Usuya ngokwejwayeleka ngesici uKhongolose wansondo
KWAKE kwakhona isikhathi noma ngithi inkolelo eyabe ithi iqembu elidala kunawo wonke ayelwela inkululeko eNingizimu Afrika naseAfrika i-African National Congress (ANC) lingelehlukile kwamanye. Lokhu kwabe kwakhiwe wubufakazi kanye nezifiso zalabo ababesho lokhu. Izifiso zabe zisekutheni ubuholi bale nhlangano kanjalo namalungu ayo ayebe nethuba lokuhlala emazweni ehlukene e-Afrika ngezikhathi zombangazwe.
La mazwe ayesanda kuthola inkululeko yezepolitiki nokwenza kwakholakala ukuthi amalungu e-ANC ayekuwo azothola izifundo ezimqoka ngokuphatha uma sekufike esabo isikhathi eNingizimu Afrika.
Lokhu kwakholakala kakhulu uma leli lizwe ngaphansi kobuholi be-ANC likwazi ukuqinisekisa ukuthi akukho ukuphalala kwegazi nokuphindisela emuva nje kokuthola inkululeko. Kule minyaka engama-25 ayikaze ibe khona impi engahlonzwa ngokuthi ngeyomkhaya njengoba kuke kubikwe emazweni ase-Afrika. Lapha kithi omengameli bangena belandelana kuze kube yimanje lingakaze lichitheke igazi. Okungejwayelekile ngeNingizimu Afrika wukuthi izizukulwane zabacindezeli zidla lugqoko lunye nabacindezelwa njengoba kubonakala kwamanye amabhizinisi. Konke lokhu kwakhe isithombe esithi nakanjani leli qembu nalo hulumeni oholwa yilo kwehlukile.
Nokho izigemegeme zakamuva nezenzeka ziphindelela sezenze umbono weqembu nobuholi obuqonde mpo kwashabalala okwamazolo ebona ilanga. Imibiko yenkohlakalo eyeyamaniswa nabaholi namanye amalungu ale hlangano, izingaxabano nokuklolodelana kwangaphakathi kushabalalisa umlando omude nomuhle we-ANC. Ngeshwa lezi zigemegeme kanye nezinhloso zenkohlakalo okubhekiswe ezikhulwini zeqembu noHulumeni kwenza leli qembu ekugcineni lifane namanye amaqembu akhona e-Afrika.
NakuKhongolose njengoba kwenzeka kwamanye amazwe sekukhona inkolelo yokuthi leli qembu libolile, liyeba futhi alizigcini izethembiso zokhetho.
Lesi yisici esilukhuni ukukhucululeka ngoba e-Afrika yiso esiwise abaholi abaningi saze sehlukanisa namaqembu phakathi. Ngalokhu nje akasekho ongasukuma athi uKhongolse umsulwa futhi ungaba ngumhlahlandlela womphakathi nezwekazi i-Afrika.
Ngamafuphi ukwenza kwabaholi balo nalo uqobo iqembu kwenza lejwayeleke ngokubi. Kamuva nje selihlobe ngehlazo okwembuzi.