Sesulile isigungu seSanabo
Sinqume ukwesula isigungu seSouth African National Amateur Boxing Organisation (Sanabo) esishaye udaka kulo nyaka ngokwehluleka ukukhipha osomankomane abazomela izwe kuOlympics eJapan maduze. Ngokwencwadi ebhalelwe iSouth African Sports Confederation and Olympic Committee (Sascoc), uMnyango Wezemidlalo kuzwelonke ne-International Boxing Association (Aiba), isigungu seSanabo sikhala ngezimo ezenza kungasebenzeki kahle. Kuvela ukuthi iSanabo ithathe lesi sinqumo sokudikila umsebenzi ngemuva komhlangano ewubambe zingama-20 kuNhlolanja.
Le ncwadi yokwesula kweSanabo, iBAYEDE eyibonile, ifike ezandleni zeSascoc ngeSonto esiphuma kulo. Le nhlangano engamele izinhlangano ezifana neSouth African Football Association (Safa), i-Athletics South Africa (ASA), iTennis SA nezinye, ibize umhlangano oyisipesheli obubekelwe izolo ngoLwesine ngenhloso yokuzama ukuthola isixazululo.
Lo mhlangano ububekelwe ukuba se-Olympic House esemahhovisi eSascoc eGoli. UPatience Shikhwambana oyibamba njengeSikhulu Esiphezulu kuSascoc bekulindeleke ukuthi ahole lo mhlangano okumenywe kuwona amalungu eSanabo avela ezifundazweni eziyisi-9 ezweni.
Encwadini yokwesula kusayine obenguMengameli u-Andile Mofu, uPretty Tsotesti uNobhala Jikelele, u-Elizabeth Bosman oyiSekela Nobhalala Jikelele, u-Ezekiel Hlaosa onguMgcinimafa noCatherine Mashiloane uMxhumanisi wabezindaba nomphakathi.
Lesi sigungu sisula nje, sashiya izikhulu zeSascoc zibambe ongezansi ngesikhathi zinquma ukungalubhadi emhlanganweni oyisipesheli owawubizwe yiyo iSascoc ukuzama ukubona ukuthi lingahlanganiswa kanjani iqembu elizohamba neTeam SA ukuya ku-Olympics. Leli phephandaba lisanda kubika ngokutsheka kwezinto ebuholini bukazwelonke bale nhlangano okubhekwe ukuthi icije osomankomane bangomuso. Lalilikhulu ithemba lokuthi izinto zizohamba kahle ngesikhathi owayenguNgqongqoshe Wezemidlalo, uMnu uFikile Mbalula, efaka izigidi zamarandi ezili-10 kuBoxing League okwathiwa izohanjiswa kuzona zonke izifundazwe. Yagcina ngokudlalwa e-Eastern Cape kwaphela kanjalo.
Ukufingqa imikhono kukaNgqongqoshe uMbalula kwadalwa ukungabi namuntu eqenjini lezwe elayodlala kuRio Olympics eBrazil ngowezi-2016. Kwaba elikhulu ihlazo ukungakhiqizi usomankomane emqhudelwaneni omkhulu njengalona selokhu iNingizimu Afrika yakhululwa emaketangweni obandlululo.