Azizenyezi ngokungafinyeleli kowamanqamu
Yize iqembu lakuleli lingawunqobanga umqhudelwano weWomen’s World Cup T20I obubanjelwe e-Australia ophele ngeSonto kodwa iqiniso lithi izintokazi zakithi zidlale kahle kakhulu. Elakuleli liphume kumasemi- final likhishwa yi-India nayo eguqiswe i-Australia kowamanqamu.
IBAYEDE ikhulume nenye yezintokazi ebezimele iNingizimu Afrika kulo mqhudelwano, uNonkululeko Mlaba, waseNtuzuma eneminyaka yobudala engama-20 eyilandise ngohambo lwayo nekuzuzile ngalo mdlalo.
“Yize singawunqobanga umqhudelwano obekuyisifiso sethu kodwa kungijabulisile ukuyomela iNingizimu Afrika kweyomhlaba. Ngifunde ukuthi akufanele uzibukele phansi kodwa kumele uzethembe okuyinto ezokunqobisa umdlalo. Engikufundile e-Australia ngikholwa ukuthi kuzongisebenzela eminyakeni ezayo. Isifiso sami ukuqhubeka nokumela elakuleli,” kusho uNonkululeko. Ungene eqenjini lesizwe lakuleli ngoMandulo nyakenye wayidlala yonke imidlalo kweyeWorld Cup T20I.
UNonkululeko uthe selokhu efikile eqenjini uzizwa esekhaya ngoba iningi lezintokazi ezikulona uyazazi, zimenza azizwe esekhaya futhi amukelekile kanti ufunda okuningi kuzona.
Okubuye kumsize kakhulu ukuthi kukhona uNondumiso Shangase adlala naye eqenjini lesifundazwe iKwaZulu
Natal Coastal abahlala ngandawonye eNtuzuma ngisho nase-Australia bebehlala egunjini elilodwa.
Umehluko phakathi kweT20I, i-One Day International (ODI) neTest.
iTest: Ngumdlalo wekhilikithi odonsa kunayo yonke ekhona. Udlalwa izinsuku ezinhlanu. Yiwona othathwa njengosezingeni eliphezulu ngenxa yokukwazi ukuveza ikhono lomdlali lokukwazi ukumelana nezimo zomdlalo ngokwehlukana kwezigaba zawo. Lolu hlobo lo mdlalo ludlalwa amazwe ali-12 anegunya alinikwa inhlangano ephethe lo mdlalo, i-International Cricket Council (ICC). Iqembu ngalinye liba nabadlali abali-11, umdlalo uba namangeno amane (4 innings) iqembu ngalinye liba namangeno amabili. Lapha eNingizimu Afrika kunoHashim Amla owayeshaya amaruns ali-100 emabholeni angama-200 kuya phezulu. Umdlali angashwiba amaova noma amangaki
iT20I: Lo mdlalo wasungulwa ngowezi-2003 ngenhloso yokwandisa uthando lwekhilikithi emhlabeni jikelele. IT20I idlalwa isikhathi esingamahora amathathu. Iqembu ngalinye libhekana nama-ova angama-20, okusho ukuthi abashwibi bashwiba amabhola ali-120. Okwenza abantu abaningi bawuthande umdlalo weT20I ukuthi abasuke beshaya amabhola ( batting) bawashaya kuyo yonke indawo enkundleni ibhola nebhola imvamisa liyasebenza. Okunye okuwubufakazi bokuthi imidlalo ye-T20I bayayithokozela ukuthi uma kudlalwa imidlalo ye-Indian Premier League (IPL), iMzansi Super League (MSL), iBig Bash League nePaskistan Super League (PSL) izinkundla zigcwala phama. La maligi adonsa izihlabani ngenxa yemali eziyitholayo uma ziyidlala, abanye sebeze bayenza ukudlalela amazwe abo. Umshwibi ( bowler) ngamunye ushwiba ama-ova amane okusho amabhola angama-24. Uma umshwibi eqe umugqa uyahlawula, ibhola elilandelayo noma engathola iwikhethi lowo osuke eshaya ibhola ngeke aphume lokho kubizwa nge“free hit”.
i-ODI: I-ODI okuwumdlalo wosuku olulodwa nawo ungawufanisa neT20I. Umehluko ukuthi ama-ova aba ngama-50. Okunye okuhlukile ukuthi umdlali osuke eshwiba engashwiba ama-ova ali-10. Kudingeka umdlali osheshayo ekushayeni ibhola. Lapha eNingizimu Afrika umdlali owulolu hlobo uQuinton de Kock. I“free hit” ayikho kuma-ODI. Amazwe ayigxenye yalolu hlobo lomdlalo ngokugcwele angama-20.