ZINQUNYWA AMAKHANDA....
Ezekhilikithi
Iqembu lesifundazweni iKwaZuluNatal, iHollywood Dolphins, kulindeleke ukuthi liyivale kahle imidlalo yamaqoqo eMomentum One Day Cup (MODC). Leli qembu lisesicongweni ngamaphuzu angama-30 emuva kwemidlalo eyisi-9, linqobe eyisi-7 lahlulwa kwemibili. Namuhla libumbene elokuqala ntambama lizotholana phezulu ne-Imperial Lions emdlalweni ozobanjelwa eSenwes Park, ePotchefstroom. Eminye imidlalo ezodlalwa kule mpelasonto, kusasa kuzotholana phezulu iWarriors neWSB Cape Cobras abazovovana inkani eBuffalo Park, e-East London ngele-13:30. NgeSonto kuzoshukana iMultiply Titans neVFB Knights eSupersport Park, eCenturion ngele-10 ekuseni.
EzeNedbank Cup
Kuzobhekwa ukuthi azozigila yini izimanga amaqembu adlala kuGladAfrica Championship kumaquarter final eNedbank Cup engempelasonto ezinkundleni ezahlukene ezweni. Sekuvamisile ukuthi amaqembu athathwa njengamancane adlisele lawo amakhulu ogageni. IReal Kings yaseThekwini neTS Sporting yasesifundazweni iMpumalanga ibona kuphela abangakaliwashi ijezi kulo mqhudelwano owunqobile ekhala emuke nezigidi eziyisi-R7 aphinde athole ithuba lokumela iNingizimu Afrika kuCaf Confederations Cup. IKings izoshukana neBidvest Wits eSugar Ray Stadium, eClermont, ngoLwesihlanu kusihlwa ngelesi-8 bese kuthi iTS Sporting idudulane neBloemfontein Celtic KwaNyamazane ngehora lesithathu ntambama ngeSonto. Kunomdlalo womkhaya waseLimpopo phakathi kweBaroka FC neBlack Leopards ePeter Mokaba kusasa ngehora lesithathu ntambama bese kuthi iHighlands Park yamukele iMamelodi Sundowns eMakhulong lishayile elesithupha ntambama khona kusasa.
EzeBafana Bafana
Kuthishwa uFarouk Khan noma uKwanele Kopo esikhundleni sokuba iPhini likaMolefi Ntseki ongumqeqeshi weBafana Bafana. Njengamanje u-Arthur Zwane noTrott Moloto yibo ababambe itoho kanti uNtseki ufuna isekela elizozinza. Izolo (ngoLwesine) bekumele uNtseki amemezele iqembu elizoya kobamba impi neSão Tomé and Príncipe emdlalweni yokuhlungela i-2021 Africa Cup of Nations. Umlenze wokuqala ubekelwe ukuba seFNB Stadium, eGoli, bese kunikelwa e-Estadio Nacional 12 de Julho kowesibili. U-Andre Arendse obeyisekela likaNtseki usegudluziwe indawo yakhe yathathwa uGrant Johnson. UKhan uzakhele ugazi ngokuthi isikhungo sakhe sikhiqize abadlali abanjengoTokelo Rantie kanti uKopo uke waba yinhloko yenkulisa yeSuperSport United, njengamanje ungumsizi womqeqeshi weqembu likaUnder 23 eliyodlala kuTokyo Olympics
Eze-English Premier League
Indlela izinto ezenzeka ngayo kubukeka sengathi kuzothi kusongwa isizini yeEnglish Premier League (EPL) iLiverpool FC izobe isesicongweni ilandelwa iManchester City endaweni yesibili. Okusanzima ukuthi kuqaguleke ukuthi imaphi amaqembu amabili azojoyina lawa angenhla ukuze ezokwazi ukudlala umqhudelwano i-UEFA Champions League ngesizini ezayo. Iqembu elilele endaweni yesithathu iLeicester City enamaphuzu angama-53 kulandele iChelsea FC ngamaphuzu angama-48, iManchester United ngama-45. INorwich City kubukeka kungenzeka ngesizini ezayo igijime kuligi yesibili e-England. Leli qembu liyivale emsileni ngamaphuzu angama-21.
Inkakha yesibhakela uFloyd “Money”
Mayweather useveze ukuthi angathanda ukuthenga ingxenye yamasheya eqembu lase-England, iNewcastle United. Le ndoda, eyayeka isibhakela ingakaze yehlulwe, ibiphawula ohlelweni i-Evening with Floyd Mayweather obeluvakashele eNewcastle.
UMayweather uthe ngeke ananaze uma abantu baseNewcastle bemnxenxa ukuthi ayifake imali yakhe kule kilabhu. Umnikazi weNewcastle, uMike Ashley, usanda kulifaka endalini kanti uke waba nezingxoxo neziqumama zaseSaudi Arabia.