KWEZINYE IZINGXENYE
ETurkey naseSyria, Amabutho aseTurkey kuleli sonto adubule indiza yezempi ebithunyelwe uHulumeni waseSyria ebindiza phezu kwesifunda i-Idlib. Lokhu kwenzeka nje elinye idolobha elisenyakatho mpumalanga yeSyria liwele ngaphansi kokulawulwa umbutho wezempi kaMengameli uBashar al-Assad.
Besekungokwesithathu ezinsukwini ezintathu ukuthi kudutshulwe indiza emuva kokuba iTurkey nayo idubule izindiza ezimbili zaseSyria ngeSonto. UMnyango Wezokuvikela eTurkey iziqinisekisile lezi zindaba wathi indiza iL39 yaseSyria idutshuliwe. Khonamanjalo, uHulumeni waseSyria udle idolobha elibalulekile iSaraqeb. Ngenyanga edlule iyodwa, leli dolobha selishintshe izandla zokuphathwa. Kusukela ngoZibandlela wonyaka odlule, uHulumeni waseSyria uqale kabusha ukudla ngempi isizinda sezimbangi zayo i-Idlib yesekwa yiRussia. I-United Nations ibika ukuthi bangaphezulu kwezi-800 000 abantu asebephenduke ondingasithebeni kuleliya lizwe kulezi zinyanga ezimbili ezidlule
Kwa-Israel, UNdunankulu wakwa-Israel uMnu uBenjami Netanyahu wehlulekile ukuthola isibalo esiningi sokwakha uHulumeni okhethweni obelubanjwe kuleliya zwe. NgoLwesithathu ukuvumile uNetanyahu, osehole leliya zwe isikhathi eside, ukuthi akukutholanga ukwesekwa ukuze akwazi ukwakha uHulumeni ngaphandle kokubambisana nezimbangi zakhe. Ukhwele wadilika ku-Arab Party, okungeyesithathu ngobukhulu ePhalamende lakuleliya zwe, ayibize njengento engekho. Ngemuva kokwehluleka ukwakha uHulumeni wakhe emuva kokhetho eminyakeni emibili nezinkinga zokuphambana nomthetho abhekene nazo, uNetanyahu ubethemba ukuthi uzonqoba ngamalengiso okhethweni obelungoMsombuluko.
ELibya, Ithikamezekeli imizamo yokudala uxolo eLibya kulandela ukwesula kwesithunywa se-United Nations (UN) kuleliya zwe, uMnu uGhassan Salamé, esikhale ngesimo sempilo. Ubesebe kuleliya zwe iminyaka emibili. Lokhu kuyizinkomba zokuthi wehlulekile ukunxenxa abanamandla ukuqeda le mpi eqale ngoMbasa wonyaka odlule ephakathi kwamabutho eNational Army aholwa nguKhalifa Haftar noHulumeni othathwa ngokusemthethweni yi-UN oholwa nguFayez al-Sarraj ozinze eNhlokodolobha yakuleliya zwe iTripoli.
Ngeledlule uSalamé uthe amazwe ayizikhondlakhondla awakugcinanga ukuzibophezela kwawo akwenza engqungqutheleni yoxolo eyabe ibanjelwe eBerlin ngoMasingana nonyaka ukwelekelela imizamo yokudala ukuthula eLibya. Isinyathelo sakhe sokwesula kubukeka sizolandelwa ukuqonga kodlame lwezepolitiki nokuqhubeka kokuvalwa kwesizinda sikawoyela osekuholele ekutheni kume ukukhiqizwa kwawo kuleliya zwe.
ENingizimu Afrika, Umangaze abaningi uMvikeli WoMphakathi, u-Advocate uBusisiwe Mkhwebane, ngesikhathi ethi ngeke aze aphume kulesi sikhundla kuze kube kuphela ihlandla lakhe. Usho lokhu nje iqembu eliphikisayo iDemocratic Alliance (DA) limfuna ephumile kulesi sikhundla. “Angiyi ndawo, ngizosebenzela abantu bakuleli kuze kube unyaka wezi-2023,” kusho uMkhwebane kade ekhuluma nesiteshi somsakazo iPower FM.