Yendele kweliphakade inkanyezi yaboHlanga e-USA
Phakathi kwezinto izwe i-United States of America (USA) elizishaya isifuba ngayo wukundizela emkhathini. Igama lomkhumbimkhathi u-Apollo libuyisa ukuziqhenya kuthi igama elithi Neil Armstrong lona lisho ukusabalala komqondo womuntu owacabanga waphinda wenza isiqinisekiso sokuthi umuntu uyafinyelela emkhathini. Unyaka kwabe kungowe-1969.
Nokho kwaba yishwa nechilo ukuthi kulo mlando ka-Apollo kwaba khona igama elingagqamanga nonamuhla abaningi basaliqabuka. Lelo yigama likaNks uKatherine Coleman Goble Johnson onkaba yakhe iseVirginia.
Lona wesifazane woHlanga wabe engeyena nje usomkhathi kepha wabe egogode ngezibalo nokwalekelela ukuthi osomkhathi abafana no-Armstrong.
Okungavamile ukuvezwa wukuthi uNks wakwaJohnson wabe engaqali ukwenza lo msebenzi ngohambo lwangowe-1969, kepha wayekhona nangowe-1961 ngesikhathi usomkhathi uMnu u-Alan Sherpard kwathi ngonyaka olandela loyo kwakhuphuka uMnu uJohn Glenn, owayehamba ngomkhumbimkhathi iFriendship 7.
Kuleli sonto umhlaba uvuke ngezibuhlungu zokuthi le nkanyezi yaboHlanga isiyendele kweliphakade, igoduke isineminyaka eli-101.
Esaphila phakathi kokunye uklonyeliswe yilowo owayenguMengameli u-Obama ngendodo eyaziwa ngokuthi yiMedal of Freedom.
Kanti sebeqeda ihlazo abeNASA baqamba ibhilidi, iKatherine G Johnson Computational Research Facility.