Uqhakambisa isiko lamaMpondo eSweden
USisanda Nilsson, odabuka eBukhosini bakwaFaku eFlagstaff, e-Eastern Cape, useneminyaka emithathu ezinze eSweden enyakatho ne-Europe eyaduma ngokukhiqiza amaqembu ePop i-Abba neRoxette.
Ingoma ayikhipha ngayodwana ethi “Indlela Yami” ngowezi-2015 enesigqi se-Afro Pop iyona emphendlele indlela yokuthola amadlelo aluhlaza.
Le ngoma, edidiyelwe nguMondli Ngcobo osesebenze namaciko anjengoBlack Coffee, iLadysmith Black Mambazo no-Unathi, yesekwe kakhulu eNingizimu Afrika njengoba idlalwe eziteshini zomsakazo ezinkulu nezemiphakathi.
USisanda uthi ngaphambi kokuphakanyiswa yile ngoma ubeseqalile ukusebenza umshoshaphansi njengoba esebuya ngisho eNew York kweminye imicimbi emele iNingizimu Afrika.
Uveze ukuthi akazithelanga ngabandayo njengoba esebenze isikhathi eside njengevolontiya. Uqale ukugxila emculweni awufundele enyuvesi ngokubhala izingoma ngowezi-2011. Izinto ziqale ukuhamba kahle esehlangane noMondli omfake ngaphansi kweTouch Africa Records kaMdu Ngcobo waqopha i-Indlela Yami nezinye izingoma ezithi, Intombi Yosapho nethi, Gone Crazy.
Nazo lezi zikwazile ukungena emakethe yaseSweden njengoba zidlaliwe. Ingoma ethi, If This Is Love ayiqoshelwe uMarkus Göransson eNeapolitan Sounds imbeke emgangathweni njengoba enqobe umncintiswano iP4 Nästa Jämtland owenziwa yisiteshi iSwedish Radio P4 engafaniswa no-Ukhozi FM kuleli.
“Ngale ngoma ngangihlose ukubonga iqhaza elabanjwa yintsha yaboHlanga yaseNingizimu Afrika eyanikela ngempilo yayo emzabalazweni wezili-16 kuNhlangulana we-1976,” kusho uSisanda okwazi ukuncinza isiginci nokuxavatha upiyano.
Uthi njengoba esehlala phesheya kwezilwandle, emculweni wakhe uhlanganisa onesigqi sakuleli nesibizwa nge-Indie Pop ethandwa kakhulu eSweden.
Ngaphandle kokucula umatasa njengoba ethuthukisa intsha yakuleli neyaseSweden ngenkampani engenzi inzuzo iLife Runners.
USisanda, oke wakhulela eGamalakhe ogwini oluseningizimu yaKwaZuluNatal, uthe: “Ngisezinhlelweni zokwenza ifestiveli ezokwaziwa ngele-IIngcambu Zomculo ngakithi eFlagstaff lapho ngizoletha abaculi baphesheya abazofike bafunde ngosiko lwami. Ngakolunye uhlangothi ngizobe ngihlose ukuthuthukisa abantu bakithi nokukhangisa ngosiko lwethu lonkana,” kusho uSisanda.
Lokhu kusebenza kwakhe ngokuzikhandla sekwenze waqokelwa umklomelo obizwa ngePrincess Stella Sigcau II Award. Umcimbi uzokwenziwa kuMpondo Culture and Heritage Festival eba minyaka yonke ehlelelwa ukuba seNtabankulu, e-Eastern Cape, ngoMandulo.
UPrincess Sigcau II okwenziwa ngaye imiklomelo unomlando omude kupolitiki yakuleli. Waba nguNdunankulu wokuqala wesifazane eTranskei.
Wayeyindodakazi yeNkosi yamaMpondo uBotha Sigcau owake waba uNdunankulu waseTranskei ngowe-1976 kuya kowe-1978.
Ngasekupheleni konyaka odlule uSisanda upheke wathulula i-albhamu ebidlalwa bukhoma kugqame izinsimbi (accoustic album) lapho epike khona amaciko akuleli nawasekhaya lakhe elisha.
Uthe sekuseduze kukhishwe idokhumentari ekhuluma ngaye athi izobonakala kuNetflix naseziteshishini zethelevishini eSweden. Uhlala nendodana yakhe nesoka.
Ngaphandle kokucula emcimbini yakuleli enjenge-Ugu Jazz Festival, iSundowners Session eBat Centre neDurban Jazz Festival, usebuya koshukumisa inkundla kuVikings Island Roots Reggae Festival, eFrizon, eStorsjoran, eMylthSylth, eKlusFestivalen nakweminye.