Ulwazi olwanele ngomkhiqizo lungahlenga impilo yakho
Kwavela imali, kwavela indaba enkulu. Abanye abantu bangenza noma yini engalimaza abanye abantu inqobo nje uma bezothola imali.
Kunakeka kakhulu lokhu uma kukhulunywa ngobugebengu obujwayelekile njengokubamba inkunzi.
Inkunzi eyenziwa ngobuchwepheshe sivamise ukungayinaki ngoba isuke yenziwa ngaphansi kwezinhlelo eziqondile futhi ezethenjwayo ngoba zibukeka zisemthethweni.
Abakhiqizi bezinto ezinhlobonhlobo benza izinto okuthi uma bengabanjwanga kunganakeki ukuthi bebegebenga abantu. Angiphiki ukuthi liyenzeka iphutha bese liyalungiswa kodwa kuyethusa uma kucaca ukuthi okuyiphutha kwenzeka ngaphansi kwezinhlelo eziqondile futhi sekuthathwa njengendlela yempilo.
Kulezi zinsuku ngizwe kukhulunywa ngezingangqo lezimoto ezikhiqizelwa ukudayiselwa abase-Afrika nabakwamanye amazwe. Ngomunye unyaka ngangilalele isikhulu esiphezulu senkampani enkulu eyakha izimoto kuleli lizwe sichaza ukuthi iningi lezimoto abazakhayo zihanjiswa kwamanye amazwe. Wakuchaza futhi ukuthi uma kuqhathaniswa izimoto ezithengwa ngabaseNingizimu Afrika zincane kakhulu kunalezo ezithunyelwa kwamanye amazwe.
Waze walimisa ngesihloko elokuthi ngeke inkampani yakhe iphile ngokukhiqizela iNingizimu Afrika kuphela.
Imikhiqizo eyenzelwa amanye amazwe inezinto ezithile ezifakwayo ezimotweni ezakhiwayo eziyizidingo zalawo mazwe izimoto eziya kuwo. Lokhu yinto eyamukelekile ngoba umthengi unelungelo lokuchaza izinto afuna zibe khona noma kanjani emkhiqizweni owakhelwe yena futhi azowukhokhela. Lokhu kwenza imikhiqizo ezodayiswa ngaphakathi eNingizimu Afrika yehluke kuleyo edayiselwa amanye amazwe. Kuyinto eyamukelekile futhi esemthethweni ngoba yilelo nalelo zwe linesimo esidinga ukubhekelwa uma kuhlanganiswa umkhiqizo.
Lokhu engikuchaze ngenhla akwenzeki nje kuphela emkhiqizweni wezimoto kodwa kusabalele nezinhlobo ezahlukene zemikhiqizo. Uma ngenza isibonelo ngensipho eyakhiwa lapha KwaZuluNatal,
ayifani naleyo esetshenziswa ngabaseGoli. Kuthiwa umoya waseGoli womile kunalowo wakulesi sifundazwe, kanti ngokunjalo namanzi asetshenziswa eGoli anomehluko kulawa aKwaZuluNatal.
Lokhu kuphoqa labo abakha insipho ukuba bafake izithako ezizolungelana namanzi akuleso sifundazwe noma kulelo zwe ukuze yenze umsebenzi. Kungakho kubalulekile ukuthi ngaphambi kokuhambisa umkhiqizo wakho kwelinye izwe kumele wazi isimo salelo lizwe esinokuba nomthelela ekwamukelekeni komkhiqizo wakho. Kungaba yisimo sezulu, isimo somhlabathi, noma yisimo sabantu bakuleyo ndawo esingakuphoqa ukuba umkhiqizo wakho ulungelane nabo.
Uma kwakhiwa izimoto kumele umkhiqizi acabange abantu bakulelo lizwe ukuthi bathanda uhlobo olunjani lwezinto nokuthi isimo sezwe sinjani. Yilelo nalelo zwe linezinhlangano zalo ezibhekela izingangqo lomkhiqizo ngaphambi kokuthi uye kulabo abazowusebenzisa. Nalapha eNingizimu Afrika sinezinhlobo ezahlukene zabahloli nabacubunguli bemikhiqizo, okuyibona abanikeza isiqiniseko sokuthi umkhiqizo ufanele ukuya kubantu.
UNgqongqoshe Wezokuthutha uMnu uMbalula ubehambele eStolkholm lapho bekubhekwa khona ukuphepha kwezimoto. Lapha bekuhlolwa izinga lokuphepha kwezimoto ezakhelwe ukusetshenziswa emazweni ahlukahlukene. Okuthathwa njengokuphepha akufani emazweni ngamazwe. Kuvele ukuthi kuyaqikekelwa lapha eNingizimu Afrika ukuthi izimoto ezidayiswa kuleli zwe zinohlobo lwamabhuleki avumelekile, olubizwa ngeABS.
Lokhu kuqinisekisiwe ezimotweni zaseNingizimu Afrika kusukela ngonyaka wezi-2009. Sekuyisikhathi eside imithetho yaleli zwe yakumela ngezinyawo ukuthi izimoto zaseNingizimu Afrika zibe namabhande abazibopha ngawo labo abasemotweni ukuze baphephe. Ayikho imoto ephuma ingenawo la mabhande.
