Imfundiso yamaRoma imenze waba yisishabasheki uFlorence Mkhize
Kuqanjwe ngaye ibhilidi okukhokhelwa kulo ugesi kuMasipala weTheku ngoba wayenamagalelo ababazekayo uMama uMkhize
Kuqanjwe ngaye ibhilidi okukhokhelwa kulo ugesi kuMasipala weTheku ngoba wayenamagalelo ababazekayo uMama uMkhize
Inxanxathela yebhilidi elisemgwaqeni u-Anton Lembede, enkabeni yeTheku, okukhokhelwa kulona ugesi liqanjwe ngoMama uFlorence Mkhize owayaziwa kakhulu ngokuthi nguMama uFlo. Yiqhawekazi elalwela inkululeko leli, lilwa nenqubo yobandlululo kunzima. Wayengumgqugquzeli enyunyaneni iSouth African Congress of Trade Unions (SACTWU), ekanye noMnu uSteve Dlamini, uMnu uHarry Gwala nabanye.
Ibhilidi okuqanjwe ngalo uMama uFlo, lalikade liqanjwe ngeMeya yaseThekwini yakudala, uMnu uMartin West. UMama uFlo uzalelwe eMzinto ogwini oluseningizimu yeKwaZulu-Natal ngonyaka we-1932. Uqale ukuzibandakanya nepolitiki eneminyaka eyi-16, ekhuthazwa ngamaRoma aKhatholika, kwelakubo lapho azalelwa khona. Eqeda ukufunda ufudukele eThekwini ngeminyaka ye-1950, washada noMnu u-Amos Mswane. UMama uFlo, ngomunye wamavolontiya eNkosi u-Albert Luthuli, njengoba babesekhaleni emkhankasweni weDefiance Campaign, wango we-1952. Kulowo mkhankaso abantu babedelela yonke imithetho eyayishaywa ngumbuso wobandlululo. Isithombe sikaMama uFlo eshisa udompasi wakhe, sasabalala umhlaba wonke. Ngowe-1954, uMama uFlo waba ngomunye wabasunguli beFederation of South African Women (FEDSAW), wabasebuholini bayo eThekwini namaphethelo.
Ngowe-1956 kube nenhlabaluhide, ibheke e-Union Building ePretoria, abesifazane bekhononda ngokuphathiswa odompasi. Ngebhadi ibhasi elalihamba omama uFlo, libheke ePretoria, ngalelo langa lango we-1956 ziyisi-9 kuNcwaba, lavinjwa ngamaphoyisa aliphindisela emuva.
Wayekhona emkhankasweni wokuduba amazambane ngowe-1957. UHulumeni wobandlululo ushaye umthetho iSuppression of Communism Act, uMama uFlo waphinde wavalwa umlomo ngowe-1968. Nguyena uMama uFlo benoSolwazi uFatima Meer, abaqoqa izimali ukuze kwakhiwe iPhambili High School, eMbilo, eThekwini. Lesi sikole besenzelwe izingane zezishoshovu zepolitiki ebezibandlululwa ngenxa yeqhaza labazali bazo emzabalazweni. Yibona oMama uFlo noSolwazi uMeer, abaya e-Amsterdam baqoqa izimali khona zokwakha lesiya sikole. Ngesikhathi i-United Democratic Front (UDF) yethulwa ngokusemthethweni, uMama uFlo waba sebuholini bayo eThekwini. Ngesikhathi eshona uMama uFlo ngowe-1999, ubeseyikhansela lakuWard 75, eLamontivile, eningizimu yeTheku. Uphendule umuzi wakhe waba yikhaya lapho “amaphekulazikhuni” ayecasha khona. UNgqongqoshe wamaphoyisa kuZwelonke, uMnu uBheki Cele, ngomunye wabantu ababecasha khona, besasebenza umshoshaphansi noMkhonto Wesizwe (uphiko lwezempi lweANC). Naye uMama uFlo ubesebenza umshoshaphansi ne-African National Congress (ANC). Ubeyithanda imfundo futhi eyikhuthalele, lokhu kubonakale ngoba ubesemakomidini alawula izikole ezahlukene eThekwini. Ngowe-1998 i-ANC Women’s League imhloniphe ngendondo yobuqhawe. UMnu uNelson Mandela, umhloniphe ngendondo yeSouth African Gold Medal ngowe-1999.
