Udlame nobugebengu ekutelekeni nasekubhikisheni
KUYISHWA elidabukisayo ukuthi sekuze kwabukeka njengosiko olusemthethweni ukuthi uma kunesiteleka nemibhikisho, kufanele kube nodlame nobugebengu obungaqondisiwe kumqashi kuphela kodwa nasemiphakathini engahlangene nengxabano eholele kuleso siteleka. Usungaze ucabange ukuthi ilungelo lokuteleka nokubhikisha liyimvume yokwenza izenzo zodlame nezobugebengu kube kungenjalo. Lapha ezweni lakithi seziziningi iziteleka namacala okumayelana nodlame nobugebengu okwenziwa yilabo abasebenzisa ilungelo lokuteleka nokubhikisha elilawulwa nguMthethosisekelo eSigabeni 17.
Siqwashisa ngokuthi udlame nobugebengu ekutelekeni nasemibhikishweni akwephuli imithetho nje kuphela, kodwa kwephuca abenzi bakho ilungelo lokuteleka nokubhikisha okuyilungelo elivikelwe nguMthethosisekelo. Zisho kanjalo izinkantolo ngezindlela ezahlukene kuwona wonke amacala aphathelene nodlame olunezenzo zobugebengu ezitelekeni nasemibhikishweni. Sikhuluma ngalolu daba sibheka izinqumo zeNkantolo Yezabasebenzi mayelana nalesi senzo.
ESigabeni 17, uMthethosisekelo uthi; “Wonke umuntu unelungelo lokuhlangana nabanye ngokuthula futhi engahlomile ukuze abhikishe aqhakambise ukungagculiseki kwakhe, ethule uhla lwezikhalo”. Leli lungelo liyacaciswa lapha futhi kalidinge kutolikwa. Okubalulekile ukuthula nokungahlomi uma kutelekwa noma kubhikishwa.
UMthethosisekelo uyaqhubeka eSigabeni 36 uthi; “La malungelo ayisisekelo, angeke aphucwe muntu noma ancishiswe
ngaphandle komthetho osebenza kuwona wonke umuntu, nawo uma unobulungiswa emphakathini ovulekile wentando yeningi futhi ube uqinisekisa isithunzi soluntu, ukulingana nenkululeko kubhekelwa zonke izimo”.
UMthetho Wezobudlelwano Kwezokuqhashwa uNombolo 66 we-1995 uyalicacisa ulilawule ilungelo lokuteleka nelokubhikisha. Lo Mthetho uhambisana futhi ufezekisa zona lezi zigaba zoMthethosisekelo esikhuluma ngazo ngenhla. Kafuphi kusuka eSigabeni 64 kuya eSigabeni 69, uMthetho ulawula ngeziteleka. Abateleki nababhikishi bavikelekile uma belandela inqubo yoMthetho. Bavikelekile ekuxoshweni, ekuboshweni nokuhlawuliselwa ukulahlekelwa yibhizinisi ngenxa yesiteleka nokubhikisha kwabo okuhanjiswe ngenqubo yomthetho. Embhalweni kaMandulo wonyaka wezi-2016 sasichaze kabanzi ngomthetho wokuteleka.
Kuyacaca ukuthi isiteleka nokubhikisha kufanele kube nokuthula, kungabinalo udlame, kungacekeli phansi impahla nezakhiwo, kungaholeli ekubulaweni kwabantu, kungahlukumezi amakhasitoma nomphakathi abangahlangene nengxabano leyo eholele ekutelekeni nasekubhikisheni. Akufanele behlome abateleki nababhikishi ekuqhubeni le mikhankaso yabo. Angisayiphathi-ke eyobugebengu: ukweba, ukushaya, ukudubula nokucokofula abanye abantu abangeyona ingxenye yokuteleka nokubhikisha. Lokho nje kakunabo ubuntu nobuhlakani ngoba kudala ubutha nempi engadingekile futhi kwephula uMthetho njengoba sisho lapha.
Njengoba sisho zivikelekile izisebenzi uma zihambise ngokwenqubo yomthetho ekulandeleni isiteleka. Okunye okugqamayo futhi ngesiteleka yilungelo lokubhikisha ukwelekelela isiteleka. Kumele makuvunyelwane phakathi kwenyunyana nabaqashi ukuthi zizoziphatha kanjani izisebenzi uma zibhikisha. Uma kungekho kuvumelana, iCCMA inelungelo lokuzishayela imithetho yokubhikisha kuleso siteleka. Lokho kulawulwa yiSigaba 69 soMthetho Wezobudlelwano Kwezokuqashwa.
