Selichithe imicimbi igciwane lembubhiso
Ngokusho kwezibalo zeNational Health Commission zosuku ziveze ukuthi kutholakale abantu abali-15 asebetheleleke ngegciwane iCoronavirus okuthathwa njengokwehla kwesibalo sokutheleleka njengoba selokhu sibhedukile lesi sifo izibalo zosuku beziphezulu kunalokhu.
Abayisi-6 kulesi sibalo igciwane balithole ngaphandle kwezwe.
Isifundazwe iHubei okwaqhamuka khona leli gciwane ngoZibandlela nyakenye kubikwe ngezibalo zansuku zonke ukuthi abatholwe benalesi sifo kuleli sonto bayisi-8, okuyinani eliphansi kakhulu selokhu iCoronavirus yabheduka.
Lokhu kwehla kwesibalo sansuku zonke kube yinto ethusayo ngenxa yokuthi iChina ibibika inani eliyizi-2 000 njalo ngosuku.
Ngokwezibalo manje iChina isibike ukuthi abantu abayizi-80 793 banalesi sifo kuthi abayizi-3 169 bashona.
Khonamanjalo, INdlu yoMbuso yase-USA, iWhite House, imise ukugujwa kosuku lweSt Patrick’s Day obeluzoba izolo nokuvakasha kukaNdunakulu wase-Ireland, uMnu uLeo Varadkar, ngenxa yokubheduka kweCoronavirus.
Bekuhlelwe ukuba uMengameli wase-USA, uMnu uDonald Trump kanye noNdunankulu uVaradkar baye emcimbini weShamrock Bowl eyenzeka njalo ngonyaka lapho uNdunankulu ebezoyethula.
ENingizimu Afrika lesi sifo sesiphoqe ukuthi ingqungquthela kanobhutshuzwayo ebizoba mhla zili-17 kuya zili-18 kwephezulu ihlehle. IWorld Football Summit (WFS) Africa, ibizobanjelwa eMoses Mabhida Stadium, eThekwini, nobekuzobe kungokokuqala lapha e-Afrika.
Bekulindeleke ukuthi kube khona izikhulumi eziqhamuka emazweni ahlonishwayo emhlabeni. Ngokwezibalo ziyizi-126 652 izigameko zeCoronavirus esezibikiwe emhlabeni kanti bayizi-4640 asebeshonile.