Akukaze kube nje lapha eNingizimu Afrika
Uma kunomgcagco uyaye uzwe abanye becula bethi, “Azange kube nje, laph’ekhaya...” Basuke becula ngentokozo, ‘kukuhle kwethu’. Kodwa kulezi zinsuku silicula leli culo sethukile ngoba irandi lingozi ngozi, lifinyelele esimweni elingakaze libe kuso, ikakhulukazi uma siliqhathanisa noPondo waseBritain. Uma sibheka sicabanga ukuthi imbangela enkulu yalokhu ngukuthi umnotho waseNingizimu Afrika, ngokombiko wesigamu sokugcina sonyaka owedlule siveze ukuthi umnotho waleli lizwe wehle kakhulu.
Noma bengakawukhiphi umbiko olindelwe kule nyanga abakwaMoody’s baphawulile bathi ngokuhlola kwabo ukukhula komnotho waseNingizimu Afrika kuzokwehla kusuka lapho bekukhona ema-0,7% kuye ema-0,4%. Bakuchaze lokhu ngokuthi ukutholakala komuntu oyedwa ongenwe yiCOVID-19 kulibeka engcupheni yomnotho leli lizwe.
Bathi iCOVID-19 izosiqhubezela phambili isimo esibi somnotho wezwe.
NgoMsombuluko ziyisi-9 kuNdasa 2020
■ Liphinde laphelelwa ngamandla irandi uma libhekene nedola lase-USA. Kuvulwe ezimakethe idola lase-USA lilingana namarandi ali-16, 07.
■ UPondo waseBritain udlondlobale wakhuphuka wafinyelela lapho ungakaze ufinyelele khona uma uqhathwa nerandi laseNingizimu Afrika. Kuvukwe ngoMsombuluko uPondo waseBritain ulingana namarandi angama-21.
■ IYuro nalo likhule ladlondlobala lalingana namarandi ali-18,28.
NgoLwesibili zili-10 kuNdasa 2020
■ Zithande ukujika izinto kuvulwa izimakethe ngoLwesibili. Kuvulwe idola lase-USA lilingana namarandi ali-15,91, okuveza isimo esingcono kunesayizolo.
Ngokuqhubeka kosuku ligcine lilingana namarandi ali-15,82 okuthande ukuthokozisa.
■ Noma kusenzima ngoba uPondo waseBritain ugabavule kakhulu, sithe ukuba ngcono ngoLwesibili lapho sivuka uPondo waseBritain ulingana namarandi angama-20,79.
■ Nakhona kuYuro kuvelile ukuthi liyapaquza irandi kwaba khona isimo esilivunayo irandi. Sivuke ekuseni iYuro lilingana namarandi ali-18,12. Ligcine iYuro lilingana namarandi ali-17,96.
NgoLwesithathu zili-11 kuNdasa 2020
■ Ithemba kalibulali. Ziphinde zajika izinto ngoLwesithathu ekuseni lapho idola lase-USA lithe ukuvuka lalingana namarandi ali-15,97.
■ Noma kukhona ukwethembisa ngokunyakaza kwerandi kodwa kubonakala kukuncane. Nokho kuyathokozisa. Kuvulwe ngoLwesithathu uPondo ulingana namarandi angama-20,61 likhombisa ukuthi libe ngconywana ngamasenti amane kunangayizolo.
■ Noma lipaquza irandi kuyabonakala ukuthi libhekene nomqansa. Kuvukwe ngoLwesithathu iYuro liphinde lakhula lalingana namarandi ali-18,07.
NgoLwesine zili-12 kuNdasa 2020
■ Kuvulwe isimo singesihle erandini. Idola lase-USA lithole amandla ebusuku kwasa lilingana namarandi ali-16, 33.
■ UPondo waseBritain uveze izimpawu zokubuyela lapho bewukhona ekuqaleni kwesonto. NgoLwesine kuvukwe ulingana namarandi angama-20,93. Siyethemba asizuqhubeka lesi simo sibe sibi.
■ IYuro nalo lilandele kwezinye izimali emakethe, lalimpintsha irandi.
Kuyathokozisa ukubona ukuthi intengo kawoyela iphezulu noma ezimakethe kungekuhle.
NgolwesiNe intengo yegolide beyimi emadoleni ayi-1635. Intengo kawoyela yinhle kakhulu kulesi sikhathi. NgoLwesine beyingamadola angama-33,83. Ziyaqina izinkulumo ezijabulisayo zokuthi mhla lulunye enyangeni ezayo izophinda yehle intengo kaphethroli nodizili.