Ibekelwe amazolo kusasa koweSharks neStormers
Kuzosiphuka izidindi emdlalweni weVodacom Super Rugby lapho kuzotholana phezulu khona iCell
C Sharks neDHL Stormers. Iningi labadlali bala maqembu bebeyingxenye yeqembu lesizwe lakuleli elinqobe iNdebe YoMhlaba nyakenye eJapan.
Kulindeleke ukuthi kuguge utshani uma sekutholana phezulu iSharks yaKwaZuluNatal neStormers yaseWestern Cape emdlalweni weVodacom Super Rugby eJohnsson Kings Park Stadium kusasa ntambama.
Okubukeka kuyikho okuzokwenza ukuthi lo mdlalo ozoqala ngele-15:05 ushube, ukuthi womabili la maqembu ayiqale kahle isizini yakulo nyaka. ISharks kusukela iqalile isizini isidlale imidlalo eyisi-6 kuyona inqobe emihlanu yahlulwa kowodwa.
Emidlalweni eyinqobile ihlule iBulls ngamaphuzu angama-23 kwali-15, iHighlanders ngamaphuzu angama-42 kwangama-20, iRebels ngama-36 kwangama-24, iReds ngama-33 kwangama-23 kwaba iJaguares ngama-33 kwali-19. Ihlulwe iHurricanes ngamaphuzu angama-38 kwangama-22.
Kuyiwa kulo mdlalo nje iSharks iyona ehlezi esicongweni ngamaphuzu angama-20. IStormers isendaweni yesibili ngamaphuzu ali-17.
IStormers yona isidlale imidlalo emihlanu yanqoba emine yase yehlulwa kowodwa. Yona kweyayinqoba yahlula iBulls ngamaphuzu ali-13 eqandeni, iLions ngamaphuzu angama-33 kwangama-30, iJaguares ngali-17 kwayisi-7, iHurricanes ngama-27 eqandeni. Ihlulwe iBlues ngamaphuzu angama-33 kwali-14.
Okunye okuzoshubisa lo mdlalo ukuthi iSharks izofuna ukubuyisa izinduku njengoba ngesizini edlule ihlulwe kuyona yomibili imidlalo la maqembu edlala emlenzeni emibili.
Umdlalo wokuqala waphela iStormers inamaphuzu ali-16 kwali-11, kowesibili waphela inamaphuzu angama-27 kwali-16.
Umqeqeshi wabadlali baphambili beSharks, uDavid Williams, kade ekhuluma nabezindaba phakathi nesonto, uthe iyamjabulisa indlela abadlali bakhe abenza ngayo.
“Kusukela kuqale isizini abadlali bayakwenza lokhu engikufisayo. Isifiso sami ukuthi uthi uqala umdlalo sibe sihlasela kuzona zonke izinhlangothi. Okukunqobise ngesonto eledlule ngeke uthembe ukuthi kuzokusebenzela emdlalweni olandelayo kwazise amaqembu awafani, ingakho sizoya kulo mdlalo weStormers sineqhinga elihle engikholwa ukuthi lizosebenza,”kusho uWilliams.
IStormers iya kulo mdlalo ibiphumule ngesonto elidlule, kusho ukuthi iwubuke wonke umdlalo weSharks neJaguares.
Umdlali waleli qembu laseWestern Cape, uSeabelo Senatla, uthe ulindele umdlalo onzima.
“Ngeledlule siwubuke wonke umdlalo weSharks neJaguares, idlale kahle kakhulu yakwazi ukuwina amabhola amaningi nokuyinto enhle kumbhoxo. Njengoba edlalela ekhaya amaSharks azoba ingozi enkulu kuthina, kodwa ngikholwa ukuthi njengoba kade siphumule futhi sibabonile indlela abadlala ngayo nathi singaba ingozi kuwona. Leli qembu linabadlali ababili esibabonile benza kahle kweyoMhlaba uLukhanyo AM noMakazola Mampipi, lokho kuzongigqugquzela ukuthi ngidlale kahle kwazise ukudlala nompetha kuyinto engiyithandayo,” kusho uSenatla.