KWEZINYE IZINGXENYE
Unya luyedlulela
Ngalesi sikhathi kunemibiko nokwesaba ukuthi i-Iran kungenzeka ukuthi ibhekene nengwadla nxa kufikwa ekusabalaleni kwegciwane iCorona ingani isitha sayo esikhulu i-United State of America (USA) simemezele ukuthi sizokwengeza unswinyo.
Lokhu ngokwe-USA kuyisijeziso emuva kokuhlaselwa eTaji e-Iraq nokukholakala ukuthi kuhlobene nezihonga ezixhaswa yi-Iran. Lapho lesi sinqumo se-USA ngeIran esizoshaya khona kungqalasizinda nasohlelweni lwezempilo. NgokukaNgqongqoshe Wezangaphandle e-USA, uPompeo uthe unswinyo luqondiswe ‘ezinhlakeni eziyisi-9 nakubantu abathathu’ ikakhulukazi bemboni kaphethroli “ehlinzeka imali embuthweni ukuze uyisebenzisele ubuhonga nokunye okungalethi uzinzo.”
ILesotho ibika isimo esiphuthumayo
Yize inabantu abaningi abavela eChina iLesotho ayikamemezeli muntu onegciwane leCorona kodwa isithathe izinyathelo zokuzivikela. UNdunankulu uTom Thabane ubize lesi simo ngesibucayi lapho izikole zizovalwa kodwa uhlelo lokudla olukhishwa yilezi zikole luzoqhubeka ngenxa yokuthi lesi kuba yisona sodwa isidlo esitholwa ngezinye zezingane ngosuku. Emuva kokubikwa kwezinhlelo zikaHulumeni ngesimo sezwe kuyavela futhi ukuthi alikayibeki imikhawulo yokuhamba nokungena kuleliya lizwe ngisho nasemazweni abukwa ngokuthi anobungozi.
Leli lizwe selikuqinisekisile ukuthi alinawo amandla okuhlola lesi sifo.
Ukuvalwa kwamadolobha sekuqala ukuba yinsakavukela
Idolobha iLondon lingazithola selivalwe thaqa njengamanye amadolobha aseEurope njengoba uNdunankulu uBoris Johnson ebike ukuthi izwe likulindele ukwenza noma yini ukulwa naleli gciwane iCorona.