Ihlandla lesibili lokhetho e-Argentina luzocacisa
EMVENI kokuthelwa ngehlazo okhethweni olundlalela olukhulu obelubanjwe ngeledlule e-Argentina, kwabaningi imiphumela yalolu khetho bayihumusha ngokuthi sekufike esiphethelweni ngoMengameli uMauricio Macri.
Ihlandla lokuqala lokhetho lukaMengameli luzobanjwa zingama-27 kuMfumfu okuyilo elizocacisa ukuthi uMengameli uMarci uyaqhubeka yini esikhundleni noma kungena imbangi yakhe uMnu u-Alberto Fernandez.
Emuva kwemiphumela yokhetho kuleli sonto amandla emali yase-Argentina iPeso athe ukuqina njengoba bese kuvalwe amehlo ngokwehlelwa ngamandla kukhalwa ngobuholi bukaMarci. Ngaphambi kokhetho izibalo bezikhombisa ukuthi uFernandez uhamba phambili ngokuthandwa okugcine kuye ngawo amagama enkehli uMarci ethelwa ngehlazo ethola amavoti angamaphesenti angama-32, kwathi imbangi yakhe uFernandez yathola angamaphesenti angama-47.
Abahlaziyi nosomnotho bathi imiphumela yokhetho yakamuva imembule izinqe uMarci yakhombisa nokuthi uhola uHulumeni obuthakathaka. Okunye abakushoyo ukuthi uFernandez sekucacile ukuthi nguye uMengameli noma engakakhethwa ngabantu ngokusemthethweni kodwa izinkomba zisho ukuthi nguyena abamfuna esikhundleni sokuhola izwe.
UMarci utshele abalandeli bakhe ukuthi uzokwazi ukuphendula amatafula ehlandleni elilandelayo lokhetho. Umhlaziyi wezepolitiki uGustavo Marangoni uthi uMarci kumele agxile ekuvimbeleni ukuthi isimo singabhebhetheki.
“UHulumeni kumele ugxile ekuqinisekiseni ukuphatha ngendlela kusuka manje kuze kube ngasekupheleni konyaka. Izwe lidinga umengameli ozonyathela njengomengameli kukhona konke akwenzayo, angafani nje nomuntu osabhekwe ukuqokelwa esikhundleni,” kusho uMarangoni.
Kusuka i-Argentina yathola inkululeko ngowe-1983 izinhlangano ezimbili ezike zaphatha kuHulumeni azizange ziwaqede amahlandla azo ngenxa yesimo esingesihle sezomnotho. UMarangoni uxwayisa uMarci ngokuthi kumele enze konke ukugwema isimo esifuze lesi. “Yisimo lesi okumele sisigweme kuze kube uMarci uqeda ihlandla lakhe kungenazihibe nokuwa komnotho.
Belubaluleke ngani ukhetho lwangeSonto
Lolu wukhetho olusuke lubikezela olukhulu lukaMengameli, futhi yilapho amaqembu ezepolitiki ezivivinya khona ukuthi asahambisa ngakho yini. Ngokomlando waleli lizwe asuke esemancane kakhulu amathuba okulungisa isimo okhethweni lukaMengameli uma iqembu like lakhala ngaphansi okhethweni lokuqala lokuzwa amanzi ngobhoko.
Lolu khetho luvamise ukucacisa ukuthi yiliphi iqembu elizonqoba ukhetho lukamengameli. Kuzoyiwa okhethweni olukhulu uFernandez ehamba phambili ngamaphuzu ali-15 eshiya emuva imbangi yakhe okuzoba yinto enzima ukuyivala njengoba leli kuyigebe elikhulu.
Lokhu kwenza lo mholi abe namathuba amaningi okuphumelela ukhetho ngokubili kokuthathu. Ngaphezu kwalokhu uzodinga ukuthola amaphesenti angama-45 okusho ukuthi kuzomele anqobe ngamavoti angaphezulu kwamaphesenti angama-40.
UMarci kuzodingeka asebenze kanzima ngoba ukuhamba phambili kukaFernadez kusho ukuthi noma uMarci
angahlangana namaqembu aphikisayo kuzoba nzima ukuvala leli gebe. Okubonakale kuphendule uFernandez intandokazi ukuziqhelelanisa nomunye osembangweni wesikhundla owake waba nguMengameli uCristina Fernández de Kirchner ekuphatheni kwakhe owaguqisa phansi umnotho wezwe.
I-Argentina icwile ezikweletini njengoba kwathi ngesikhathi engena esikhundleni ngoZibandlela wezi-2015 uMarci wakumisa ukukhokhwa kwezikweletu zezwe okuhlanganisa nese-International Monetary Fund (IMF).
UFernandez uthembise ukuthi uzokulungisa konke lokho ngokukhokhela izikweletu ukuze izwe libuyelwe ukuhlonishwa.