Wayeyikhomanisi, engaphuthi ezingqungqutheleni zeSouth African Communist Party (SACP). Ngeminyaka ye-1970 wabangomunye wabasunguli beRelease Mandela Campaign, eyayiholwa nguMhleli wamaphephandaba, uMnu uPercy Qoboza. KuFEDSAW wayenoMama uDorothy Nyembe noNkk uHelen Joseph. (nabo abangasekho). Usebenzile nomndeni wakwaMxenge, wakwaShusha, oMnu uMsizi Dube wodumo lweAsinamali, uMama uDorothy Nyembe, uMntwana uCyril Zulu wakwaDeda nabanye.
Umyeni wakhe kwakungeyena umuntu wepolitiki kodwa ubemvumela ahambe zonke izindawo ngisho nasemazweni aphesheya ngenxa yomzabalazo, emeseka. Amadodana akhe uMandla noThulani nabo sebashona, kwasala amadodakazi amabili. UMama uFlo ulwele ukuthi kwakhiwe isikhungo sokuqwashisa nokunakekela abahaqwe igciwane lengculaza nesandulelangculaza eLamontville. Lelo phupho lakhe lagcina selifezekile noma yena wayengasekho emhlabeni. Udlule emhlabeni ziyisi-7 kuNtuikazi ngowe-1999.
Abaholi bophiko lwabesifazane kwaANC, esingabala kubo oNkk uWinnie Madikizela-Mandela (ongasekho), uNkk u-Angie Motsekga, uNkk Nosiviwe Maphisa-Nqakula, uNks Bathabile Dlamini, nabanye, bebemthatha njengesibonelo esihle kwabesifazane abasebuholini uMama uFlo. Yona le ntombi yaseMbo, njengoMama u-D (uDorothy Nyembe), bahlushwe kakhlu ngamaphoyisa ezomoya eThekwini. Uma kuzwakala ukuthi kukhona “iphekulazikhuni” elikhona eNatal, kwakugaselwa emzini kaMama uFlo noma kaMama u-D, kuqala kupheqululwe khona.
UMama uFlo ukhethwe waba yiKhansela kuMasipala weTheku, ngesikhathi usuhlelwa kabusha uhambisana nezakhiwo zentando yeningi. Isigceme ayeyiKhansela kuso, u-Ward 75, eLamonti. Indlela eyekhuthele ngayo uMama uFlo ibibabazeka, bekungathi kusebenza itshitshi uqobo ngoba ubevuka ekuseni ayosebenzela umphakathi, aze aphumule phakathi kwamabili. Ubumthola ehlangene nemiphakathi yaseMjondolo, elalela izinkinga zayo. Nasehositela eWema, ubumthola khona ehamba noMntwana uMfanafuthi Cyril Zulu, waKwaDeda, belalela izinkinga zabantu abahlala emahostela, ngenhloso yokubasiza.
Uyokhumbuleka uMama uFlo uma kunemingcwabo, ubefika qathatha kulowo muzi okushonwe kuwo esigcemeni sakhe, ubengagcini nje ngokubhonga emswaneni, kodwa ubefaka isandla. Miningi imindeni nabantu eLamontville eyangcwaba izihlobo namalungu emindeni yawo ngosizo ayeluthola kuMama uFlo. Ubeba khona ngisho nasemilindelweni yaleyo mizi eshonelwe.
Uma kukhona umfundi ophase kahle ebangeni le-12, kodwa engenayo imali yokuqhubeka nokufunda, uMama uFlo ubeyazi iminyango obekufanele angqongqoze kuyona, iphume ingane iye esikoleni. Namanje umphakathi waseLamontville usasho ukuthi amagalelo kaMama uFlo awalingananga nawabanye abantu.