OweSADC ungayinkundla yokudingida olwabokufika
IZIGA zakamuva eziqubuke ngoLwesithathu emalokishini aseSoweto eGoli zokuhlaselwa kwamabhizinisi abokufika umphakathi uzitapela impahla ziwubufakazi bokuthi akusekho ukuluziba udaba lwabokufika ezweni ngoba sekucacile ukuthi uma lungasukunyelwa luzogcina lube nomthelela ongemuhle. Kuhlaselwa izitolo zabokufika nje, akukapheli nesikhathi esingakanani abokufika enkabeni yeGoli behlasele amaphoyisa ngamatshe nangamabhomu emuva kokuba egasele kungazelelwe ashaqa impahla yabo okuthiwa ingene kuleli ngokungemthetho. Abantu abangene ezitolo zabokufika bazitapela impahla balibeke ngembaba elokuthi abakwenzayo kuwukuziphindiselela ekushayweni kwamaphoyisa futhi bakhombisa ukuthi bakhathazekile ngokungahlonishwa kwemithetho yezwe.
Njengoba izolo kuqale umhlangano wabaholi beSouthern African Development Community (SADC) eDar es-Salaam eTanzania lapho elakuleli limelwe uMengameli uCyril Ramaphosa kungakuhle ukuthi lolu daba aluphakase kozakwabo ukuze kuqhanyukwe nesu lokusebenzisana nokwenza isiqiniseko sokuthi yilowo nalowo osezweni okungelona elakhe ukhona ngokusemthethweni.
Lo mhlangano uyithuba elikahle kubaholi lokunkankanya zonke ezithinta iSifunda ngoba olwabokufika lungagcina seluphazamise nokuhwebelana lwaqeda nobuhlobo phakathi kwamazwe.
Okuhle ngaleli hlandla lo mhlangano weSADC osekungowama-39 ngukuthi phakathi kwezinto okuzokhulunywa ngazo lukhona udaba oluthinta ukuxhumana kwamazwe. UMengameli uRamaphosa njengoseke wasibamba isikhundla sikaSihlalo weSADC izwi lakhe lizozwakala kangcono uma eyiphakamisa eyabokufika ngoba phambilini useke wathwala kanzima kwezinye izithangami zabaholi base-Afrika ngenxa yokungafuni ukuphumela obala ngesimo esiqhubeka kuleli ngokuphathwa kwabokufika.
ITanzania igcine ukubamba lo mhlangano eminyakeni eli-16 edlule ngesikhathi izwe lisaphethwe uMengameli uBenjamin Mkapa. Inkulumo kaMengameli waseTanzania uMnu uJohn Magufuli kungenzeka ihambe ibanga elide ekuphumeni nesixazululo ngabokufika emazweni njengoba ethe kunesidingo esikhulu sokuqinisa ubuhlobo phakathi kwamazwe kwenziwe nesiqiniseko sokuthi bonke abantu izincwadi zabo zokuphuma bangene emazweni zisemthethweni ukuze kugwenywe ukungena kwezimpahla eziphuma emazweni aphesheya ngokungemthetho ziqedelwe abantu bakuSADC imisebenzi.
Le nkulumo iyizinkomba zokuthi eyabokufika abangena emazweni ngokungemthetho, akuyona nje inkinga yeNingizimu Afrika kuphela, kepha akhona namanye amazwe ezwenikazi asesimweni esifanayo. Uma kungaphela umqondo wokuthi lena yimpi esuke ibhekiswe kubantu ngoba becwasa lingatholakala ikhambi elingunaphakade sibe munye singama-Afrika.