Nansi le ndoda enesisu esikhulu.
Inezwi elikhulu futhi ikhulumela phezulu. Uma ikhuluma isisu sayo size sinyakaze, isuke lapho igcizelela iphuzu elithile. Ingusopolitiki, ingusomankomane futhi ingumdlali kanobhutshuzwayo. NguMnu uJames Lindani “Muntu” kaMyeza lowo, isilomo somholi weBlack Consciousness Movement (BCM). Wazalelwa eNatal mhla zi-3 kuZibandlela ngowe-1950. Ukhulele e-Orlando West, eSoweto, wafunda khona. Ubuyele oHlange High School waba yiZebra, waphothula uMatikuletsheni khona. UMyeza uqhubekele oNgoye (University of Zululand), KwaDlangezwa wenza izifundo zomthetho. Esengumfundi wasungula iBlack Allied Workers Union (BAWU). Ngonyaka we-1972 wabayilungu leSouth African Students Organization (SASO), wakhethwa waba nguMengameli wayo ngoNtulikazi ngowe-1973. Kwakuyigagu ekukhulumeni futhi engumholi onohlonze kubalandeli bakhe. Ngonyaka we-1973 iFrelimo eMozambique yanqoba ukhetho yathatha umbuso kuMaputukezi. Nguyena owahola abantu abayizi-10 000 wabagcwalisa inkundla iCurries Fountain, eThekwini, kubungazwa ukunqoba kweFrelimo lowo mgubho wabizwa ngokuthi yiViva Frelimo Rally. Yena, uStrini Moodley, uTerror Lekota, uSaths Cooper, u-Imran Moosa nabanye abaholi beBCM baboshwa ngomyalelo kaJimmy Kruger owayenguNgqongqoshe Wamaphoyisa ngaleso sikhathi. UMyeza wadonsa iminyaka eyisi-6 eRobben Island, waphuma lapho waba ngumholi we-Azanian People’s Organization (AZAPO) eyayisungulwe ngowe-1978. Ushone engozini yemoto eBloemfontein zi-3 kuNhlangulana ngowe-1990.