Ichilo omunye umasipala omkhulu ephathwa ngumlawuli
UHulumeni waseGauteng uthi ubeke phambili izakhamuzi zawo esinqumweni sawo sokuhlakaza uMkhandlu waseTshwane nokuwufaka ngaphansi komlawuli.
Izolo ngoLwesine uNdunankulu waseGauteng uDavid Makhura noMphathiswa Wozokubusa Ngokubambisana kulesiya sifundazwe, uLebogang Maile, bathe uMkhandlu uzohlakazwa, ufakwe ngaphansi kukamlawuli bese kubanjwa ukhetho esikhathini esiyizinsuku ezingama-90. UNdunankulu uMakhura ukhale ngokungaphathwa kahle kwalo Mkhandlu nokungahlonishwa komthetho wokuphathwa kwezimali, iMunicipal Financial Management Act, ukusetshenziswa kwemali kungagunyaziwe nokumoshwa kwayo.
Uphinde wabalula ukuqokwa kwezimeneja eziphezulu ngendlela okungeyiyo nezinkinga ezilokhu ziqhubekile ekuhlinzekweni komphakathi ngamanzi okuphuza ahlanzekile nokuqoqwa kukadoti.
“Lo Mkhandlu ubulokhu unezinkinga futhi lokhu kuyabonakala ngendlela izinga lawo elehle ngayo. Izakhamuzi zithwele kanzima ngalesi sikhathi amaqembu epolitiki elwa eMkhandlwini nasezinkantolo,” kusho uNdunankulu uMakhura ekhuluma nabezindaba.
Kulo Masipala okhungethwe yizinkinga, alikho iqembu lezepolitiki elineningi kuwona kanti ukuhlala kwawo bekulokhu kuhlangabezana nezinkinga kusukela ubudlelwano phakathi kweDemocratic Alliance (DA) ne-Economic Freedom Fighters (EFF) babamuncu ngowezi-2019. Kusukela lapho i-EFF ne-African National Congress bazame kaningi ukugudluza uSomlomo woMkhandlu uKatlego Mathebe oyilungu leDA. Lo Mkhandlu usale ungenayo iMeya kusukela kwehla uMnu uStevens Mokgalapa zingama-26 kuNhlolanja nonyaka emuva kokubuya ekhefeni kulandela ihlazo angena kulona kuputshuka inkulumo yakhe eqoshiwe ayeyenza nelinye ilungu leDA. Kukhona asebeqagula ukuthi lolu daba lungase luphelele enkantolo ngoba bekholwa ukuthi iDA ngeke iluyeke kalula kanjalo.
NgoLwesine olwedlule lo Mkhandlu kwakumele unqume ukuthi ngabe uyakuvuma yini ukwelulwa kwenkontileka yeMeneja kaMasipala esabambile uNkk u-Augustine Makgata kodwa kwagcina kungenzekanga.
USihlalo weDA eGauteng, uMnu uMike Moriarty, ukhwele wadilika ku-ANC wayisola ngokuzama ukuthatha amandla okuphatha lo Mkhandlu ngendlela engekho emthethweni. I-ANC yayihola lo Masipala kodwa wayiphunyuka ngokhetho loHulumeni Bezindawo ngowezi-2016 wawela ezandleni zeDA.