Iphephe yavikeleka kangakanani impilo nempahla yabantu?
NGIYAFISA ukuba sike siyibhekisise kafushane lena yokuthi ngabe impilo kanye nempahla yomphakathi wakithi ivikeleke kangakanani ezenzweni zobunswelaboya, kanye nje-ke, nasebugebengwini obukhungethe leli lizwe lakithi.
Ngibuza lo mbuzo nginokuyiqonda yonke imizamo kaHulumeni, kanjalo kanye neyezinhlangano ezikhathazekile ngalesi simo esikhungethe izwe.
Ngiyakuqonda futhi nokuhlukumezeka kwansuku zonke ngesimo sokudungeka kozinzo lokuphepha komphakathi, kanye nempahla yawo.
Benginogqozi lokuba sike sibheke ukuthi ngakube inkambiso kanye nemithetho yezwe yona inawo yini umuzwa ofanayo nowethu esingabagilwa, ngakube imigomo elawula ezobulungiswa, ukuqondiswa kwezigwegwe yona iyalukhuluma yini ulimi oluzwelana nathi njengabahlali abahlukumezekayo.
Umbuzo omkhulu yilona othi, imithetho yezwe yona kambe isivikela kangakanani njengoba ukubulala umuntu sekwafana nokubamba inkukhu ehhokweni maqede uyinqume ngommese!
Usuke uzwe umuntu ekhuluma ethi: ‘Bamshayile’ eqonde ukuthi ‘bambulele.’
Isizathu salokhu kukhuluma, wukuthi ukufa komuntu kubukeka sekwaphelelwa yisithunzi, ngendlela yokuthi ukubulala umuntu, sekulinganiswa nokushaya empilweni yanamuhla.
Ngakube nemithetho yezwe nayo izigameko ezifana nalezi izibona ngendlela efanayo yini nalabo abakhuluma kanjalo na?
UMthethosisekelo wethu ukhuluma ngamalungelo angidalela isilonda esingapholi enhliziyweni.
Ilungelo lempilo: Isigaba (11) phecelezi
Ilungelo lomuntu oboshiwe: Isigaba 35 (1)
Ilungelo lomuntu otokile: Isigaba 35 (2)
Ilungelo lomuntu obekwe icala: Isigaba 35 (3)
Nangaphezulu kwalokhu okungenhla, kunolimi olukhuthazwayo, lokuba wonke umuntu okulesi sigaba esingenhla abizwe ngegama lika‘msolwa’ ngenxa yokuthi amalungelo ezwe ayasiluleka ukuba senze njalo kuze kube ufunyanwa yinkantolo enecala kumbe emsulwa.
Le nto kumele ithathwe kanjalo ngokuthobela umthetho, ngisho ngabe ubufakazi bungakanani obuvele bukhona emphakathini kwelokuthi izinsolo abekwe zona ziyaqinisekiswa ngalo womuntu.
Ayikho inkinga kukho konke lokho,kodwa into ebuye idide ukwenza, wudaba lwamalungelo amaningi ngesikhathi esisodwa kumuntu owenze icala elibucayi emehlweni omthetho, kanjalo nasemizweni yomphakathi.
Phakathi kokunye,icala elibucayi njengelokubulala umenzi liyamnika ilungelo lokuba msulwa, aphinde athole usizo lomthetho, ngezindleko zoMbuso, nakuba lokhu kusho empeleni izindleko zentela kamufi.
Lolu sizo lusuke luhlose ukuba umsolwa abe sethubeni elingcono lokubeka udaba lwakhe enkantolo, nokuyinto engase kwesinye isikhathi iphethe ngokumenza abe msulwa ecaleni abekwe lona.
Ngamanye amagama angagcina ngokufumaniseka engenacala, kube kanti umndeni kamufi uyatabalasa ngempilo ngenxa yakhe.
Umbuzo uthi likuphi ilungelo likamufi kanye nosapho lwakhe oluphenduka izintandane emuva kwayo yonke le nto?
Ngakube sivikeleke ngokwanele yini ezweni ngenxa yale nqubo? Abanye ukubulala sebaziphilisa ngakho ngenxa yokungesabi ukuba ‘buthuntu’ kwezobulungiswa ezweni lakithi.
Ayikho yini enye indlela yokubukela eduze lolu daba oselwaletha ingebhe ezakhamuzini zakithi?
Uthini uHulumeni, zithini izinhlangano ezibhekelela amalungelo esizwe, lithini iHhovisi loMvikeli Womphakathi, athini wona amaqembu aphikisayo?
Ngibuka ukuthi sesifikile isikhathi sokuvuthuza yonke inqubo engasilekeleli ezweni lakithi maqede sibuke izindlela ezintsha zokusebenzela isizwe sakithi.