Eyomnotho wakuleli idinga ubuchule bokwenza
Selidume ledlula. Kwaphela ukuqagela, laphuma igama nelamukelwe ngezindlela ezahlukene. Usesethulile isabelomali ekade sibhekwe ngabovu uMhlonishwa uTito Mboweni. Kulabo abaqonda umnotho kanjalo nepolitiki yezomnotho bekungekho okutheni okulindwelwe kule nkulumo ngaphandle kwezikhonkwane ezizofakwa ukuze kuthi noma umbani udlalela ngakithi, kube abafana bakhona. Ukhuluma nathi nje uMboweni kubi, umnotho kawukhuli, imali kayikho, inkohlakalo idlangile namahalanjonjo lawa, amaqhude ukuzibeka ango-International Monetary Fund noModdy’s aphefumulela eduze asifuna lapha. Njengoba sike sakuveza ngesonto eledlule, izwe likwangqingetshe. Ngakho obelindele umlingo kuMboweni ngumuntu ovele onegama naye.
Kukho konke akukhulumile ngoLwesithathu uMboweni, okumele kusikhathaze yisikweletu sezwe. Ukube iNingizimu Afrika iyinkampani ezimele ngabe sekukhona abaxoshiwe noma izinkulumo zokuthi ayivalwe inkampani. Isikweletu esingaphezu kwama-60% sisho inhlekelele. Siwubufakazi bokuthi inkampani ingase yehluleke ukukhokhela izidingo kanye nabasebenzi bayo. Nakithi lokho sekuqalile njengoba uMboweni phezu kokusatshiswa yizinyunyana, ulikhiphile elokuthi kuyomele kube khona okwenziwa ngezisebenzi zikaHulumeni. Nembala lokhu ngeke kwehle kahle kwabathile ngaphandle nangaphakathi eqenjini lakhe. Sineqiniso ukuthi uMboweni uyakwazi lokhu nokuthi akakugqizi qakala . Okunye okusobala wukuthi uMengameli wezwe uyameseka uMboweni ngoba uma izithako zakhe (uMboweni) zokulungisa umnotho wezwe zingaphumelela nguye uMengameli oyotuswa. Nokho umbuzo uthi ngabe iqembu lona liyameseka na?
Impendulo kulo mbuzo imqoka ngoba kukhona elakuleli elidume ngakho. Sidume ngokukhuluma kepha singenzi. UMengameli noNgqongqoshe bakhe bakhuluma amagama amtoti phambi kwezwe nomhlaba, kepha umkhonto ujame laphaya ekwenzeni. Kwakunini silale okwabe kubizwa ngezixazululo?
NjengelaboHlanga siyamukela ukuthi uMboweni uphakathi kwembokodo nesisekelo. Siyamfisela futhi ukuba aphumelele ngoba nxa le nqanawe ingazika ngaboHlanga abayoba zibhucu. Zigqugquzela ukubonisana, ukuvulelekana nokwethembana kwazo zonke izinhlaka ezisetafuleni lokuxoxa ngomnotho wethu. Sithi kuHulumeni sesizwile. Yonke le minyaka sizwile manje ake sibone ubuchule bokwenza.