UMnu uMandla Hendriks Nkosi umpetha kwezoMasipala
WAFUNDELA ubuthishela. Wafundisa eZezwe eVungu High School. Wavelela eqeqesha othisha e-University of Zululand engamele uhlelo lwababethuthukisa imfundo yabo ophikweni lwasOlundi naseVryheid.
Emva kwesikhashana wathungathelwa isikhundla sokuba nguMphathi kuMasipala wakwaMbonambi (Mfolozi Municipality). Waziqhuba ezifundweni zokuphatha wagogoda waze wayophatha koMasipala abanesabelozimali ezinkulu njengaseKing Cetshwayo District Municipality, eRichardsbay.
Sekuphele isikhathi sakhe lapho wacelwa ngaboMnyango Wezokubusa Ngokubambisana Nezindaba Zomdabu uCogta ukuphatha koMasipala abasuke benezinkinga zokungabi nabaphathi okwesikhashana. Kwesinye isikhathi bekuba ngoMasipala uCogta athi kabahambisi kahle bese kuphatha yena okwesikhashana athathe amandla kaSodolobha noMphathi kaMasipala. Ushone engamele uMzinyathi District.
Ngumsebenzi odinga ingqondo, amakhono avelele nobuqotho kanye nokukwazi ukuchazela ikakhulukazi abasuke bekade bekweletwa nguMasipala. Izizathu zikaMasipala zokungakhokhi zisukela ekucwaningeni ukuthi umsebenzi wenzeke ngakho yini, ekungabi nazo izimali zokukhokha okwesikhashana, ekulandeleni kahle inqubo yokukhokha ngokwesivumelwano.
Umphathi ozokwengamela lokhu akakwazi ukuthi athi angafika nje athi akukhokhwe engazange athathise kahle ukuthi kwenzakalani kulowo ophethe izimali zomkhandlu, uChief Financial Officer.
Abasuke bekweletwa basuke bengasenanhliziyo yokulinda bafake isikhalo ukuthi akuphenywe lo ozokwengamela ukuthi akasabakhokheli ngani.
Umsebenzi wakhe uwuphathe ngobuchwepheshe obungandile.
Exoxa nozakwabo, kanye nothisha bakhe ababemfundisa ONgoye (umbhali walesi siqephu ongomunye wabo) ubekuphawula ukuba semqoka kokufundisa imiphakathi ngokuthi izinhla zikaHulumeni zihamba kanjani. Impumelelo kaHulumeni ilele futhi ikufundisekeni komphakathi ofisa kuhlangatshezwe izidingo zabo.
Isekutheni futhi labo abaqashwa nguHulumeni ukuba bamsize ngemisebenzi, bachazelwe ngokwanele ukuthi wonke umuntu udinga ukwenza okufanele nokusemthethweni ukuze umcwaningi mabhuku akhiphe umbiko omsulwa ekupheleni konyaka. Amaphepha kufanele aqonde athi ngqo kuyo yonke imikhakha.
Abaningi bazomangala ukuthi kwayena enguMlungisi wokuningi obekufanele kuqondiswe koMasipala, bese kuphele izinyanga ezine engaholi. Ubengeze aziholela kanti kukhona okufanele balungise amaphepha ngendlela esemthethweni bese bemholela ngokwenqubo ebekiwe eyogculisa uMcwaningimabhuku ezimali ukuphela konyaka.
Ukuzilungiselela kwakhe umsebenzi wokuphatha koMasipala kufakazelwa yiziqu zakhe namadiploma nezitifiketi ezahlukene.
Emva kokuqeda uBA, i-UED, iB.Ed Honours e-University of Zululand, wabe esegxila ezifundweni ezazimthuthukisa kakhulu ekuphatheni izikhungo ezidinga ukudepha kokwazi kwezobuholi, zokuphatha nokulawula izabelozimali nenqubomgomo yezimali zikaHulumeni.
Wenza ucwaningo ohlelweni lweMBA, iPost Graduate Diploma in Business Studies, iManagement, Marketing and Financial Management (Buckinghamshire University (UK), iCertificate Programme in Leadership Development (CPMD (Wits), iMunicipal Managers’ Certificate (University of Durban Westville).
Wavakashela eChina , eMalaysia, eTurkey, eGermany, e-United Kingdom, eSwitzerland naseFrance ukuze atholele umasipala usizo lwezimali zokuthuthukisa imiphakathi.
Lapho esebenze khona kakuphumputhwa ukuthi waqalani, waphumelelisani, wabathuthukisa kanjani ayesebenza nabo, wadalwa ubudlelwano obunjani phakathi kukaMasipala nomphakathi, wakukhuthaza kangakanani ukukhuthalelela intuthuko nokubamba iqhaza lokuba ibe khona kulabo ababeyidinga.
Ulaka olukhulu oluke luvele lubangwa yikugqoza kosizo, ukuqongeleleka okukhulu kwezinswelo osekulukhuni ukuziqeda masinyane. Izinkinga futhi zike zibangwe ukungaqondi kahle ukuthi amakhansela anamaphi amandla, nayikungakhokhelwa kukaMasipala yilabo abasebenzisa ugesi namanzi.
Kuyishwa elihlehlisa yonke into kakhulu ukubulala imigwaqo nokunye okuyizingqalazizinda uma kubhikishelwa izimfuno. Le yinkinga edinga ukubambisana kwayo yonke imikhakha ohlangothini lukamasipala nasohlangothini lomphakathi.
Ngochwepheshe abafana nalabo okufanele bacwaninge beluleke ukuthi wonke amandla abantu abanawo bawasebenzisele ekusombululeni izinkinga beholwa ngobuchwepheshe nangobuqotho.
Ube yisibonelo sokuthi ukuhleleka, ukonga, ukuba nombonotalagu mayelana nokuzimela kuyini. Uthenge iplazi elincane, wafuya izinkomo, wakha ihholo, waqala kancane kancane akha izindlu zokulala amaB&B. Kukho konke lokhu ubesebenzisa aboHlanga, ngakho kwazuza umphakathi oNsundu.
Ubelekelelwa ngunkosikazi wakhe uMaMkhatshwa oneziqu kwezokulima obesebenza kwaHulumeni isikhathi eside. Wagcina esulile ukuze azobheka umsebenzi wabo esesiwushilo. Nalapho kudaleke imisebenzi eminingi yentsha yaboHlanga.
Ezalwa ngamakholwa nasenyuvesi wenza izifundo zobufundisi. Uyise, uNkotheni Nkosi noZihlalele uMaNgema. Ungumfowabo kamama kaMfundisi uHawu Mbatha, uNkk uNokusa MaNkosi Mbatha.
Ushiye unkosikazi wakhe uNkk uHoney Busisiwe MaMkhatshwa Nkosi, izingane: uPhiwinhlahla, uSakhile, uSiyabonga, uSindisiwe nobabekazi uNkk uNokusa Evelyn MaNkosi Mbatha.
Uzofihlwa eVryheid mhla zili-17 kuNcwaba ngowezi-2019. Inkonzo iyokuba seBlack Horse Hall ngele-09h00.