Umzwilili uGloria Bosman usebenze nezinkakha zejazz
KUBACULI bejazz baseNingizimu Afrika abavelele kunentokazi engumzwilili woqobo uGloria Bosman osezungeze amazwe ejabulisa abathandi balolu hlobo lomculo. UBosman ungumculi wesifazane ohlukile ngoba nasemidlalweni yeshashalazi ukhona kanti futhi unekhono eliyisimangaliso lokusebenzisana nabaculi bamazinga neminxa ehlukene.
Umculo wawuqala ekhwayeni yesonto kanti ukuze azithole evelela wamenywa yintokazi eyaduma ngeminyaka yangowe-1970 ngengoma i‘Paradise Road.’ Lowo nguFelicia Marion owayecula eqenjini i‘Joy’ noThoko Ndlozi no-Anneline Malebo. Ebizwa uBosman kwakunedili lomculo wezothando eThe Market Theatre ngaphansi kwesihloko esasithi, ‘Love’ ngowe-1993. Kwathi ngenxa yomunye wabaculi owayengatholakalanga ngesikhathi ayedingeka ngaso, uBosman wabizelwa ukuzovala isikhala. Umdidiyeli walowo mculo kwakuyinkakha uChristo Leach.
Ngendlela afike aqandula ngayo uBosman, amabhange amabili iStandard nePermanent aphangelana ngokumnika umfundaze wokuyokwenza umculo we-Opera eTechnikon Pretoria. Akabange esabheka emuva uBosman esenikwe leli thuba.
Umphumela walokho kwaba yi-albhamu yakhe yokuqala i‘Tranquility’ eyaqoshelwa ezindlini zomsakazo kwaSABC. Ngendlela iphimbo lakhe elimtoti ngayo wasebenzisana nezinkakha emkhakheni wejazz okungoPaul Hanmer umshayi wopiyano ohlonishwayo futhi okunguye owaqamba ezinye izingoma ezikule-albhamu. Wayesebenzisana noMcCoy Mrubatha naye owaqamba ezinye kule-albhamu.
Ukusuka lapho uGloria wazibandakanya emdlalweni owawunomculo wezokholo i‘Jubilation’ eyayiqondiswa wuIvor Jones nowawunesihloko esithi, ‘Woman in Spirit.’ Waphinde wangena emdlalweni weshashalazi owazuza imiklomelo osihloko sithi, ‘The Lion and The Lamb’ owawuqondiswe yinkakha yezeshashalazi uDkt uJohn Kani.
UGloria Bosman usezungeze amazwe omhlaba okukhona kuwo iFrance neNoumea lapho ayejikeleza nomfuthi wetrombone owaziwayo uDkt uJonas Gwangwa. Izinga lokuhlonishwa kukaGloria Bosman lamenza kwaba nguye okhethelwa ukuzonandisa emcimbini walowo owayenguMengameli Wezwe uThabo Mbeki okwakuyisidlo sikakhisimusi waphinde waculela uDkt uNelson Mandela egubha iminyaka yokuzalwa engama-80 eGallagher Estate eMidrand.
Baningi abaculi abasemunxeni weJazz uBosman asecule nabo. Ababalwa kulezi zinkakha kukhona uMoses Molelekwa ongasekho, uSbongile Khumalo, uSipho Mabuse, uVusi Mahlasela, uJames Phillips noHugh Masekela osanda kudlula emhlabeni. Nasemculweni wezimfijoli uBosman akaswelakali kanti ikhono lakhe nakulo munxa liyababazeka. Lokhu wakukhombisa ngendlela acula ngayo ‘Messiah’ lapho ayephelezelwa khona yiRoodepoort Ochestra.
UGloria Bosman ukhombisa ukuba ngumculi oguquguquka nezikhathi. Ubufakazi balokhu wukuchezuka kwakhe kancane emculweni wejazz lapho esebenzisane neqembu iJazzworx beguqulela ezinye izingoma zakhe zejazz ezinesihloko esithi ‘eMzini’ ku ‘House’. Lokhu kumenze uBosman wamukeleka nakubantu abakhonze ezinye izinhlobo zomculo.
Uphinde wasebenzisa ikhono lakhe ukungena emakethe yomculo wesiBhunu akha ubudlelwano nabalandeli abangolunye uhlanga. Useke wabonakala kumafestivali omculo wesiBhunu okubalwa kuwo iKKNK Aardklop neSkouspel eSun City. Uphinde waba yingxenye yomsebenzi obizwa nge‘Al Daai Jazz’, lapho kwakuguqulelwe khona izingoma zesiBhunu zaba ngezohlobo lwejazz.
UGloria Bosman usehlonishwe kakhulu emculweni. Eminye imiklomelo aseyizuzile yiSA Music Award (SAMA) nalapho eseqokwe khona izikhathi eziyi-11 nakabili kumaKORA. I-Albhamu yakhe yokuqala esihloko sithi, ‘Tranquility’ yamzuzisa indondo ye‘Best Newcomer’ waphinde waqokelwa i‘Best Contemporary Jazz Album’ neye‘Best Female Artist’ kumaSAMA ezi-2001.
Ezinye izingoma zakhe ezimlethele udumo nemiklomelo yi‘The Many Faces of Gloria Bosman’; i‘Stop and Think’ i‘Nature Dances’ nesihloko sithi, ‘Emzini’ edlalwa kakhulu emsakazweni nakuthelevishini.