UMkhandlu iTheku mawube qotho
Abantu abevile ezigidini ezintathu abakhele nabahlala eThekwini bafuna ukulethwela izidingongqangi ngoba bayazikhokhela kuMasipala. Uma kusenobuholi obuxegayo nobunukwa ngenkohlakalo kuzokwenziwa njani?
Ukugasela koKlebe nokunaphazwa kweTheku emithonjeni yabezindaba sekwakhe isithombe esibi ngaleli dolobha okusazothatha isikhathi eside ukuthi silungiswe noma siyolungiswa isizukulwane esizayo.
Ukuboshwa nokuvela enkantolo kweMeneja yeTheku, uMnu uSipho Nzuza, kwenyuse izinhlonze kufanele. ITheku yidolobha elibalulekile ezwenikazi i-Afrika naseNingizimu Afrika ngoba linechweba eliwumgogodla womnotho wezwe nezwekazi.
Liyithemba nesibuko seKwaZulu-Natal ngoba yilona lodwa idolobhakazi esifundazweni. Ingxenye eningi yabantu esifundazweni ifudukela eThekwini iyohlwaya amathuba emisebenzi, abanye basebenza futhi bazinze khona.
Idolobha liyabudinga ubuholi obuqotho nobethembekile, isizwe esingakwazi ukuzimelela kubona. Eminyakeni eyadlule abaphathi beTheku bebeziqhenya kuyidolobha ebelingenagcobho lwenkohlakalo. Yikho lokhu obekwenza iTheku libe namadolobha angodadewabo njengeLeeds, e-United Kingdom.
Nyakenye kuboshwe uKhansela uZandile Gumede, kwaba nemvunge, kwaholela ukuba i-ANC imdilize esikhundleni. Ukukhishwa kwakhe kwadala isidididi kwaqhekeza uKhongolose namakhansela phakathi. Kwenzeka konke lokhu abantu abafuna ukutshala imali kuMkhandlu weTheku bayabuka.
UMshazi waphumela obala wathi uzimisele ukuphenduka ufakazi wenkantolo ngoba abeseki bakaGumede babethi nguyena onolwazi lwemali eyevile ezigidini ezingama-R280 yokuthuthwa kukadoti ababoshelwa yona yaphuma kanjani. Ezinye izikhulu zeTheku, ezesifundazwe nabanye kuKhongolose babefuna uMnu uSibusiso “Nkunzi” Sithole owayeyiMeneja phambilini aqhubeke nomsebenzi wakhe elinye ihlandla. USithole udlondlobele ngokwemfundo, unesipiliiyoni eside kwezokuphathwa komasipala.
Ngaphambi kokuthi alethwe eThekwini wayenguMlawuli komasipala abanezinkinga KwaZulu-Natal.