Siya ngokuphela isikhala somuntu emsebenzini
Emva kokulalela uNgqogqoshe Wezezimali uMnu uTito Mboweni ethula isabelomali sanonyaka, kugxile kabusha emqondweni wami ukuthi sinzima isikhathi esibhekene neNingizimu Afrika. Abaningi bajatshuliswe ukuthi akukho zinguquko ezisobala kulabo abakhokha intela, kodwa kuxegisiwe ezindaweni eziningi. Kubukeka kukuhle, futhi nezibalo ziyethembisa.
Kube sobala kimi ukuthi kumele umuntu osenomqashi ahlalele ovalweni ngoba akuzukuba lula njengoba kubukeka kwethembisa enkulumweni. Ingqikithi yenkulumo beyizwakala kamnandi futhi ikhombisa ukuthi kucatshangwe kwajulwa ukuze kuphume inkulumo ehlelekile.
Ngaphambi kwenkulumo yesabelomali izikhulu emikhakheni eyehlukene bezibuzana ukuthi, kazi uNgqongqoshe uzophuma kuphi isimo sisibi kanje. Iqiniso okungafuneki liphume emqondweni ngelokuthi isimo somnotho sisemi kabi njengoba besinjalo ngaphambi kwenkulumo. Isibalo salabo abangasebenzi silokhu siphakeme futhi siyaqhubeka nokukhula ngenxa yengcindezi osomabhizinisi abazithola bekuyo.
Uma usasebenza usenomqashi kulo nyaka kumele uzibone usesenhlanhleni, futhi kumele uwubambe uwuqinise lowo msebenzi. Uma ungusomabhizinisi kulesi sikhathi kuyaphoqa ukuthi wenze okusemandleni ukuthi uqashe abantu abayisibalo esincane. Uma ikhona indlela yokuthola imishini ezokwenza umsebenzi, kuzomele kwenzeke kanjalo. Lesi simo sibonakala siyifu elimnyama elimboze umhlaba, kodwa lihlome kakhulu kuleli lizwe lethu.
Kuthanda ukwethusa ukuthi izikhungo zemfundo ephakeme zisafundisa ngendlela esakhula sifunda ngayo. Zincane izinguquko esezenzekile emfundweni, ezilungiselela abafundi ukubhekana nesikhathi samanje lapho imishini ithatha imisebenzi ebeyenziwa ngabantu abaningi.
Kule nyanga edlule ngilahlekelwe wumakhalekhukhwini, ngaba nenkinga enkulu yokuxhumana nabantu ngenze umsebenzi engijwayele ukuwenza uma kunomakhalekhwini. Ukuthola lonke ulwazi nemibhalo ebengiyigcine phakathi kumakhalekhukhwini kube wumqansa. Kucishe kwema umsebenzi ngoba zonke izinhlelo zami beziphakathi kumakhalekhukhwini olahlekile. Isimanje sesiqoqela konke ndawonye. Umuntu akasadingi ukuxoxa nabantu abaningi ukuze kulunge izinto. Ngisebenzise ucingo ngaxhumana nabomshuwalense engiwukhokhelayo. Engikhulume naye ngocingo ungiyalele izinto okumele ngizithole bese ngiphinda ngixhumana nabo. Ngenza njengoba engitshelile. Sengibuyela kwabomshuwalense, ucingo engakhuluma kulo lwangiyalela ukuba ngiciphize yiphi inombolo efonini, ngaze ngaqeda. Emva kwalokho ngathola umyalezo ngobhalonyazi.
Kwesinye isikhathi uthunyelwa kumakhalekhukhwini ukutshele omele ukwenze. Umyalezo engiwuthole ngobhalonyazi ungiyalele isitolo esiku-inthanethi engizowuthola kuso umakhalekhukhwini omusha. Abomshuwalense bakhokhela lesi sitolo isamba semali ethile. Uhlelo obekumele ngilulandele belungadingi ngikhulume namuntu. Konke ngikusebenze kuinthanethi kwaze kwagcina sebeluletha ekhaya ucingo lwami olusha ngingazange ngiye esitolo, futhi ngingazange ngiyiphathe ngesandla imali. Kulo lonke lolu chungechunge angibonananga namuntu ubuso nobuso kodwa konke kuhambe kamnandi nganeliseka. Kufikile kimi ukuthi sebenciphile abantu kulesi simo sokusebenza kwesimanje.
Umbiko wocwaningo obelubheka isimo semisebenzi ngonyaka wezi-2030 ophume ngoMandulo nyakenye siveze ukuthi imisebenzi eminingi iyokube seyenziwa yimishini, kunciphe abantu. Lolu cwaningo olwalubizwa nge-Experience 2030: The Future of Customer Experience lwaqagula ukuthi umsebenzi wokuxhumana nabathengi ongama-67% uyokube sewenziwa ngezindlela ezintsha ezibizwa ngedijithali, okubalwa phakathi kwazo umakhalekhukhwini kanye nokuthenga nge-inthanethi. Sekunezitolo ezithile ezitholakala ku-inthanethi njengoWish, iTakealot nezinye.
