Isihlangu sivika ngani: Onogada abavala okubi bazithola behlaselwa
Ukuba phezulu kwezibalo zobugebengu eNingizimu Afrika kuchaza ukuthi impilo yalabo abangonogada isengcupheni uma benza umsebenzi wabo, kodwa bayaya kulo mkhakha wokusebenza ngendlela yokubalekela ububha. Iqiniso lithi basuke bengazi ukuthi bayozifaka kolunye usizi lapho abathi bayothola khona okungcono.
Iqiniso lithi iNingizimu Afrika iyizwe elikhombisa izibalo eziphezulu zobugebengu ngendlela yokuthi ngisho izakhamuzi azisazizwa ziphephile kuleli lizwe.
Ezindaweni lapho abaningi bethi kuhlala abadla izambane likapondo noma emahhovisi ezinkampani, kujwayele ukuba kutholakale onogada abaqinisekisa ukuphepha kwaleyo ndawo nokuvikeleka kwayo. Ukuba phezulu kwezibalo zobugebengu eNingizimu Afrika kuchaza ukuthi impilo yalabo abangonogada isengcupheni uma benza umsebenzi wabo, kodwa bayaya kulo mkhakha wokusebenza ngendlela yokubalekela ububha. Iqiniso lithi basuke bengazi ukuthi bayozifaka kolunye usizi lapho abathi bayothola khona okungcono.
Uma kukhulunywa kufanele kube nokuvumelana ukuthi yebo bakhona abezinye izinhlanga kulo mkhakha wonogada kodwa iningi ngaboHlanga ngakho-ke uma kunezinkinga yibo kanye abasuke bebhekene nazo. Labo nogada bayisithombe somthetho kanye nokuhleleka kodwa umbuzo okhona ngothi njengoba beyisihlangu salokhu esisuke sikuthanda, bona bavika ngani uma izinkinga sezibahlasele uma benza umsebenzi wabo wokuba yizihlangu zethu.
ElaboHlanga libe nengxoxo ekhethekile nomunye ongunogada ongathandanga ukuba igama lakhe lidalulwe othe: “Sisebenza lapha ngoba sizama ukwenza impilo ibe ngcono emindenini yethu, konke lokhu sikwenza singazi ukuthi njengoba sibalekela izinkinga kwalapho esiyakhona zikhona. Mina ukusebenza amahora amaningi akuyilutho inqobo nje uma ngizoholelwa ngendlela efanele kodwa okungiphatha kabi ukusetshenziswa i-overtime ngaphandle kwentando yakho bese ungakhokhelwa leso sikhathi osuke usisebenzile. Okunye okusihlasele kulo mkhakha isimo noma izenzo ezimbi zokuthi sihole imali engaphansi kwaleyo evunywa umthetho.” Khona ziningi izinkulumo ezithi siyanda kulo mkhakha isenzo sokukhokha imali engavunywa nawumthetho ngale ndlela yokuthi sekuze kwajwayeleka. Elinye iqiniso elingenakuphikiswa ukuthi umzimba womuntu uyakudinga ukuphumula uma lowo muntu kusadingeka ukuthi aqhubeke enze umsebenzi ngendlela elungile futhi eqotho, ngeke ulindele ukuthi umuntu asebenze amahora ali-10 esebenza, aphumule ali-10 aphinde abuye ayosebenza amanye ali-10 njalo ngesonto.
ElaboHlanga libuza unogada ngokuthi ikhona yini inyunyana abangaphansi kwayo ukuze bezokwazi ukusizakala kulolu sizi ababhekene nalo, uphendule wathi: “Ayikho inyunyana esingaphansi kwayo kule nkampani engisebenza kuyo kodwa asebeke bazama ukuyijoyina sebaxoshwa bonke.” Lokhu akushoyo kuveza isithombe esikhona kodwa esinganakiwe sokuthi e-Afrika eseNingizimu izinkampani zonogada ezizimele azizifuni izinyunyana, okuvelayo lapha ukuthi kukhona lezi zinkampani ezikwenzayo okungalungile ngoba ukuphuca umuntu into angazivikela ngayo kuchaza ukuthi khona ofuna ukumenza noma osumenza khona. Unogada ebuzwa ngokuphepha kanye nokuzivikela kwabo nokuthi uma sekwenzekile walimala emsebenzini inkampani ikusiza ngani, ubeke wathi: “Thina sinetwo way radio (u-ova) nayo okungelelula ukuyisebenzisa uma sezikubambile izigebengu.
Lapha kule nkampani yethu ngokwazi kwami sonke asibhalisiwe ngokusemthethweni ngakho uma ulimala emsebenzini inkampani ikuthatha ikuyise esibhedlela sikaHulumeni ingakhokhi lutho nje.
Okwake kwenzeka komunye uzakwethu egwazeke kanzima, wathathwa wayiswa esibhedlela sikaHulumeni kwangababikho nowenkampani owasala wamubheka ukuthi kuhamba kanjani.”
Enikwa ithuba lokuba aveze abona ukuthi kuyadingeka noma kubalulekile ukuba kwenziwe ukulwa nalolu sizi oluhlasele lo mkhakha, uthe:”Besisacela ukuvikeleka kubaqashi bethu abasicindezelayo, abasikhokhela imali engavunywa nawumthetho, abaqasha abafowethu ngokungekho emthethweni ukuze bezokwazi ukubaxhaphaza kanye nalabo baphathi abangayilandeli imithetho yezisebenzi ebekiwe ezweni.”
Lezi zinkinga ezibhekene nonogada akufanele sizibuke njengezabo kuphela kodwa njengezabo bonke aboHlanga ngenxa yokuthi iningi labo lisebenza kuwo lo mkhakha ngisho nangezikhathi zobandlululo abazali baboHlanga babenza wona lo msebenzi. Imizi eminingi imile nje yilokho okuncane okwakuphuma kuwona lo mkhakha ngalezo zikhathi zobandlululo, ngakho-ke aboHlanga abangavumi lokhu kube yisithombe salaba abathize kodwa kube ngesabo uqobo.