Imikhakha ekhahlamezekile ikhomba inzikamnotho ezweni
Imiphumela ekhishwe yiStatistics South Africa, ngoLwesibili, ithi bekulokhu kunezinkomba zenzikamnotho kusukela ngoMfumfu nyakenye. Lokhu kudalwe ukungahleleki kwezinkampani ezilawulwa nguHulumeni ngoba azenzi inzuzo, esikhundleni salokho zifuna ukutakulwa ngemali yoMbuso.
Ngokombiko kweStatistics SA, imikhakha ekhahlamezeke kakhulu ngowezokuthutha, owehle ngama-0,6%, ezinyangeni ezintathu nje vo. Ezohwebo zehle ngama-3,8%, kwaba nomthelela wokwehla kwamandla omnotho ngama-0,6%, ezweni lonke. Izimboni zomikhiqizo zehle ngama-1,8%, kwaba nomthelela wama-1,8%, ekulahlekeni komnotho ezweni lonke. Umkhakha wezokwakha ushayeke kakhulu ngoba wehle ngama-5,9% kwalahleka umnotho obalelwa ema-0,2% ezweni. Izimboni ezikhiqizayo zehla ngama-0,2%, ukusebenza kukaHulumeni kwehla ngama-0,1%. Ezimbiwayo yizona ezikhuphuke ngama-0,1% kuphela. Lokhu kwenziwe ukucima kukagesi okungajwayelekile, okubhokile ezweni.
Kusukela ngowe-1994, sekungokwesithathu ukuthi kube nenzikamnotho ngoba enye yake yaba khona ngowezi-2018, eyelanywa yilena ehlasele manje. Ukwehla komnotho jikele kwehle ngama-0,2% kanti ngaphambi kwalokho ubuwehle ngama-0,8%, ezinyangeni ezintathu ezingaphambi kwenyanga uMfumfu ngonyaka odlule. Lokhu sekuvulele nezinhlangano eziphikisayo ithuba lokukhwela zizehlele kuHulumeni kaMengameli uCyril Ramaphosa. Yinzikamnotho yesibili lena eminyakeni emibili, njengoba kwaba khona enye ngowezi-2018, yize ingabanga nolaka njengalena ehlasela manje, futhi yenzeka izwe liphethwe nguMengameli uRamaphosa.
UMengameli we-Economic Freedom Fighters (EFF), uMnu uJulius Malema, ubekhuluma esithangamini seBlack Business Council Summitt, eGoli, izolo (ngoLwesine). Uthe inzikamnotho iyizinkomba zokuthi umnotho wakuleli lizwe ubheke eweni. UMalema ubenikeza izethameli isithombe sokuthi lukhulu luyeza luyanyelela. Uthe aboHlanga yibona abasazothwala kanzima ngoba iningi lisemkhakheni wamabhizinisi asafufusa.
Emkhakheni wezokwakha, aboHlanga bebezama ukungenisa kuwona kodwa usugubuzelwe yifu elimnyama ngoba angeke uphinde usimame uma ugesi useyinkinga. Lo mkhakha ubuqhoqhobelwe ngabamhlophe esikhathini esiphambili futhi yibona esebesimeme kuwona. Isipiliyoni sezinkampani zabo zenza kube lula ukuthi banikwe umsebenzi uma kukhona izinkampani abancintisana nazo. Ezolimo, amahlathi nezokudoba yizona ebezingumgogodla ekukhuleni komnotho ezweni. Ukufadalala kwalo mkhakha, kuzophoqa uHulumeni ukuthi kube nguyena obeka imali eceleni ukuze ufukulwe. Enye ingebhe ekhona kubaLimi ukuthi abazi ukuthi ikusasa libaphatheleni ngoba kukhulunywa ngokubuyiselwa komhlaba kubantu ngaphandle kwesinxephezelo. Yikho abanye abalimi sebelifulathela leli lizwe, bahlwaya kwamanye amazwe. Kukodwa nje lokhu ongoti bezolimo bathi kuwukhinyabezile umnotho.
UMholi we-EFF, uMalema utshele osomabhizinisi nezifundiswa ezigxile emkhakheni wezohwebo ukuthi uma bengazethembi bona, abatshalizimali bakwamanye amazwe angeke babasize ngalutho. Inkinga yokucima kukagesi okungajwayelekile yikhona okufake itwetwe kubatshalizimali bamazwe omhlaba. Izinkinga ezikhungethe u-Eskom ngokongoti bezomnotho yinto ongabe kade yaxazululwa kodwa esikhundleni salokho abantu abebebambe amatomu khona bavele besula ezikhundleni, sebezwa kushisa.
UMengameli uCyril Ramaphosa uvumile ukuthi ikhona inzikamnotho futhi izinkomba zayo bezilokhu zikhona. Enkulumeni yakhe abeyibhekise esizweni ngenyanga eyedlule uMengameli uRamaphosa akadalulanga ukuthi sikuphi isixazululo ngokunqamuka kukagesi okungajwayelekile. Umthelela walokhu ukulahleka kwemisebenzi okudalwa yinzikamnotho. Inkinga yokunqamuka kukagesi kuthiwa isazokhungatha leli lizwe izinyanga ezili-18 ezizayo. Osomabhizinisi abasafufusa yibona abazokhandleka kakhulu ngoba ukunqamuka kwamandla kagesi kukhinyabeza imikhiqizo okufanele bayenze ukuze bathole inzuzo.
Ukunqamuka kukagesi okungajwayelekile akuyona into eqala manje kodwa ukuzwela kwakho kubonakale ngoba sekukhishwa imiphumela yesimo somnotho ezweni. Ukwakhiwa kweziphehli zikagesi ezweni kusahamba ngonyawo lonwabu. Kukhona ezakhiwayo eNgula, eLadysmith, KwaZulu-NataL, eMedupi, eKusile ezingakaqali ukukhiqiza ngoba azikaphothulwa.
UNgqongqoshe Wezezimali ezweni, uMnu uTito Mboweni, uthi isixazululo senzikamnotho ukwehlisa amaholo ezisebenzi ngezigidigidi ezili-160 eminyakeni emithathu ezayo. Lokhu kudale enkulu intukuthelo emalungwini omfelandawonye wezinyunyana iCongress of South African Trade Unions (COSATU) ethe lokhu akukaze kwenzeka ngisho nangesikhathi sobandlululo. Izinhlangano zabathengi nazo sezizwakalise ukukhathazeka ngokwehla komnotho ezweni nezinhlangano zosomabhizinisi bathi amandla abathengi azonqundeka kakhulu. Ngalokhu abantu bazocwila ezikweletini abangeka bakwazi ukuphuma kuzo.