Owakusasa uzocacisa ngabaya eJapan
NAKUBA umdlalo wakusasa phakathi kwe-Argentina naMaBhokobhoko kungowesihle kodwa usho lukhulu eqenjini lika-Rasie Erasmus ngoba yiwona ozocacisa ukuthi selizilungiselele kanjani ukuya kweyendebe yomhlaba.
Lo mdlalo uzophinde unike umqeqeshi ithuba lokuqoka abadlali azogadla ngabo eJapan njengoba kuzomenyezelwa iqembu lokugcina ngoMsombuluko zingama-26 kuNcwaba. Lo mdlalo uzobanjelwa eLoftus Versfeld, ePitoli ngehora lesihlanu ntambama.
Iqembu lika kulo mdlalo nje libonakala selicije ngokwanele ngaphambi kweNdebe yoMhlaba ezoqala zingama-21 kuMandulo, eJapan. Amabhokobhoko aseqoqweni elibophele iNew Zealand evikela isicoco, iNamibia, i-Italy neCanada.
Emdlalweni wokuvula azobhekana neNew Zealand (All
Blacks) zingama-21 kuMandulo e-International Stadium Yokohama.
Okwenza u-Erasmus nezakhe baqine idolo ukunqoba iCastle Lager Rugby Championship ngeledlule beguqisa i-Argentina ngamaphuzu angama-46 kwali-16 emdlalweni wokugcina weRugby Championship.
Amabhokobhoko aqale umdlalo ekuqonda ukuthi adinga iphuzu elilodwa ukuze akwazi ukuba ngompetha beRugby Championship. Lokhu kuza emveni kokunqoba kwe-Australia ihlula iNew Zealand ngamaphuzu angama-47 kwangama-26 ePerth, e-Australia. Ukunqoba kweSpringbok kuqede ishobolo lokungawunqobi lomqhudelwano, njengoba ayegcine ukuwunqoba ngowezi-2009 esaqeqeshwa nguPieter de Villiers.
Ukwenza kahle kwabadlali kulo mqhudelwano yikhona osekuphathisa u-Erasmus ngekhanda osenejoka lokuqoka abadlali abazomela elesizw kweyeNdebe yoMhlaba. Okuzobaluleka ngomdlalo wakusasa ukunika ithuba abadlali abebengakazibonakalisi.
Izindaba ezimnandi kuErasmus ngezokubuya kukaputeni iqembu elimdinga kakhulu uSiya Kolisi. Nakuba ezodlala kodwa kubonakala engeke awuqede umdlalo wonke njengoba behlose ukumvikela ekulimaleni.
Osekulethe umuzwa wokuthemba iqembu lesizwe ukudlala kahle kwabadlali abanjengoHerschel Jantjies ozakhele igama ngesikhathi esiza elakuleli lihlula i-Australia e-Ellis Park, eJohannesburg zingama-20 kuNtulikazi.
UJantjies watholela AmaBhokobhoko amatry amabili, waqokwa njengomdlali ovelele. Elakuleli libhekene neNew Zealand ekuhambeni zingama-27 kuNtulikazi washaya itry yokulinganisa ngenkathi lamaqembu edlala ngokulingana. UJantjies uqede ehamba phambili kubadlali abavalele amatry kumqhudelwano iRugby Championship.
Omunye umdlali odlale kahle kwelesizwe uHandré Pollard obengumdlali ovelele ngenkathi elakuleli linqoba iRugby Championship libhekene neArgentina.
UPollard uqede engumdlali ohamba phambili ohlwini lwabadlali abakwazi ukuvalela amaphuzu njengoba evalele angama-42.
Kuke kwaba namahlebezi athi inhlangano eyengamele ibhola lombhoxo kuleli, iSouth African Rugby Union (SARU) izomchitha kungekudala u-Erasmus. Nakuba lokhu kushaywe indiva, kepha kubukeka eyoMhlaba kuyiyona engamsindisa ezembeni leSARU.
Umdlalo wokusasa owokugcina ngaphambi kokuba elakuleli libhekise amabombo eJapan. U-Erasmus uthi bazimisele ukuqhubeka lapho begcine khona ukuze bakwazi ukulungisa amaphutha ngaphambi kokunhekisa amabombo eJapan.
“Leli yithuba lokugcina lokukhombisa iNingizimu Afrika into esikwazi ukuyenza. Sifuna ukwenza esakwenza sidlala ne-Australia ekhaya,” kuphetha u-Erasmus.