Ubunye bungasiweza ngelibanzi
Isilwane esingumuntu sinamaphutha ejwayelekile. Kuke kuthi lapho kumele aqonde into noma inkulumo ngqo bese yena ezakhela enye indlela yokubhekana nesimo, anyanyalate. Kupolitiki nakosopolitiki lokho kwejwayelekile omunye aze athi uma ungakwenzi abone sengathi kukhona okungalungile ngawe. Enkulumeni yaso iSILO esiyishicilele ekhasini lesi-9, OMdala ukhuluma izinto ezimqoka ezingaphezu kwepolitiki yamaqembu.
Okokuqala esikuqaphele kule nkulumo yimizamo yoMdala yokuhlanganisa imihlambi eyalanayo, okungamaqembu aphikisayo kanye nalelo elibusayo esho khona ukuthi ukubambisana kwabo kungahle kuweze lesi sifundazwe kokuningi. Kwabanye ngonyaka owandulela ukhetho le nkulumo yobunye ibingadingeki ngoba ukugula kwezimbangi kungasho ukunqoba nokwenza ukubambisana kubemuke lelo thuba. Kepha umbono neseluleko soMdala kasibuki imanje kunalokho sibukela ikusasa. Luzodlula ukhetho kepha indlala nobubha kuyosala nathi uma singasebenzi ngokubambisana.
UHulumeni uyadinga ukulekelelwa ngoba lapha sikhona ngokwezibalo zomnotho akuyona indawo enhle. Sekungayisithutha impela esingathi sisemkhunjini phakathi nolwandle nesitha saso bese sicabanga ukuthi nxa umkhumbi ungashona phansi ngalapho kunesitha sakhe yena uyosinda. Lolu lwandle esikulo lwendlala nokuzika komnotho alukhethe qembu, uma luphakama lizosigwinya sonke.
ISILO sikhulume ngalokho esikubize ngomoya waseSandlwana nesithe lesi yisimo lapha izingane zendoda (okungamalungu esizwe) zifikelwa yisikhathi lapho zedlulisa lapho zingaboni ngaso linye kunalokho zibuthane kulokho okuzohlenga umndeni. Uma sikwenza lokho okushiwo yiSILO siyobe singaqali njengoba umlando ufakaza ukuthi njalo uma sibhekene nesitha ndawonye siyaphumelela. Indaba iqala lapha sesihlukana phakathi siphendukelana.
Njengephephandaba siyavumelana neSILO kulokhu, sisitusa ngokuhlala endaweni yaso, ngokusihola nokunganyanyalati ngalokho okuyizingqinamba ezikhungethe isizwe. Bekungabuye kube ngubani Hlanga Lezwe obengaba lapho umi khona? Kuyoba kuhle ukuthi sonke sininge ngalokho okushiwo ngoMdala, ake ufunde inkulumo le ukuze ucoshe umongo wale nkulumo eyethulwe ngoLwesibili.