Isabelomali soMnyango Wezokuthutha sikhinyabeze abampofu
UMnyango Wezokuthutha ugxamalazile ngoba uthinta ezokuthuthwa komphakathi nokwakhiwa kwemigwaqo. IKwaZulu-Natal yisifundazwe esigcwele izindawo zasemakhaya.
ISikhulu sezezimali kulo Mnyango, uMnu uWayne Evans, senze isethulo phambi kweKomiti Lezezimali eSishayamthetho eliholwa uMnu uSipho Nkosi. Amehlo abethe njo kulesi sethulo soMnyango oholwa nguMhlonishwa uBheki Ntuli ngoba iwona oqukethe nezinto ezibucayi okuyimboni yamatekisi, kuphinde kulindelwe ukuthi kudalwe amathuba omsebenzi ngoba uqukethe ingqalasizinda nokuyilapho okudaleka khona amathuba omsebenzi.
Ingqalasizinda engaphansi kwalo Mnyango yenza kuqasheke nalabo abangenawo amakhono. Yiwo futhi lo Mnyango osubheka udaba lomngcele osuphenduke isidleke sobugebengu phakathi wakuleli neMozambique.
UMnyango Wezokuthutha uhlomule ngezigidigidi ezili-R11, 6 usuka ezigidigidini ezili-R10, 8 kusabelomali sonyaka wezi-2020/21.
UMnu uNkosi uthe lokhu kubukeka kukuhle ngaphandle kwezingqinamba zokukhula komnotho kusuka ngowezi-2011, lapho izakhamuzi zesifundazwe zafudukela eGauteng ngenxa yokuyofuna amathuba omsebenzi.
Nakuba lezi zibalo zibukeka zizinhle, kodwa kunezinhlelo eziphucwe inkece, njengokuthuthwa komphakathi kwehle ngezigidi ezi-R5, 609, zathola izigidigidi ezi-R2. Echaza uMnu u-Evans uthe: “Lokhu kwehla kwemali eyabelwe ukuthuthwa komphakathi kudalwa ukuthi uhlelo lokuthuthwa kwezingane zesikole seluza kuMnyango Wezokuthutha alusaphethwe uMnyango Wezemfundo.”
Uhlelo lokuthuthwa kwezingane zesikole lwabelwe izigidi ezili-R150. Kulolu hlelo kuzuza kakhulu izingane zasemakhaya njengoba zihamba amabanga amade ukuze zifinyelele ezikoleni.
UMnu u-Evans ephawula ngalesi sabelomali uthe: “Ngemali engangezigidi ezili-R150 sizokwazi ukuthi sithuthe abafundi abayizi-58 000 ngoba kulolu hlelo ingane ayikwazi ukuzikhethela ukuthi ifisa ukufundakuphi, kumele ifunde esikoleni esiseduze nayo bese uMnyango welekelela ngokumusa esikoleni lowo mfundi.”
Ukwakhiwa kabusha kwengqalasizinda kwabelwe izigidi ezili-R11.
Nakuba le mali ibukeka incane nokho ayithusi ngoba enkulumweni yakhe uNgqongqoshe Wezezimali kuzwelonke, uMnu uTito Mboweni, wachaza ukuthi imali eningi izofakwa ekulungiseni ingqalasizinda ekhona.
Nakulesi sifundazwe iNhloko yoMnyango Wezokuthutha, uMnu uSibusiso Gumbi, ithe cishe okungama-60% kuya okungama-70% kwesabelomali sabo bewuMnyango kuzogxila ekulungiseni lokho abanakho.
“Inhloso eyenza ukuthi sigxile ekulungiseni lokhu esinakho yingoba sihlose ukwengeza impilo kukho ngeminyaka eli-15 kuya kwengama-20.” Kusho uMnu u-Evans.
Khona kunjalo, ukuguqulwa kwemigwaqo yegraveli iba ngeyetiyela kwabelwe izigidi ezili-R102 kanti kuzohlomula kakhulu izindawo zasemakhaya.
Lo Mnyango ube nomthelela ekudaleni amathuba omsebenzi, kusungulwe izinhlelo eziningi ukwelekelela ekutheni kudaleke amathuba omsebenzi. Uhlelo iZibambele lwabelwe izigidi ezingama-R401 558. “Lolu hlelo lwakhelwe abantu abantulayo ezindaweni zasemakhaya, basebenza ukulungisa umgwaqo amamitha angama-500 kabili ngesonto,” kusho uMnu u-Evans.
Uhlelo i-Expanded Public Works Programme (EPWP) luhlomule ngezigidi ezingama-R61, isuka ezigidini ezingama-R71.
USihlalo waleli komiti, uMnu uNkosi, uthe lokhu kwehla kwesabelo kuyamkhathaza, “Ukwehliswa kwemali ngezigidi ezili-R10 kuyangikhathaza ngoba isibalo siphezulu sabantu abangaqashiwe eNingizimu Afrika kanti abaningi bakulesi sifundazwe, lokhu kusho isibhicongo,” usho kanje.
Ube esephonsela inselelo uMnu u-Evans ukuthi aphendule ngalokhu obe esphendula ethi: “Isizathu esenza ukuthi sehlise imali esiyifaka kulolu hlelo ukuthi aludali amathuba omsebenzi ngendlela okulindeleke ngayo futhi alifiki kuleli zinga olulindeleke ukuba lifike kulo ngokokulungiswa kwemigwaqo.”
Ngokwemibiko lolu hlelo esifundazweni kuthiwa lusungule amathuba omsebenzi ayizi-58 260. Abantu besifazane ibo abazuze kakhulu kulo njengoba kuqashwe abayizi-42 000.
UMnu uNkosi uthe ukulungisa lolu daba ubona kusemqoka ukuthi abaqashwayo baqeqeshwe ukuze bezokwazi okulindeleke kubona.
Ezinye zezinkinga lo Mnyango obhekene nazo ukuqoqwa kwemali. Kodwa izethulo zithi wenzakahle ekuyiqoqeni ngamacala omgwaqo okuhlanganisa ukushayela budedengu nezimoto ezibhaliselwa ubunikazi.
Imali yokufaka amakhamera omgwaqo yehlile uma kuqhathaniswa neyangonyaka owedlule.
Inhloko yoMnyango uGumbi, ithe okunye okubadonsela emuva osonkontileka abehluleka ukwenza umsebenzi ngenxa yezizathu ezahlukene. Uthe kwesinye isikhathi osonkontileka bathembisa ukwenza umsebenzi ngemali encane bagcine behluleka ukuwuphothula okugcina kukhinyabeza umphakathi.
Ukungagcwaliswa kwezikhundla ezibucayi nakho kunomthelela ekuphazamisekeni kokuhanjiswa kwezidingo emphakathini.
Ilungu lekomiti, uNkk uMagresveri Govender, lithe: “Ukungagcwaliswa kwezikhundla ezingama-36 kuzoholela ekutheni uMnyango usebenzele emuva.”
Ephetha uMnu uNkosi usonge ngokuthi abazoba nazwelo kuMnu u-Evans, iNhloko Yomnyango nobhekelele izimali uma uthola ukuthi lo Mnyango awuyisebenzisi imali oyinikiwe.