Inhlekelele eTanzania iqondane noweSADC
NAPHEZU kwesibhicongo esishiye kukhalwa eMsavu esifundeni iMorogoro eTanzania lapho kubhubhe khona abantu abangama-63 kwalimala abangaphezulu kwama-70 ngesikhathi kuqhuma ithangi likaphethroli elivulwe omunye wabanikazi bezithuthuthu obezama ukweba uphethroli, namanje kusekhona abasaqhubeka nokuweba emathangini.
Lesi sibhicongo siqondane nezinsuku leli lizwe lizosingatha umhlangano wabaholi bamazwe angaphansi kweSouthern African Development Community (SADC) oqale izolo. Isiqubulo somhlangano walo nyaka sigxile ekuqhakambiseni izidingongqangi zesifunda.
UMengameli uCyril Ramaphosa uyingxenye yabaholi bamazwe abatheleke izolo ekuseni eTanzania abathamele lo mhlangano. Ngaphambi kokuvalve komhlangano uRamaphosa nabanye abaholi badlulise amazwi enduduzo kuMengameli uJohn Magufuli ngokwehlele izwe lakhe. Izolo uRamaphosa ubambe umhlangano oyinguyazana nozakwabo uMagufuli lapho beqinise khona amaxhama okuxhumana phakathi kwamazwe abo. Kulolu hambo uMengameli uphelezelwa ithimba lakhe okukhona kulo uNgqongqoshe Wezokuxhumana Namazwe Angaphandle uDkt uNaledi Pandor.
Lolu khondolo kuthiwa lwaqala eTanzania futhi nesibhicongo sangeSonto bekungesona esokuqala ukwenzeka.
Abashayeli bezithuthuthu bathi uphethroli uyabiza benza imali encane kakhulu ukuthi bangakwazi ukuwuthenga. Bayavuma ukuthi okwenzekile
akuqali kodwa ayikho enye indlela abangasizakala ngayo. Amazwe omhlaba asedlulisele amazwi enduduzo kuMengameli waseTanzania uJohn Magufuli noMengameli waseZanzibar u-Ali Mohammed Shein. Laba baholi bathi basashaqekile ngesibalo esiphezulu sabantu abaphangalele kule nhlekelele.
Imibiko ithi imoto ethwala uphethroli ibisuka eDar es Salaam ilibangise e-Iringa Region. Umshayeli weloli ubezama ukuvika umshayeli wesithuthuthu obegcwele umgwaqo, okujike kwanguye owokuqala ukuvula ivaluvu yethangi ezama ukumoma uphethroli kanti lizoqhuma lisakazeke.
Ngaphambi kwalokho uphethroli usakazeke indawo yonke nokuthe ngesikhathi abantu besondela bezama ukuwulayisha ezigujini kwaqhuma ithangi.
Bekungathi kudlala ingqayi abantu bethungeleka ngomlilo bekhala bevutha amalangabi. Izidumbu bekuyiziginqane eduze kwendawo yesigameko abanye beshe ngendlela yokuthi bekunzima nokubona ukuthi bekungobani. Abanye abalimele bathunyelwe esibhedlela iMorogoro Referral Hospital, abanye bayiswa eMuhimbili National Hospital (MNH).
Kuthiwa sekwaba umkhuba wabo abezithuthuthu ukuphazamisa izimoto ezithwala uphethroli ukuze bakwazi ukuwuntshontsha njengoba kuphinde kwavela nokuthi leli thangi elisakazekile like lavulwa amanye amavalve alo ngaphambi kokusuka eDar es Salaam.
Iziphathimandla eTanzania zikhathazekile ngokuthi uma abashayeli bezithuthuthu bengaphezi ukwenza lo mkhuba kuzogcinwa kuvalwe ngehlahla ezweni ngoba baningi abantu abasebenzisa izithuthuthu. Isikhulu samaphoyisa ezweni sithe kuyacaca ukuthi abantu abafe kule nhlekelele bebezama ukuthola uphethroli.
Emyalezweni wakhe wokukhalisana nabashonile nesizwe sonke uMengameli uMagafuli uthe, “Ngiphatheke kabi ngesikhathi ngizwa ngokuthi sekudlule emhlabeni inqwaba yabantu kule nhlekelele. Ngidlulisa amazwi enduduzo kubona bonke abathintekile, ngifisele ukwelulama okusheshayo nakwabasezibhedlela.”
UMengameli waseZanzibar uMohamed Shein uthe lena kube yingozi embi kunazo zonke esezike zenzeka ezweni kule minyaka. Uthi sekwaphenduka insakavukela umchilo wesidwaba ukuthi njalo uma kuginqike imoto kaphethroli abantu bagcwale kuleyo ndawo beyokweba uphethroli.