EZESHASHALAZI NENGQAYI
ESTATE THEATRE Okhehlegume
Uma ukhonze umculo onezinsimbi nesigqi sase-Afrika, vakashela eRendezvius Theatre lapho uVolley Nchabeleng ezokwethula iDouble CD namhlanje kusukela ligamenxe elesi-7 kuze kushaye ele-10 kusihlwa. Le nsizwa yaseLimpopo inekhono lokushaya izinsimbi ezifana nepercussion kanti iphiwe ngasekubhaleni umculo onesigqi sase-Afrika.
Umdlalo ngomndeni
Kunomdlalo iKgalakgalo oqale zimbili enyangeni edlule kanti usongwa ngeSonto eDrama Theatre. Lapha kukhulunywa ngowesilisa oshadile, ohlala ngokuhlushwa umkakhe. Kuholela ekutheni azithole esejola. Kusa ngokunye uma esethola ekuhambeni kwesikhathi ukuthi umkakhe uhlala emcefezela kangaka nje, ingoba unomdlavuza. Kodwa kuthi noma sebezilungisile izinto, kuvela ukuthi owesilisa uthole ingane emjolweni.
Umdlalo iSophiatown
Usongwa ngeSonto umdlalo iSophiatown oqale ukwethanyelwa ngenyanga edlule e-Opera Theatre. Umqondisi omnkantshubovu, u-Aubrey Sekhabi, ushaya ngabalingisi abasebancane abakhumbuza izibukeli izikhathi zamzukwana ngesikhathi lesi sikomplazi sifaniswa neChicago yase-USA. Kulabo ababengakazalwa iSophiatown yayidume ngokudlisa ngengqephu, otsotsi, amaShebeen Queen, osopolitiki naboHlanga nabamhlophe begudlana amahlombe kunkunkwa utshwala kujatshulelwa nomculo. Ikuleli lokishi lapho kwazalwa khona abaculi, ababhali, osopolitiki nezintatheli ezidumile. Ngeminyaka yowe-1940 kuya kowe-1950.
EMARKET THEATRE Imidlalo Ngezilimi
Kugqugquzelwa ukungalahlwa kwezilimi zendabuko njengoba kuqanjwe imidlalo emibili. Owokuqala uXova, ozoqala mhla zingama-25 kwephezulu uvalwe zili-12 kuMbasa.
Lo mdlalo ulingiswa ngesiXhosa kanti nesilungu siyangena kancane. Umdlalo ukhuluma ngowesifazane ontulayo wasezilalini zase-Eastern Cape obhekana nobunzima bokukhulisa umntwana engabonwa nangokhalo uyise.
Umdlalo
IFather Come Home yona ibekelwe umhla ziyisi-7 kuMbasa iphele ngoNhlaba. Ngeminingwane kuxhunywana noAnthony Ezeoke 011 832 1641 ext 203/083 246 4950, uMargaret Charova 011 832 1641 ext 326/ 079 656 2340 noJabulisile Mofolo 011 832 1641 ext 204/ 083 203 0531. Abanye abathintwayo uLusanda Zokufa, oyiSenior Publicist eMarket Theatre ku: 011 832 1641 ext 202 noma 072 367 7867.
Zama ulingise
Kumenywa abafuna ukwenza uLevel 1 wePart-Time Acting Course. Lapha kuvuleleke labo abazobe beqala ukuzama ukulingisa. Kuzokwenziwa amakilasi ali-12 ngoMgqibelo kusukela ngehora lesi-9 kuya kwele-12 emini. Kuzoqalwa ngoNhlaba kuya kumhla zingama-25 kuNtulikazi. Bayanxuswa abanentshisekelo yokuvakashela le ndawo basheshise ngoba imbila yeswela umsila ngokuyalezela. Kumele uphathe izi-R2500 ukubhalisa.
Ingqayi ngabofuzo
Njengengxenye ye#RapidLionFilmFestival, abazohambela lo mcimbi bazobuka iThe Pitch White Gold eqoshwe umdidiyeli wengqayi wase-UK, uLuke Bradford, ekhuluma ngokuhlukunyezwa kwabantu abanebala elimhlophe. URefilwe Modiselle ongusaziwayo kuthelevishini obuye abe nguzime okhangisa ngezingubo zokugqoka, udlala indawo ephambili kule filimu emfishane.
Inhlolokhono
Kuvalwa kusasa ukuhambela inhlolokhono yokuzama indawo emdlalweni iTate Etla Gae (Father Come Home), obhalwe uqweqwe u-Es’kia Mphahlele, wathathwa uClive Mathibe ozakhele ukuhlonishwa njengeCreative Director yeMbokodo Awards wase uhunyushwa uRami Chuene wodumo lokudlala kuMuvhango nakwiThe Queen. Abanothando lokuzama inhlanhla kumele kube abantu abakhuluma isiPedi. Indawo iseMarket Square, No. 56 Margaret Mcingana St, Newtown 2001. Kuqalwa ligamenxe elesi-9 ekuseni kuya ligamenxe elesine ntambama. Abaphumelele bazothintwa ngoMsombuluko.
Amahlaya
UPhillip Dikotla ongumbhali wezincwadi nosomohlaya owaziwa naphesheya kwezilwandle uhlela imicimbi yokugubha iminyaka yobudala engama-30. Kuqalwa mhla zingama-24 kuya kumhla zingama-29 kwephezulu eKippies kusukela ligamenxe elesi-7. UPhillip uvamise ukwenza amaStand-up Comedy engayedwana kanti ku#Turning30 ufuna ukukhipha unyawo.
Namanje abaningi abayikhohlwa into yamehlo ayenza kuJohannesburg International Comedy Fest Gala ngonyaka odlule. Nguye kuphela osamenywe ukunandisa kuSofar Sounds futhi ungowokuqala ukwenza iStand-up Comedy kuYouTube. Thinta u-Anthony Ezeoke ku 011 832 1641ext 203.