Ukucwaswa kwaboHlanga kwezokushushisa kudla lubi
Izinsolo zokucwaswa nokuhlukunyezwa kwezimantshi zaboHlanga sezikhonjwa nakwezokushushisa njengoba nakhona sekukhalwa esifanayo.
Ngasekupheleni konyaka odlule elaboHlanga libike kabanzi ngesililo esikhihlwa yizimantshi zaboHlanga ikakhulukazi zaKwaZulu-Natal ezikhomba ngenjumbane abaphathi bazo okungabohlanga lwamaNdiya nabamhlophe ngokubacwasa ngokwebala, ukubahlukumeza nokubakhipha inyumbazana uma sekuziwa ngasekukhushulelwaneni ezikhundleni eziphezulu.
Ukuzazelana phakathi kwalezi zinhlanga kuholele ekutheni izimantshi zaboHlanga zibhalele uNgqongqoshe Wezokuhlumeleliswa Kwezimilo, uMnu uRonald Lamula neKhomishini Yezimantshi, zibacela ukuba bangenelele ngokukhulu ukushesha ukugwema ukuba isimo singaphumi esandleni njengoba bese zesabise nangokubeka phansi amathuluzi ukuzwakalisa ukukhathazeka kwazo.
Kuyaziwa ukuthi ezokushushisa nezimantshi yizona okulindeleke ukuba zijezise labo abatholakala becwasa abanye kodwa manje kuyadida uma lo mkhuba obekwaziwa ukuthi sewangcwatshwa kudala usubikwa nakuyona le mikhakha ebhekelele ukugcinwa koMthethosisekelo.
Lokhu kugqame kakhulu encwadini ezungeza ezinkundleni zokuxhumana lapho abashushisi boHlanga kuzwelonke bezwakalisa ukukhala ngabakubize, phakathi kokunye, ngokucwaswa nokujijimezwa ngabaphathi babo bezinye izinhlanga.
Ngokwalo mbhalo iBAYEDE enawo, abashushisi boHlanga badalula nokuthi abamelelekile kahle uma sekuziwa ngasekuphatheni izikhundla eziphezulu.
“Indlela okumeleleke iningi lezikhulu eziqhoqhobele izikhundla eziphezulu kwezokushushisa iphambene nomthetho obhekelele ukumeleleka ngokulinganayo kwazo zonke izinhlanga,” kufundeka umbhalo.
Kuvela ukuthi uhlanga lwamaNdiya luhamba phambili kwabaqhoqhobele izikhundla balandelwe ngabamhlophe.
“AmaNdiya asezikhundleni eziphezulu ngama-67% kuthi abamhlophe babe ngama-23%. Emsileni kube ngaboHlanga abanesibalo esilinganayo nabamaKhaladi,” kufundeka incwadi.
Le ncwadi iqhuba ithi: “Ama-90% ezisebenzi ezixoshwayo ngezizathu ezingekho ngezaboHlanga.”
Iphinde idalule nokunye okuveza isithombe esingesihle njengoba kuvela ukuthi cishe kuzo zonke izifundazwe izinhloko zezokushushisa ngezohlanga lwamaNdiya. Lapha kubalwa iKwaZulu-Natal, i-Eastern Cape, iFree State, iGauteng nezinye ezimbili ezingadalulwanga.
“Sihlale sihlukunyezwa futhi abashushisi abasebancane baholelwa imali eyizi-R300 000 ngonyaka kodwa labo asebenkantshubomvu bona baxebula isigidi nengxenye samarandi (R1.5m) ngonyaka ekubeni bengawenzi ngisho umsebenzi wasezinkantolo. Ukuhlukunyezwa kwethu sekwaba ngokwemihla ngemihla. Baqasha ngokwebala esikhundleni sokulandela amava,” kusaqhuba incwadi.
Abashushisi boHlanga bafunga bayagomela ukuthi bazolwa nalo mkhuba kuze kube uyaphela.
“Alikho ihhovisi esingalithintile ngalokhu kodwa kujike kufane nokuthela amanzi emhlane wedada. uMqondisi Wezokushushisa kuzwelonke, uNkk uShamila Batohi noNgqongqoshe uRonald Lamula, abafuni ukusinika indlela. Kunohlelo olucashile lokucekela phansi aboHlanga. Manje sesicela umhlangano nabeHhovisi likaMengameli futhi asinankinga ngisho angabakhona uNgqongqoshe noMqondisi Wezokushushisa. Sizizwa sihlukumezekile futhi sidayiswe uHulumeni wethu. AboHlanga bayahlupheka futhi kufufusa nesimo esimuncu,” kuphetha incwadi.
Imizamo yeBAYEDE yokuthola ukuphawula koMnyango yehlulekile njengoba owukhulumelayo, uMnu uChrispin Phiri, eshayelwe ucingo futhi wathunyelelwa imibuzo kodwa kuze kwashaya isikhathi sokushicilela engaphendulanga.