Uzimisele ukwelapha imiphefumulo nemigcagco ngomculo uBenjamin
UBenjamin Dube uzosebenzisa ithuba lokunandisa KwaZulu-Natal ukwelapha labo abangaziphathi kahle emshadweni.
Lo mculi ongumfundisi oneminyaka engaphezulu kweli-30 eyibambile endimeni yomculo wokholo uzoqala umzungezo wamakhonsathi akhe ngokuhambela ePort Shepstone e-Ugu Sports and Leisure ngomhla zintathu kuMbasa.
UDube uzokwenza la makhonsathi ngokubambisana nenkampani yaseMgungundlovu i-Athimthende Events kaMnuz Xolani Xulu ehlela imicimbi phakathi kwezinto eziningi ezenzayo.
UDube ubehambele eThekwini lapho ebezonaba ngezinhlelo zalo mzungezo wamakhonsathi akhe. Uthembise abalandeli bakhe ukubelapha ngezingoma ezizobakhumbuza ngobukhona bukaMdali.
Uthe phakathi kwezinye izinto azozenza ukufukula abaculi bezindawo azonandisa kuzo kwazise usemnkantshubomvu emculweni.
Ebuzwa ileli phephandaba ngempilo yakhe yangasese, uDube akakufihlanga ukuthi uke wangena ogibeni njengomuntu wasemhlabeni, kwagcina kumoshakala emishadweni yakhe emibili.
“Akumele umuntu azenze ungcwelengcwele phambi kwabantu.
Mina ngiwenzile amaphutha ingakho ngihlukanise kabili. Kunkosikazi wami wokuqala ngathola amadodana amane.
Amathathu okungoMthokozisi,
Sihle noBuhle baneqembu elibizwa ngokuthi iDube Brothers. Umsebenzi wami njengoba ngibakhulisa ngedwa, ukubatshela amaqiniso, ngibadodise, ngingazenzi ungcwelengcwele ukuze babe qotho ezimpilweni zabo nasemphakathini. Njalo ngibabeka emthandazweni ukuthi uNkulunkulu abagcine behamba endleleni enomthetho,” kusho uDube.
Uqhube wathi ingakho ezolifuqa ivangeli kwabazohambela amakhonsathi akhe ubumqoka bokuziphatha kahle emshadweni ngoba umshado uyisibusiso esivela koPhezulu.
UDube, ophethe ibandla iHigh Praise Centre eseBoksburg eGauteng, uthe bazomemezela izinsuku nezinye izindawo abazozihambela eKZN uma sebeqede konke nabazosebenzisana nabo.
Kule minyaka ekhona emculweni useke wahlabana ngezindondo eziningi ngezingoma ezifana nezithi Ngiyakuthanda, Linamandla, I know only you, Prayer, El Shaddai Adonai nezinye.
Phakathi kwazo iLifetime Achievement Award ayinqobe kathathu neyeBest Male Artist kumaSABC Crown Gospel Awards, iGospel Legend Award, iBest Song of Praise neBest Worship Album.
Phakathi koxhaxha lwama-albhamu awakhiphile kukhona i-I Feel Like Going On, i-In His Presence, iWorship In His Presence, i-Oh! Bless Our God, iLooking Back, iPraise The Lord – The Collection Vol. 1, iThe Best Of (Live), iHealing In His Presence, iYou Blessed Me Still, iSanctified in His Presence, iHigh praise explosion 2002, iRenewal in His Presence, iLove Africa, i-All Time Favourites, Vol.2, iFor Every Mountain… Thank You, i-All Time Favourites, Vol.1, i-All Time Favourites, Vol.3, i-Eh Yaweh (Live), iBenjamin Dube – Spiritual Celebration, Vol.1, iFeel like going on, iSpiritual Celebration, Vol. 2.
Emcimbini wasePort Shepstone kungenwa ngama-R200 kuya ema-R250.