Lezi zitolo zidayisa imikhiqizo enhlobonhlobo ngamanani aphansii kunalawo asezitolo zesimanje. Lolu cwaningo luqhubeka luthi ngonyaka wezi-2030 izinqumo ezithinta abathengi ezingamaphesenti angama-69 ziyokube sezithathwa yimishini yohlobo lweSmart.
Abanye bazokunaka ukuthi uma umuntu esekhokhela impahla ezitolo esebenzisa ikhadi lasebhange, sekunezitolo lapho ezifakela yena ikhadi emshinini, alandele imiyalelo esemshinini lize limtshele ukuba alikhiphe.
Kwamanye amazwe, ikakhulukazi athathwa njengahamba phambili ngokuthuthuka, umuntu uma eseqedile ukuthenga, ungena emgqeni wokukhokhela impahla. Impahla uzibekela yena, bese kuba nomuntu oyedwa oqashiwe odlulisa impahla ngayinye emshinini ukuze iveze inani umthengi azolikhokhela impahla.
Umthengi uyedlula abheke inani elivezwa wumshini, bese efaka ikhadi lasebhange noma imali emshinini, ngaphandle kokuthi akhulume nomuntu. Kula mazwe umthengi uzithathela isikhwama esisuke sibekwe eduze azifakele impahla ayithengile bese eyaphuma.
Kulesi simo kusobala ukuthi abantu abazoqashwa bazoba yingcosana. Kungenzeka umthengi athenge aze aphume esitolo engakhulumanga namuntu, kodwa aphume eyiphethe yonke impahla abezoyithenga. Sizokhumbula ukuthi izindawo zokupaka izimoto ezikhokhelwayo bezidinga abantu ababili ukuze zisebenze, izimoto ziphume ngaphandle kwenkinga.
Namuhla akusadingi ukhulume nomuntu. Umuntu usefaka ikhadi lokupaka emshini, bese umtshela ukuthi ukweleta malini, ayifake imali ewuhlweza, noma eyiphepha noma eyikhadi lasebhange. Umshini uthatha imali efanele bese umbuyisela ikhadi lokupaka noshintshi uma ukhona. Uma eseqedile ukukhokha akusadingeki muntu ozomvulela, umgoqo uyazivulekela bese ephuma uphinde uvale. Noma zingaki izintuba zokuphuma akusadingeki muntu ozoqashelwa ukuhlala avulele izimoto ezingenayo neziphumayo.
Emigwaqweni eminingi emikhulu sekunezindawo lapho ukukhokhela khona ukuhamba kulowo mgwaqo. Kujwayelekile ukuthi kube nomuntu okukhokhwa kuye, abuyise ushintshi, bese evula umgoqo kudlule izimoto. Muva nje sekunezindawo lapho umuntu osebenzisa ikhadi lasebhange engakhulumi namuntu aqonde kulelo sango elimvumela akhokhe bese edlula.
Kwezinye izindawo umuntu uthenga okuthile okufakwa emotweni afike azidlulele kula masango. Emasangweni sekunomshini ofunda imoto uyidlulise ngaphandle kokuthi kube nomuntu okukhokhwa kuye. Uma ungakaqapheli ukuthi isikhala somuntu siyancipha emsebenzini kuzomele ubhekisise. Ucwaningo lwaveza ukuthi:
Amaphesenti angama-80 abathengi bakwamukela ngentokozo ukulethelwa impahla behlezi ekhaya ngemoto noma ngohlobo olusha olubizwa ngedrone.
Amaphesenti angama-81 bakubona kungcono ukuxoxa nomshini, umuntu aphendule ngezenzo ezifunwa wumshini, kunokukhuluma nomuntu.
Amaphesenti angama-56 sebekulungele futhi bakulindele ukuthi onyakeni wezi2025 uma besemaholidini nasezindaweni zokujabula basebenzise imishini.
Abayisishiyagalombili kwabayishumi sebekuvumile futhi bayathanda ukusebenzisa uhlobo lobuchwepheshe obubizwa ngeSmart Technology, okubalwa phakathi kwayo ukusebenzisa umakhalekhukhwini bathenge impahla abazoyilethelwa ekhaya bengazange baphume endlini. Phakathi kwalezi zinhlelo sekukhona oGoogle, u-Amazon, iTakealot nezinye.
Kumele siguqule ukucabanga nokwenza kuguqulwe izifundo ezifundwayo ezikoleni nasemfundweni ephakeme. Kuyethusa ukuthi noma zenzeka lezi zinguquko ezimbonini izikhungo eziningi zemfundo ephakeme azikabi naluhlelo olusha lokuqeqesha abafundi bamanje ukuba babhekane nezinselelo zanamuhla, futhi kube yibo abalawula okwenzeka ezimbonini kulesi sikhathi.