Intsha nezemidlalo kwakuyizithupha ziya ogwayini
UMPHAKATHI waKwaMashu wawunentshisekelo kwezemidlalo eyabe iyisimanga usanda kuhlaliswa eminyakeni yowe-1960 kuya kowe-1985 nokwakuyindlela yokuqoqela ndawonye izingane zabafana. Wawungenazo izikhungo zebhola njengalezi amakilabhu asenazo. Esigcemeni kwa-J kunesikhungo iW. Classic Academy esakhiqiza abadlali abafana nomdlali weLamontville Golden Arrows uNtokozo Sikhakhane kube uSiyanda Xulu weMaritzburg United. Siyazibona manje izikhungo zebhola lezinyawo eziqoqela ndawonye izingane zabafana. UMfo waKwaNomajalimane wayigcizelela kakhulu naye indaba ngowezi-2018 mhlazane ethula inkulumo eKillie Campbell Africana Library ukuba aboHlanga babhale umlando wabo ngabo.
Sasiqoqekile impela singabafana ababekhonze kakhulu ukudlala ibhola kusukela ngowe-1965, enkundleni yebhola yokuzakhela ehlathini elisemgwaqeni uChakide maqondana nakubo kwaLinda, uFo, uTutu noMabuyi bakwaZwane esasiyibiza
ngokuthi iKruger National Park Stadium. Yingakho kwabalula ezinsizweni zaseMadadeni uConrad ‘Kwarakwara Make No Mistake’ nomnewabo uBux ‘Lezinto’ Buthelezi nesihlobo sabo ukusibizela kubo mhla zili-15 kuMandulo ngowe-1973 osukwini lwangoMgqibelo ukuthi babefuna ukuvula ikilabhu yebhola i-Animals Football Club yasemgwaqeni uChakide ukuze sihlale siqoqekile. Ikilabhu i-Animals yayinejezi elalibhalwe izinombolo ngendlela yokubhala ngesiRoma, eyayingajwayelekile kwezikanobhutshuzwayo.
Angiqale ngiveze ukuthi uKwarakwara wayesebenza kwaMuhle futhi efutha isaxophone eqenjini lomculo iKwaMuhle Brass Band. Wayeyiciko lokuqamba abadlali amagama okudlala ibhola ngokwesimo nobuyena lowomdlali. Lezi zinsizwa zakwaButhelezi zaqopha umlando esigcemeni sakwa-H ngalowo nyaka, njengabaningi abazindulelayo, ekusunguleni amakilabhu ngoba yayingasekho ikilabhu ngakulowo mgwaqo.
Basitshela ukuthi sasesifikile isikhathi sokuba basiqambele ikilabhu yebhola ngoba kwase kuyiminyaka behlale besibuka njalo ngeMigqibelo sigadulisana futhi sesaze sayakha ngokuthuthukile iKruger kwazise sase sesiyinwebile yankulu.
Kwake kwaba khona namakilabhu ebhola emgwaqeni uChakide ngowe-1965 okwakuyiBP yenkampani kaphethroli idlalelwa iningi elalisebenza khona. Isikhulu sayo kwakunguMlambo ubaba kaThemba, uBongani no-One One, idlalelwa nguMarongrongi Ngcobo, uThemba Mlambo wayedlala naye,
Abadlali be-Animals uConrad wayebaqamba ngamagama ezilwane kwazise nemigwaqo yakwa-H yaqanjwa ngezilwane. Wayenekhono lokuqamba bheka nje waqamba uMagwaza Lushaba ngoNgoso, uBhabsie Ndlovu ngoNtuthane, uThulani Nyawose ngeTsheketsheke, uMduduzi Zulu ngoMkhovu, uMandla Maphumulo ngoMickeymouse, uSikhumbuzo ngoNdlovu Bhubesi ngoba umuzi wasekhaya usemgwaqeni uBhubesi.
Angibange ngisaqhubeka nokudlala ibhola emva kokulimala emilenzeni engozini yemoto esasikuyo ngenkathi ishayisana nebhasi mhla zingama-24 kuMasingana ngowe-1974 osukwini lwangoMgqibelo emini, ngasesiteshini iGreenwood. Usuku lolu eliwumlando obuhlungu nengingasoze ngalukhohlwa ngoba lwaphuma nesithombe semoto ephephandabeni iMercury lamhla zingama-28 kuMasingana osukwini lwangoMsombuluko.
Angiwabalule ngingambengcezi amandla kaMvelinqangi ukuthi akhona nayewanikeze ababekhonza kuZayoni mhla zingama-30 kuNhlangulana ngowe-1973 abangithandazela ngobuningi babo.
Babethi babengicelela kwabadala nalaba ababebabona behlelwa yingozi okwakuzobe kukhona nami njengoba sasinda saba babane kwashona abayisithupha.
Abanye abadlali uConrad abaqamba amagama kwakunguSibusiso
‘Nsere’ Khumalo embiza ngeSelesele, uBhoyi Nxumalo ebizwa ngeMvubu (ethi iHippopotamus), uBheki Mdletshe ngoXamu, uMakhehlana embiza ngeNdlulamithi ngoba wayelishiyile igabade, uBonginkosi ‘Ngure’ Dlamini owayembiza ngoBhejane ngoba umuzi wakubo usemgwaqeni uBhejane, kubenensizwa ayeyibiza ngeMpisi (ethi iWolf), nomunye umnewethu owayehlala ehositela
ababembiza ngeNsimb’evimb’izilwane, uBongi Bukhosini ayembiza ngoJakalasi.
I-Animals ngonyaka we-1979 yayinoNkosenye ‘uNkosi’ Michael Ndaba wayeyiso elalisiphathela uhlu lwezemidlalo ngamakilabhu i-Animals eyayizodlala nawo ewalanda emahhovisini ebhola ayengemuva kwakwaCheckers. Bese kuthi yena futhi uNkosi kanye noLucky ‘Legesi’ Mkhize osehlala ePhoenix baqokwa nguConrad ukuba babeyizimenenja zejezi le-Animals FC okubizwa manje ngokthi iKit Manager ezazizobheka ijezi lekilabhu ngaphambi nangemuva komdlalo, ukuthi labe lisesimweni esifanele abadlali. Phambilini sakubalula ukuthi ayekhona namanye amakilabhu asesigcemeni sakwa-H okwakuyiBlack Aces, iSilver Dollars, iNapoli neReal Fighters.
Izenzo ezinjena zokuqoqa ndawonye intsha ezweni ezabe zithokozelwa ngababesemkhandlwini wamakhansela ngesikhathi kusabizwa ngoKopeletsheni. Okungagcinanga lapho ngoba nanamanje izinhlelo ezinjena zisathokozelwa nguMasipala weTheku, uHulumeni kazwelonke nabaningi. Lokhu kuthathwa njengengxenye yokwakha intsha nokuyigqugquzela kwezemidlalo kanye nezemfundo ngoba kokubili kuyahambisana. Yize kungasagqamile kakhulu ezweni kodwa basekhona abasenothando lokubona isizwe saboHlanga esihlelekile ngokwezempilo nokwangesikompilo labo. Ngaphandle kwesikompilo owoHlanga akalutho. Yini owoHlanga azozigqaja ngayo uma esehleli phakathi kwezinye izinhlanga ngenkathi zizigqaja.