Uma zibhikisha izisebenzi kufanele ziqikelele ukuziphatha ngendlela engalimazi impahla namalungelo omphakathi noma umqashi ngoba uma zingena kuleso silingo zingaboshwa zihlawuliswe yilabo abonakalelwe ngenxa yezenzo zazo yize isiteleka sazo sisemthethweni. Lokho kwenzeka kuSATAWU enkampanini yakwaGarvis eKapa. Kulo mbhikisho kwafa abantu kwalimala nempahla yomphakathi owawungahlangene nengxabano yenyunyana nomqashi. Yaboshwa yahlawuliswa inyunyana ngaphansi koMthetho Olawula Ukuhlangana uNombolo 205 wezi-1993.
Inyunyana yazama wonke amaqhinga ilwa nalo Mthetho ukuthi ushayisana noMthethosisekelo ngoba unciphisa ilungelo elikuMthethosisekelo njengoba sichazile ngenhla. Icala laze layofika eNkantolo YoMthethosisekelo (SATAWU & Another v Garvis together with City of Cape Town (2012) 33 ILJ 1593 (CC).
Yehluleka inyunyana yahlawuliswa ngenxa yezenzo zamalungu ayo ngenkathi ebhikisha yize isiteleka sawo sasisemthethweni. Okubalulekile okwashiwo yiNkantolo kulesi sinqumo ukuthi: “Akuguquki ukuthi amalungelo aseSigabeni 17 soMthethosisekelo kumele asetshenziswe ngokuthula. Makugcizelelwe ukuthi ngabanikazi balawa malungelo okuhlangana nokubhikisha okufanele bewasebenzise ngokuthula. Kulapho bengazimisele khona ukuwasebenzisa ngokuthula lapho belahlekelwa ukuvikeleka koMthethosisekelo”.
INkantolo Yezabasebenzi ikugcizelele lokhu ecaleni leDischem Pharmacies elinguNombolo 4124/18 lamhla ziyisi-7 kuZibandlela wezi-2018. Umqashi odayisa imikhiqizo yemithi unezitolo ezili-150 ezweni lonke kuzo zonke izifundazwe. Wayenezisebenzi eziyizi-17 128. Inyunyana inamalungu ayi-1 900. Inyunyana yabe isifuna ukwemukelwa njengomkhulumeli omela iningi lezisebenzi, wenqaba umqashi ngoba le nyunyana inesibalo esincane kakhulu ezisebenzini anazo umqashi. Kwaba nomdonsiswano owaqhubekela esitelekeni esasiholwa yiyo inyunyana.
Saba nodlame olwesabisayo lesi siteleka futhi nenyunyana kwacaca ukuthi isiyehluleka noma yayingazimisele ukuluqeda udlame. Okumbalwa okwakwenzeka ukuthi babeshaywa besatshiswa abangatelekile. Imizi nezimoto zabanye kwakulinyazwa noma kushiswe. Kwezinye izindawo kwakuvalwa izindlela eziya kwezinye izitolo zomqashi okwakuziphoqa ukuba zivale. Lokho kwakwenza nokuthi izitolo ezingomakhelwane bomqashi nazo zivalwe. Kwezinye izindawo nomphakathi owedlula ngendlela wawujikijelwa ngamatshe usatshiswe ukuba ungasondeli ezitolo zomqashi.
INkantolo yathi isithetha leli cala elalifakwe ngumqashi ezikhalela ukuba elekelelwe, yakhipha isivimbelo yabuye yakhipha nesinqumo sokugcina esasisho ukuthi lezi zisebenzi zase ziwephulile umthetho zazincisha zona ilungelo lokubhikisa. INkantolo yanquma ukuhoxisa imibandela yokubhikisha eyayihlelwe yiCCMA yakhipha isivimbelo sokuba inyunyana nababhikishi abanalungelo lokuqhubeka nokubhikisha ukuhlangana nokusondela kuzona zonke izitolo zomqashi lapho umphakathi uthenga khona noma ngabe yikuphi lapho umphakathi wawufinyelela khona okuhlobene nebhizinisi lomqashi.
Isinqumo esinjena siyazembula izisebenzi sizephuce ukuvikeleka komthetho. Lokho sekusho ukuthi umqashi unelungelo lokuzijezisa ngezenzo zazo izixoshe. Kusho futhi ukuthi noma ngubani owonakalelwe noma olahlekelwe ngenxa yezenzo zezisebenzi kulolu dlame nobugebengu, usenelungelo lokuzibopha afune amademeshe kuzo izisebenzi ngasinye noma enyunyaneni yazo. Akusizi, akunamqondo ukusheba isiteleka nombhikisho nodlame oluhamba nobugebengu.