Inkakha kwezikanobhutshuzwayo ihlela ukudodisa abadlali
Isihlabani sebhola likanobhutshuzwayo esidlale emazingeni aphezulu emhlabeni, uSibusiso “Rhee” Zuma, sizimisele ngokufezekisa isisho esithi indlela ibuzwa kwabaphambili. Ulindeleke ukuthi amemezele ukwakhiwa kwenkulisa yezemidlalo eThekwini.
Ngesizini yangowezi-2015/16 baningi abathi iMoroka Swallows FC ngeke iphinde ibonakale ebholeni elikhokhelayo.
Okwakwenza lokho ukuthi ngaleyo sizini leli qembu elibalwa namadala kuleli lagencwa yizembe kuNational First Division (NFD) esiyaziwa ngokuthi iGladAfrica Championship.
Ukwehla kwayo kwasho ukuthi isiyodlala ku-ABC Motsepe League eGoli. Ngesizini edlule kumangale abaningi leli qembu elaziwa ngokuthi iZinyoni libuyela kuGladAfrica Championship.
Muva nje indlela elenza ngayo libukeka lizimisele ngokuthi libuyele ku-Absa Premiership. Njengoba sekuyiwa ngasekusongweni kwesizini, leli qembu lihlezi endaweni yesibili kulogi, lilandela i-Ajax Cape Town esesicongweni ngamaphuzu amahlanu.
IZinyoni zinamaphuzu angama-40 kuthi i-Ajax Cape Town ibe nangama-45 sekudlalwe imidlalo engama-22 okusho ukuthi kusele eyisi-8 ngaphambi kokusongwa kweligi. Okubukeka kuyikho okusiza iSwallows FC yenze kahle ukuthi inabadlali abanamava.
Kulabo badlali kubalwa uVuyo Mere owazakhela udumo kuMamelodi Sundowns nakuPlatinum Stars, uPhumelele Bhengu owayeqobela amagoli kuThanda Royal Zulu, uLebohang “Cheese Boy” Mokoena owadlalela i-Orlando Pirates neSundowns, uThapelo Tshilo owayevala emuva kuJomo Cosmos noSibusiso Masina owayekuCape Town City.
Nasezintini iphethe unozinti oke wagijima ku-Absa Premiership, uVirgil Vries, owavimbela iMaritzburg United kanye neKaizer Chiefs.
USihlalo waleli qembu nguMnu uPanyaza Lesufi kuthi uMengameli walo kube uMnu uDavid Mogashoa.
Lezi zikhulu zifike zaguqula kakhulu izinto njengoba azipheli ezinkundleni zokuxhumana zazisa abalandeli beqembu nabathandi bakanobhutshuzwayo jikelele ngokwenzakalayo esidlekeni seZinyoni.
Uma iSwallows FC ihluleka ukufinyelela endaweni yokuqala kulogi, izothola ithuba lokuthi idlale amaplay-off lapho kuhlungwa ozonyukela ku-Absa Premiership.
Amaplay-off adlalwa iqembu elisuke lilale endaweni yesibili nelilale endaweni yesithathu kuGladAfrica Championship neliqede lisendaweni ye-15 ku-Absa Premiership.
Emdlalweni eyisi-8 yeSwallows FC esele, izotholana phezulu nePretoria University ekuhambeni, uThongathi FC ekhaya, iTS Sporting ekuhambeni, iReal Kings ekhaya, i-Ajax Cape Town ekuhambeni, iSteenberg ekhaya, iRichards Bay FC ekuhambeni neTshakhuma Tsha Madzivhandila ekhaya.
Leli qembu eliqeqeshwa uBrandton Truter, lilandelwa ngemumva Uthongathi FC olunamaphuzu angama-38.
Uthongathi FC oluteketiswa ngokuthi iCane Cutters kukhulunywa nje ngabe ilona oluhlezi esicongweni. Sekudlalwe imidlalo cishe eli-15 beluzihola phambili ngamaphuzu ayisi-9 kodwa manje selusendaweni yesithathu.
Nasemsileni welogi isimo sishube kakhulu isimo, iRoyal Eagles ebambe ibhuleki kule midlalo eyisi-8 esele kumele inqobe okungenani emihlanu uma isafuna ukugijima kule ligi ngesizini ezayo. Leli qembu eliphethwe nguSbu Mpisane, linamaphuzu ali-15 emidlalweni engama-22.
Amanye amaqembu asengozini yokudliwa yizembe uma engawakhuphuli amasokisi, iMbombela United enamaphuzu angama-20 endaweni ye-15, iJomo Cosmos elele endaweni ye-14 ngamaphuzu angama-23 kanye neTS Sporting esendaweni ye-13 yona enamaphuzu angama-23.
Isiyonke imidlalo yeGladAfrica Championship ihlelwe kanje
Namuhla
ICape Umoya United ne-Ajax Cape Town (e-Athlone Stadium)
Kusasa
IFree State Stars neMbombela United (eGoble Park)
ITshakhuma Tsha Madzivhandila neTS Galaxy (eThohoyandou Stadium)
ITS Sporting noThongathi FC (eKabokweni Stadium)
IReal Kings neJomo Cosmos (eChatsworth Stadium)
NgeSonto
IPretoria University FC neSwallows FC (e-ABSA Tuks Stadium)
IJDR Stars neSteenberg United (eSoshanguve Giant Stadium)
IRichards Bay neRoyal Eagles (eMhlathuze Sports Complex)
* Yonke le midlalo izoqala ligamenxe elesithathu ntambama