulunywa ngendlela yokuphatha abathengi iminwe ikhomba kakhulu kubantu abaqashelwe ukwenza lowo msebenzi. Umqondo womuntu ozokhokha umtshela ukuthi imali yakhe ibalulekile kunomkhiqizo, ngakho-ke unelungelo lokuzikhethela ukuthi uzokhokhela bani. Uma bebaningi abakhiqiza imikhiqizo efanayo umuntu ophethe imali uba nezinto asuke ezilindele kulowo omdayiselayo.
Okokuqala umthengi ufuna ukubona ukuthi lowo odayisayo unakho yini ukujabula uma embona esondela. Ukubingelelwa kusho into enkulu kubathengi, ngoba kubenza bazizwe bamukelekile. Okwesibili abathengi bavamise ukuba nemibuzo. Uma imikhiqizo ingabhaliwe inani futhi kungekho nomuntu ozobakhombisa ukuthi umkhiqizo ubiza malini, iningi ligcina lingasawethembi lowo mkhiqizo, lingabe lisamethemba nalowo odayisayo. Kunabasebenzi abangenayo inhlonipho komunye umuntu, abamthatha njengesinxibi umuntu ozothenga into angenayo. Umthengi uyashesha ukuzwela uma edelelwa, lokho kumenze ahambe angabe esabheka emuva. Umkhiqizo umelwe ukuba sezingeni elihle, ungabi odlulelwe yisikhathi noma osuwonakele.
Enye yezimpunyela esihlonihlwayo kwezamabhizinisi, uMnu uWarren Buffett uthi kuthatha iminyaka engamashumi amabili ukuzakhela igama elihle elethenjwayo, kanti kuthatha imizuzu engeqile kwemihlanu ukubulala igama, banxaphe abantu uma belizwa libizwa.
Zidlana imilala, kukwamazikhethele kulo mhlaba. Yileso naleso sitolo sinendlela yaso esikhombisa ngayo ukunakekela amakhasimende aso. Kwenye yamasuphamakethe umthengi obuza umkhiqizo uthathwa aze ayobekwa lapho umkhiqizo ubekwe khona. Lokhu kuyaye kwenze bobabili babone uma umkhiqizo sewuphelile. Kwamaningi amasuphamakethe bakukhombisa ngesandla noma bakhulume ngomlomo umthengi azule afifiyele agcine edikibele kwesinye isikhathi ajokole.
Kuyadingeka umnikazi bhizinisi abe seduze namakhasimende akhe, kwesinye isikhathi azibambele mathupha. Kwamanye amabhizinisi umnini webhizinisi isimo asimvumeli ukuba abonane ngqo nabathengi. Kuleso simo kumele kuqiniswe kakhulu emenejeni nokufundisa abasebenzi ubumqoka bokwenza umsebenzi.
Abasebenzi abasebenza isitokwe bavamise ukuba nempatho enhle kubathengi ngoba bayazi ukuthi awukho umsebenzi ngaphandle kwempatho enhle. Laba abasebenza umshonisalanga bayazi ukuthi ubuhlobo obuhle nabathengi abubanikezi lutho olungako, abaqikekeli ukuthi babaphatha kahle abathengi. Noma lingashona kungene abambalwa esitolo umsebenzi uzokhangeza imali yakhe kumqashi.
Uma sikhuluma ngenani labantu abaphelelwa wumsebenzi, abanye babo kwavalwa izinkampani ngoba abathengi bengasangeni esitolo ngobuningi.
Kubalulekile ukuthi abasebenzi bafunde futhi bafundiswe ukuthi imisebenzi namaholo kuncike kakhulu ebukhoneni bamakhasimende.