Uyinono, uyahlonipha uyakhana aqhulule ingoma uNkosi
Akuyona into encane ukuyibamba emsakazweni iminyaka engama-34 esikhathini lapho iziteshi zemisakazo zihambisana nesikhathi samanje ngokuzama ukuheha intsha ukuze kwenyuke izibalo nokuthola izikhangiso kungene imali.
Kuzo zonke izivunguvungu nezinselelo ezibhekana neziteshi zemisakazo kunendoda enganyakaziswa kuMetro FM. Ibhodla njalo ngamaSonto kusukela ngehora lesi-9 ekuseni kuya kwele-12 emini. Lowo uWilson B Nkosi oshayela iSounds and Stuff Like That, okuwuhlelo oluthakwe ngomculo opholile nezinto ezihluza umqondo.
Ngokwezibalo, uhlelo lukaNkosi lunezigidi zabalaleli yize lungena kanye esontweni. Okuhlalukayo ngoNkosi wukuthi uyinono, umsebenzi wakhe uyawuhlonipha futhi nabalaleli bakhe ubanika leyo nhlonipho.
Alupheli uhlelo lwakhe umlaleli engazuzanga okusha. Kungaba izimpande zokusungulwa kwengoma noma umlando thizeni womuntu odumile okucashunwa amagama akhe.
Ukufaka izigamu ezifana nePoetry in Motion, lapho efunda khona inkondlo, neBack by Popular Demand, lapho ephinda ingoma ethandwe kakhulu ohlelweni olwedlule, ngezinye zezinto ezithandwa abalaleli bakhe.
Njengomuntu oseqhube isikhathi eside, ubungalindela ukuthi ehlelwe izinga. Mhlawumbe aphindaphinde into eyodwa.
Nguye oqhamuke nombono weLove Movement abayenza kuyona iMetro FM noMsizi Shembe noSentle
Lehoko ezinhlelweni zabo ngokwahlukana. Bayiqhuba nangaphandle komsakazo ngokudlala bukhoma ezindaweni abaqashwa kuzona ngezimpelasonto.
Kule Love Movement kudedelwa izingoma zamzukwana nezesimanje ezipholile ezibenze baba ngondabuzekwayo.
Ukungena kwakhe kulo msakazo ngowe-1986 kwafana nenganekwane. Eseyibhobhodlana ezalelwe esifundazweni iMpumalanga wakhulela eMgazini kwaManzini, eSwaziland, waba nesibindi sokubhalela iSABC incwadi ecela umsebenzi esewumfundi kaGrade 11.
Ngemuva kokuphumelela inhlolokhono wathathwa, waba ingxenye yabasakazi bokuqala ukuzwakala emoyeni kuRadio Metro eyafika ngedumela ezweni ilalelwa aboHlanga ababelangazelele uguquko emsakazweni.
Wake wakuchaza njengephupho ukuzibona esakaza ndawonye nezihlabani ezinjengoTreasure Tshabalala, uLawrence Dube, uTimothy Modise, uShado Twala, uSheila D noLucky Ntuli. Wakhula ebukela kuDavid Gresham owayesakaza kuSpringbok Radio noCyril “Kansas City” Mchunu owayeyisilomo kuRadio Zulu osekuwu-Ukhozi FM manje. Esengaphakathi kwaSABC wabuye wathola ukuqashwa ezinhlelweni zethelevishini.
Waba umethuli wokuqala weJam Alley noVinolia “V-Mash” Mashego wabuye wadudula uhlelo olwaluthi Zakhala Izingcingo noNomawethu Dingiswayo. Kuyo yonke le minyaka ekuMetro FM yizinhlelo zantambama nezasekuseni kakhulu angakaze anikwe zona.
I-In the Still of The Night, ayeyenza kusukela ngoMsombuluko kuya kuLwesine, nalo lwaba nedumela ngeminyaka yaphakathi kuma-2000. Phakathi namasonto usuke ematasa nenkampani yakhe iWilson B Nkosi Communications lapho eyicopy writer, uphrojusa nevoice over artist enza umsebenzi wokutholela izikhangiso umsakazo nethelevishini. Njengomuntu odumile ubungalindela ukuthi izindaba zakhe zangasese zitholakale emaphephandabeni agxile ezindabeni zangasese zosaziwayo njengoba kwenzeka kwabanye.
Lutho ngale nsizwa yakwaNkosi ezifelayo ngeOrlando Pirates noCharles Barkley noMichael Jordan abayizinkakha zebasketball. Ukudlula emhlabeni komsakazi weMetro FM, u-Eddie Makhosonke Zondi, ngowezi-2014 kwamphula inhliziyo uNkosi, owayehlala embiza ngo“My Boy” noma athi “My Big Brother”. Usevamise ukuchitha isikhathi esiningi noRobert Marawa abebevakashelana emizini yabo esaphila uZondi.