IZINDABA EZIMFISHANE
USobaba uNgcobo uyaphawula
Umkhulumeli wenhlangano yeZayoni kuzwelonke, iSouth African Zion Churches, uSobaba uBheki Ngcobo, uthi kungani izinkampani eziqashe izinkulungwane zabantu ziqhubeke zisebenze ekubeni bona bengamabandla ezenkolo bengavunyelwe ukuhlanganisa abantu abali-100 kuya phezulu.
Ukusho lokhu ngemuva kokuthi uMengameli uCyril Ramaphosa ekhiphe umyalelo ngeSonto eledlule, ethi imibuthano enabantu abali-100 kuya phezulu, ayivumelekile ukuze kunqadwe ukusabalala kwesifo iCoronavirus. UMbhishobhi uNgcobo, uthi bona bakhonza uNkulunkulu, kodwa unelungelo uMengameli, lokubeka lowomthetho ngoba uphethe izwe.
Sichithiwe isicelo sabafundi
INkantolo eNkulu yaseGauteng, isichithile isicelo sabafundi ababili baseWits University, ebebengafuni ukuthi isikhungo sivale izindawo zokuhlala abafundi.
Lokhu kulandela umyalelo weNyuvesi, othe abaphume baphele abafundi ezindlini zokuhlala ngoba sekubheduke igciwane iCorona ezweni. Abafundi ababili laba, bababele eNkantolo, isicelo sabo safike sachithwa.
Uhlongoza ukomela ngasekhaya uNgqongqoshe
UNgqongqoshe Wezokubusa Ngokubambisana kuZwelonke, uDkt uNkosazana uMaDlamini Zuma, ubebize isithangami sabezindaba ngoLwesithathu, ezobeka ezithebeni izinhlelo zoMnyango wakhe zokulwa nokubhebhetheka kwegciwane iCorona.
Ubalule ukuthi izindawo zokuthiba ukoma emadolobheni noma emalokishini akufanele zibe nabantu abevile ema-50. Lokhu kodwa kuzwakale kungumqansa kubantu abathengisa amanzi amponjwana njengoba ibhizinisi eliheha abantu abaningi leli uma kuphela isonto noma inyanga.