OwaKwaMashu uyifuna la i-Olympics
Bonke abadlali banoma umuphi umunxa wezemidlalo banesifiso sokuthi badlale imiqhudelwano emikhulu okubalwa neNdebe YoMhlaba neminye.
Phesheya kwezilwandle iningi labadlali lilibeka ngembaba elokuthi isizini nesizini lifuna ukudlala umqhudelwano we-UEFA Champions League, nabadlali balapha e-Afrika isifiso sabo ukudlala iCAF Champions League.
Ngeledlule umqeqeshi weqembu labadlali abaneminyaka angama-23 uDavid Notoane umemezele iqembu lesibambiso labadlali abangama-78 abasemathubeni okumela iNingizimu Afrika emqhudelwani i-Olympics ozoba seTokyo.
Laba badlali baseqenjini lesikhashana elimenyezeliwe kukhona ononozinti abayisi-8, izitobha ezingama-27, abaseswini bangama-24 nabagadli abali-19.
UNotoane ngokomthetho kulindeleke ukuthi aqoke abadlali abangama-22 kuphela kwabangama-78. Lo mqhudelwano uzoqala mhla zingama-24 kuNtulikazi kuya mhla ziyisi-9 kuNcwaba.
IBAYEDE ibe nengxoxo ekhethekile noThabo Cele ongomunye wabadlali igama lakhe elivelile kubadlali abangama-78. Lo mdlali ogijima eqenjini lasePortugal iC.D Cova da Piedade edlala ngaphansi kwePremier LigaPro, uthe uma engagcina ewudlala lo mqhudelwano kuzobe kufezeka iphupho lakhe.
“Engizimisele ngakho wukuthola indawo eqenjini labaneminyaka engaphansi kwama-23 eliya ku-Olympics. Usuku nosuku ngisebenza kanzima ukuthi uma sekubizwa amagama alaba abazomela iNingizimu Afrika eTokyo, eJapan, nelami libe khona. Ngiyazi ukuthi kunzima yingakho nami ngizimisele ukusebenza ngokweqile,” kusho uCele.
Lo mdlali odabuka KwaMashu kwa-G uyihlikihla maphakathi esiswini. Le ndawo adlala kuyona kubukeka ukuncintisana kukukhulu kakhulu kuyona njengoba bebaningi abadlali abanga nabo futhi iningi labo linekhono eliyisimanga.
Kubadlali abanga nabo uCele kukhona uTeboho Mokoena, uSipho Mbule, uJamie Webber noKamohelo Mahlatsi beSuperSport United, u-Athenkosi Dladla we-University of Pretoria FC, uGrant Margeman noSiphesihle Mkhize beAjax Cape Town, uTashreeq Matthews weVarbergs BoiS yaseSweden, uBongani Zungu we-Amiens SC yaseFrance, uNkosingiphile Ngcobo weKaizer Chiefs, uSibongakonke Mbatha weTS Sporting, uSphelele Mkhulise noThemba Zwane beMamelodi Sundowns.
IBAYEDE ibe isimbuza ngobunzima kanye nasekufundile eminyakeni emithathu asenayo esePortugal. “Kunoma imuphi umuntu ukuqala impilo entsha ikakhulukazi ezweni elisha kunzima kakhulu. Ngifika lapha ePortugal kwaba nzima ukufunda ulimi, kodwa manje sengingasho ngithi ngiwumpetha yize kwathatha isikhathi ukulazi. Ukudla kwalapha nakho kwaba nzima ukukujwayela, kumnandi kodwa iqiniso lithi ngeke kukudlule okwalapho kwelakithi, kuyimanje ngikhumbule uphuthu nobhontshisi. Isimo sezulu sala sehlukile kunalapho eNingizimu Afrika, lapha ngeke nangengozi ugqoke into emfishane ehlobo,” kusho uCele othi usefunde nolimi lwaseChina.
UCele oneminyaka yobudala engama-23 ukuqala kwakhe unobhutshuzwayo wadlalela Induna Academy yaKwaMashu, iKwaMashu-All Stars (isadlala ku-ABC Motsepe League) neKZN Academy okuyiyona eyamtholela amadlelo aluhlaza. Waba ngumdlali wokuqala kule nkulisa (iKZN Academy) ukuthi ayodlala phesheya kwezilwandle. Lo mdlali wathi efika ePortugal izindaba zakhe zaphathwa uJorge Mendes oyiagent kaRonaldo (Cristiano) nabanye abadlali abaseqophelweni eliphezulu.
Kuyimanje izindaba zakhe ziphethwe iSoccer Soul.
Njengoba esedlalela iCova da Piedade, waqale wadlalela iReal S.C neBenfica B. Yize bukhona ubudlelwano obukhona phakathi kweKZN Academy namaqembu asePortugal kodwa uNdosi (abakwaCele) uyena owavulela abanye abadlali iminyango. Kulabo badlali kubalwa uSibusiso Shabane wePortimonense, uSphephelo Sithole weBelenences SAD, uNkanyiso Shinga weVictoria Setubal U/19, uMhleli Mabuza weJuventus de Evora noSimo Mbhele weSertanense.
Lo mdlali ozifela ngoReneilwe Letsholonyane odlalela iHighlands Park kuleli, ngowezi-2017 wayeyingxenye yeqembu lesizwe labangaphansi kweminyaka engama-20 elaliyodlala iNdebe YoMhlaba eSouth Korea. Waphinde wabizwa eqenjini leCOSAFA Cup ngowezi-2018. Ubeyingxenye yeqembu ebelihlungela ukuya khona eToyko.
IBAYEDE imbuza ngokuthi izinkulisa zasePortugal nezalapha eNingizimu Afrika zehluke kanjani uthe: “Ngicabanga ukuthi izinhlaka zokuthuthuka lapha zihleleke kahle kakhulu, amakilabhu amaningi aqala ku-Under 6 kuze kube yiqembu elikhulu. Kusukela ezinkuliseni abadlali bayazimisela, kanti eNingizimu Afrika amaqembu aqala ko-Under 11. Izinkulisa zalapha zinazo zonke izinto ezidingekayo ukuze izingane zizofunda zisencane, iKZN Academy lokho ekuzamayo. Ngiqhamuka elokishini elinenqwaba yabadlali abanekhono kodwa bangafike bathwale kanzima lapha, okwenza lokho ingoba abadlali balapha basebenza njengezigqila. Ngisho nabadlali abadala kunathi (baseNingizimu Afrika) yingakho bethwala kanzima uma sebedlala phesheya kukhonye kakhulu abakwamanye amazwe ase-Afrika,” kusonga uNdosi.
Uma uNdosi engadlala ku-Olympics uyoba ngowesithathu odabuka KwaMashu ukudlala lo mqhudelwano. Abanye abadlali abawudlalile uSiyabonga “Bhele” Nomvethe ngonyaka wezi-2000 noMenzi Masuku owudlale ngowezi-2016.