EZIFINGQIWE
EZIKANOBHUTSHUZWAYO
LIPHEZULU izinga lokuzethemba kuBanyana Banyana emveni kokunqoba iCOSAFA Cup ihlandla lesithathu kulandelana. IBanyana ihlule iZambia ngegoli elilodwa eqandeni ngeledlule eNelson Mandela Bay Stadium yakwazi ukuvikela isicoco eyayisinqobe nyakenye.
IBanyana izimisele ukuqhubeka nokwenza kahle njengoba izoqala imidlalo yokuhlungela eye-Olympics ezobanjelwa eTokyo, eJapan ngowezi-2020. Elakuleli lizoqala imidlalo yokuhlungela ngokubhekana neBotswana ekuhambeni emlenzeni wokuqala zingama-26 kuNcwaba. Umlenze wesibili uzobanjelwa kuleli emuva kwezinsuku ezinhlanu.
EZE-GLADAFRIKA CHAMPIONSHIP
KULINDELEKE ukuthi ibuye ngegiya eliphezulu imidlalo yeGladAfrika Championship ebiyaziwa ngeNational First Division. Umdlalo ozobe ubhekwe kakhulu ngozoba phakathi kweMoroka Swallows neTS Sporting. Okwenza lo mdlalo kube iwona ozobhekeka kakhulu yingoba iSwallows isanda kuthenga igunya lokugijima kuGladAfrika Championship kuMaccabi FC.
Izoqala umkhakhaso wayo wokubuyela esigabeni esiphezulu i-Absa Premiership lapho yazakhela khona udumo inqoba izicoco iMTN-8 neNedbank Cup. Lo mdlalo uzobanjelwa eVolkswagen Dobsonville Stadium kusasa ngehora le-15:00. Izinyoni zaseDube eziqeqeshwa uZeca Marques zizothembela kubadlali abanamava njengo uLebohang Mokoena oseke wagijima kuMamelodi Sundowns nakuOrlando Pirates. Leli qembu liphinde laqinisekisa ukuthi seliboleke u-Itumeleng Shopane no-Ayanda Rorwana kuKaizer Chiefs.
EZEKHILIKITHI
ICRICKET South Africa (CSA) imemezele u-Enoch Nkwe njengozobamba esokuba ngumqondisi weqembu lesizwe iProteas. UNkwe owokuqala woHlanga ukuqokelwa kulesi sikhundla. Ubhekene nomsebenzi onzima wokwakha iqembu eliqine ngokwanele azoyogadla ngalo e-India lapho elakuleli lizodlala imidlalo ye-T20 neyobungqungqulu. IProteas isanda kulahlekelwa abadlali abanohlonze abathe khumu kukhilikithi okunguHashim Amla, uJP Duminy no-Imran Tahir.
EZE-HOCKEY
IQEMBU lakuleli libheke ukudla umhlanganiso emnqhudelwaneni we-African Cup obanjelwe eStellenbosch eWestern Cape. INingizimu Afrika isiwunqobe izikhathi eziyisi-7 lo mqhudelwano.
Usetshenziselwa ukuhlungela imidlalo ye-Olympics ezobanjelwa eTokyo ngowezi-2020. Leli qembu lizodinga ukuwunqoba nakanjani lo mqhudelwano uma lifuna ukuzibekela indawo emidlalweni ye-Olympics. Lokhu kuza emveni kokuba inhlangano eyengamele imidlalo ye-Olympics ne-Paralympics ezweni, iSouth African Sports Confederation and Olympic Committee (SASCOC) ikhiphe umyalelo wokuthi uma leli qembu lifuna ukuzibekela indawo ku-Olympics kuzofanele linqobe i-African Cup.