Kwashiya uMgungundlovu
wonke namaphethelo uthuthumele ukubulawa kungazelele kukaMnu uReginald Bhekumuzi “Reggie” Hadebe, uqweqwe lukathisha, neSekela likaSihlalo we-African National Congress (ANC), eNatal Midlands. UBhungane wadutshulwa wafa, elalelwe unyendle emajikeni aseMkhomazi, phakathi kweXobho neRichmond, mhla zingama-27 kuMfumfu ngowe-1992. Wayephuma emhlanganweni wokuphemba ukuthula eXobho, owawuphakathi kwabaholi be-ANC neNkatha. UReggie, ubeyilungu leNkatha Yenkululeko Yesizwe ngeminyaka ye-1970 esengumfundi eNyuvesi yaKwaZulu (oNgoye). Kuthe sekusungulwa i-United Democratic Front (UDF) ngowe-1983, wabayilungu layo lokuqina. Ngesikhathi kuphuma uMnu uNelson Mandela, ejele ngowe-1990, uBhungane ubesebuholini be-ANC eNatal Midlands, eyiSekela likaMnu uHarry Themba Gwala. Ubulawa nje uBhungane, ubenezinhlelo zokuthi kube nokuthula phakathi kwe-ANC neNkatha eMidlands. Ubulawe ehamba neMnu uJohn Jeffries, oseyiPhini likaNgqongqoshe Wezobulungiswa Nokuhlunyeleliswa Kwezimilo namhlanje, eNingizimu Afrika. INkosi uXhawulengweni Mkhize (engasekho) yaseJolivet, noMnu uBheki Mkhize, bakhonjwa ngenjumbane nguMnu uSibusiso Richard Mbhele, odonsa udilikajele neminyaka engama-31 ejele eWestville, ngesikhathi evele kwiKhomishini Yamaqiniso Nokubuyisana ngowe-1999, ukuthi yibona laba abakha itulo lokuthi uBhungane asocongwe. UBhungane ubulawa nje, ubefundisa eSt Mary’s, eXobho.