Ezinye izinto esingazinaki kodwa eziphoqiwe ezimotweni ezakhiwayo ngukuthi imoto kumele yakhiwe ibe namathoshi, ibe nezibuko zokubuka emuva nangaphambili kanye namabhuleki. Inhlangano iNational Regulator for Compulsory Specifications (NRCS) engaphansi koMnyango Wezohwebo Nezimboni iyakuqinisekisa ukuthi kunohlelo olwaziwayo ngabakhiqiza izimoto ukuthi kumele bazenze zibe ngeziphephile.
I-USA yakwenza kwaba yimpoqo ukuthi imoto eyakhiwayo ezohamba kuleliya lizwe ibe nezikhwanyana eziphuma uma kwenzeka ingozi ezibizwa ngama-airbag. Inhlangano yalapha eNingizimu Afrika, i-Automobile Association (AA), ayikakufaki ohlwini lwezinto eziyimpoqo ukuba labo abakhiqiza izimoto zalapha eNingizimu Afrika bazifake lezi zikhwama ezimotweni. Uma uthenga imoto kuleli zwe uyakwazi ukukhetha phakathi kwemoto enezikhwanyana naleyo engenazo, bese kushiyana imali ozoyikhokha.
Kuyethusa lokhu okwavela ngenkathi kuhlolwa futhi kuqhathaniswa imikhiqizo yezimoto ngonyaka owedlule eGermany. Imoto yohlobo lweNissan NP300 Hardbody ekhiqizwa lapha eNingizimu Afrika iyazenelisa zonke izidingo nemithetho yokuphepha evunyelwe lapha emazweni ase-Afrika.
Futhi ingenye yezimoto ezithenjwe kakhulu ngokuphepha nokulungela isimo sokusebenza ezimweni ezinzima. Kuthe uma le moto ihlolwa yinhlangano iGlobal New Car Assessment Programme ishayisana nemoto yaseBritain eseyineminyaka eyisihlanu yakhiwa, kwavela ukuthi umshayeli wemoto yaseBritain ubezophuma engenamyocu ezihambela kanti owaseNingizimu Afrika ubezokufa kule ngozi.
Kuyiqiniso ukuthi ukwakhiwa kwemoto ibe nezinhlelo zokuphepha kuyenza ibize imali ethe xaxa kunaleyo engenazo. Kodwa kushiya imibuzo nomcabango wokuthi abase-Afrika abanendaba kangako nokuphepha futhi bayazemukela izinto ngaphandle kokubhekela ukuphepha kwabo. Ukuze izwe lithathwe njengelihlonishwayo nabantu njengabazithathela phezulu, kuhle labo abasemandleni babakhuthaze ngezinhlelo ezifanele.
Sekuyinto esesiyijwayele ukuzwa isimemezelo esithi abanikazi bohlobo oluthile lwemoto mabazibuyisele lapho zakhiwe khona ukuze kulungiswe okuthile okusuke kungekho esimweni esifanele.
Angijwayele ukuzwa ukuthi labo abasuke bengabanikazi balolo hlobo lwemoto baphatheka kanjani uma bebizwa sebengasenakuyishintsha imoto futhi sebeyikhokhele isikhashana uma ithengwe ngesikweletu. Ziyashiyana izinto ezisuke zingaqondile ezimotweni ezehlukene kodwa kuyamphoxa umnikazi wemoto ukutshelwa futhi kumenyezelwe ukuthi imoto yakhe ayithandayo nayikhokhele imali enhle inephutha.
Eminyakeni embalwa edlule kuke kwenzeka kwavezwa imoto yakwaFord ingqongqa wumlilo oqubuka imoto ihamba. Ibe undabizekwayo eyale moto kodwa kuze kube namuhla siyazibona izimoto zalolu hlobo zisekhona emgwaqweni. Kuyamangalisa lokhu ngoba kuqondana nezimoto ezakhiwe kusuka ngesikhathi esithile kuya kwesithile.
Ngamanye amazwi kubalula ukwazi enkampanini ukuthi ngubani owenze iphutha kuleyo moto yangaleso sikhathi. Akusikho-ke okwethu ukuthi wenziwa njani umuntu okutholakala enecala.
Uma kwenziwa imikhiqizo enhlobonhlobo ezosetshenziswa ngabantu kumele ihlolwe ngaphambi kokuba bayisebenzise. Lokhu kuwuhlelo olumile emhlabeni jikelele. Uma kukhulunywa ngemikhiqizo edliwayo elungiswa ihlanganiswe ngobuciko obuthile, kunohlelo olulandelwayo ukuhlola ukuthi akunabungozi yini empilweni yabantu abazokudla. Kulezi zinsuku bekumenyezelwa ufishi osemathinini okumele labo abawuthenga bawubuyisele ezitolo ezithile. Umbuzo osalayo ngothi, kazi kuthiwani ngalabo abawuthenge bawupheka, okukhulunywa nje sewuseziswini sewuyabasebenza? Ngubani ozobabhekela ngempilo yabo. Ngokunjalo nezinhlobonhlobo zemikhiqizo egcotshwayo neyokugeza kunendlela yokuyihlola ngaphambi kokuba iwele ezandleni zabantu abazoyisebenzisa kungenasiqiniseko sokuthi ayinangozi kubo. Yingakho nje kunganconywa ukuthenga imikhiqizo yalolu hlobo.
Kumele sikukhuthalele ukuqikekela nokuzibhekela ukuthi leyo mikhiqizo esiyisebenzisayo inomthelela ongakanani ekuphepheni kwethu.