Inxiwa libheke umoya irandi ligubuzeleka ezimakethe kuleli sonto
Kuleli sonto bekulindelwe ngabovu inkulumo kaNgqongqoshe Wezezimali uMnu uTito Mboweni. Abantu bebeqagela kwaze kwafika usuku. Nokho lisalokhu limile ithemba lokuthi bazomamatheka abanezimoto uma kuqala inyanga uNdasa uma kwehla intengo kaphethroli nodizili. Sibheke usuku lomhla zizine enyangeni kaNdasa ukuthi izokwehla intengo kaphethroli nodizili. Intengo yegolide iyajabulisa kulabo abahweba ngegolide. Bekukuhle ngesonto eledlule, kanti futhi kuvule izimakethe ngoMsombuluko intengo yenyuke yafinyelela kumadola ase-USA ayi-1 660, osekunesikhathi eside yagcina ukufinyelela khona. Nentengo kawoyela sivuke ngoMsombuluko isezingeni elithembisayo ngoba yehlile kulokho eyayiyikho ngoLwesine nangoLwesihlanu olwedlule.
NgoMsombuluko mhla zingama- 24 kuNhlolanja wezi-2020
NgoMsombuluko kuvule izimakethe umphongolo kawoyela ubiza amadola aseUSA angama-56,90.
Idola lase-USA kuvule izimakethe ngoMsombuluko lilingana namarandi ali15,06. Noma kunjena kuwehlisile kancane amaphaphu ngoba lithe ukuqina irandi kunalokho elaliyikho ngoLwesihlanu.
Noma kunzima ukunyakaza erandini, kuvulwe ngoMsombuluko lisimeme ngesenti elilodwa irandi uma liqhathaniswa noPondo waseBritain ngoLwesihlanu olwedlule. Sivuke ngoMsombuluko uPondo waseBritain ulingana namarandi ali-19,49.
Kuthande ukwehluka ngalo Msombuluko ngoba iYuro nalo lihamba lodwa ekucindezeleni irandi laseNingizimu Afrika. Kuvule izimakethe iYuro lilingana namarandi ali-16,30, okungaphezulu ngamasenti amabili esimweni elalikuso ngoLwesihlanu.
NgoLwesibili mhla zingama- 25 kuNhlolanja wezi-2020
Belintengantenga ngoLwesibili irandi uma liqhathaniswa nedola lase-USA. Kuvulwe ezimakethe lilingana namarandi ali-15,10, okuchaza ukuthi likhuphuke ngamasenti amane idola lase-USA kulokho ebeliyikho ngayizolo.
Ngokunjalo noPondo waseBritain wenyuke ngamasenti amane uma uqhanthaniswa nerandi, walingana namarandi ali-19,53. Kuthanda ukuletha uvalo uma uPondo waseBritain udlondlobala wedlula kumarandi ali-19,50.
Liqhubekile iYuro lenyuka ngamasenti ayishumi lalingana namarandi ali16,40. Kungabukeka kuyimali encane lena engamasenti, kodwa kwenza umehluko omkhulu uma sekukhulunywa ngemali yoqobo ewumthamo kulabo abasebhizinisini elisebenzisana nala mazwe.
NgoLwesithathu mhla zingama- 26 kuNhlolanja wezi-2020
Liqhubekile lenyuka idola lase-USA lalingana namarandi ali-15,23.
Kwethuse kakhulu okwenzeke ezimakethe ngoLwesithathu ngoba kuvulwe uPondo waseBritain ulingana namarandi ali-19,79.
IYuro liqhubeka kulokho elikuqale ngoMsombuluko ukwenyuka usuku nosuku. NangoLwesithathu iYuro kuvule imakethe lilingana namarandi ali-16,55.
NgoLwesine mhla zingama- 27 kuNhlolanja wezi-2020
Kuvulwe izimakethe kusenzima ngoba idola lase-USA liqhubeka nokudlondlobala, belilingana namarandi ali-15,28, okuveza ukuthi idola likhuphuke ngamasenti ayisihlanu.
Sengathi lipaquze kwapaquzeka irandi lilwa noPondo waseBritain osho ukulidla luhlaza kuleli sonto. UPondo waseBritain kuvulwe ngoLwesine ulingana namarandi ali-19,77.
Kuleli sonto iYuro alilinike thuba lokunyakaza irandi, lilokhu liqhubeka nokuzenzela erandini. IYuro kuvulwe lilingana namarandi ali-16,68, okusho ukuthi irandi lehle ngamasenti angaphezu kweshumi. Kusinda kwehlela.
Sesidlulile osukwini lwesabelo sezimali. Kubukeka sengathi inkulumo kaNgqongqoshe ayibanga nomthelela omubi erandini. Noma lisenkingeni yokucindezelwa ezimakethe zemali, akukhombisi ukuthi isizathu kungaba yinkulumo kaNgqongqoshe uMnu uMboweni. Okumele sibe novalo ngakho kuyiwa phambili ngukuthi iMoody’s izolibeka kuphi elaseNingizimu Afrika. Ithemba esingabambelela kulo ngelokuthi okungenani baligcine izwe likuleli zinga abalibeka kulo begcina ukunikeza umbono wabo. Akwethembisi nokho uma sibheka ukukhula kokugxekwa kwaleli lizwe.