KWEZINYE IZINGXENYE
E-Australia
Kufe nezisebenzi zikaHulumeni ngesikhathi indiza ebithwele abantu abahlanu iphahlazeka eningizimumpumalanga ye-Australia ngoLwesithathu.
Bonke abagibeli abayisihlanu abebe kule ndiza abasindanga. Kusolwa isimo sezulu ebesingesihle ngokuphahlazeka kwale ndiza okuthiwa ike yazama izikhawu ezimbili ukuhlala eduze komfula iLockhart. Oyisikhulu kuleliya lizwe, uMnu uChris Hodgman, utshele abezindaba ukuthi ngokwazi kwabo bebeyisihlanu abagibeli kule ndiza futhi akekho osindile.
Uthe basola isimo sezulu ebesingesihle kodwa kusesekuseni ukusho imbangela yangempela yale ngozi kanti namaphoyisa asaphenya. Bonke abebekule ndiza iCessna 404 Titan bebephuma eCairns.
EBritain
UNgqongqoshe Wezempilo eBritain, uNkk uNadine Dorries, ukuqinisekisile ukuthi usengenwe yigciwane eselinyakazise umhlaba wonke iCoronavirus.
Kuyimanje usehleli endaweni yakhe yedwa futhi uthi uzilandela zonke izeluleko zokuphepha azinikiwe emuva kokuba etshelwe ukuthi ungenwe yiCoronavirus. Abezempilo kuleliya lizwe sebeqale umkhankaso wokuthola bonke abake baba nokuthintana noNkk uDorries kanti namaHhovisi oMnyango Wezempilo nawePhalamende alandela izeluleko zabo.
Kuthiwa uNkk uDorries uhlangane namakhulu abantu ePhalamende ngesonto eledlule futhi wahambela umcimbi noNdunankulu uBoris Johnson.
Kwa-Israel
Sekuvaliwe ukuhlangana kwabantu abayisibalo esevile ezi-2 000 kwa-Israel ukugwema ukusabalala kweCoronavirus.
Kuleli sonto leliya lizwe limemezele izinyathelo zalo ezintsha zokugwema ukusabalala kwaleli gciwane ezihlanganisa ukuncishiswa kokuvakashelwa kwabagulayo ezibhedlela nasezindaweni ezihlala abantu asebathatha umhlalaphansi. UMnyango Wezempilo kuleliya lizwe uthe: “Yonke imibuthano yomphakathi kufanele ibuye ibhekisiswe futhi nayo yonke ehlanganisa abantu abangaphezulu kwezi-2 000 ngokwesibalo ngeke ikwazi ukuqhubeka.”
Uphinde wakhipha imigomo ezosiza labo abangangenwa kalula yilesi sifo okungabagulayo nasebekhulile.
“Abantu abanezimpawu zaleli gciwane abasavumelekile ukuphelezela abagulayo noma ukuvakashela izikhungo zasebekhulile,” kusho uMnyango.
ENingizimu Afrika
Kulindeleke ukuthi itheleke kuleli namuhla (ngoLwesihlanu) indiza ethwele abakuleli abali-150 abalandwe eWuhan, China, emuva kokubheduka kweCoronavirus. Lokhu kudalulwe uNgqongqoshe Wezempilo kuleli, uDkt uZweli Mkhize, oveze nokuthi indiza yakuleli ebiyolanda laba ibinabantu abali-15 boMnyango noWezokuvikela. Uma abalandiwe sebekuleli bazohlaliswa endaweni yabo bodwa bengaphansi kweso lodokotela izinsuku ezingama-21 noma ngaphezulu uma kunesidingo. ENingizimu Afrika sebeli-13 abantu osekutholwe ukuthi bangenwe yileli gciwane.
EGuinea
Isiphinde yalibaziseka okwesibili inhlolovo ebizokwenizwa eGuinea ngayo obekuzocaca ukuthi ngabe uMengameli wakuleliya zwe, uMnu u-Alpha Condé, uyavumeleka yini ukungenela ukhetho ihlandla lesithathu. Ngenyanga edlule uCondé uyilibazisile inhlolovo wathi kuzoba ukuhlehliswa nje kwesikhashana ngenxa yokukhathazeka ngokuthi ingase ingahambi ngendlela eqondile. NgeSonto izakhamuzi bekumele zikhethe amalungu ePhalamende. Kodwa iKhomishini Yokhetho ithe kumele kuhlehliswe njengoba isalindele umbiko we-Ecowas.
Ngesonto eledlule ithumele ithimba ukuba liyophenya indlela yokuvota ikakhulukazi uhlu lwabavoti.
Ngenyanga edlule i-International Organisation of La Francophonie (OIF), okuyizizwe ezikhuluma isiFrentshi, yathi kunezinkinga ekuhlonzeni amagama alinganiselwa kuzigidi ezi-2.5 asohlwini lwabavoti.